 |
| កីឡាករជើងខ្លាំងលោក ផាន់ គ្រាន់ (សុខ ឆាយ) |
ការប្រកួតដែលបានធ្វើឡើងកាលពីថ្ងៃទី៨ មករា គេសម្គាល់កីឡាករជើងខ្លាំងលោក ផាន់ គ្រាន់ មានការធ្លាក់ដៃយ៉ាងខ្លាំង ដោយសារតែលោកបណ្ដោយខ្លួនអោយឡើងគីឡូខ្លាំង។ នេះជាការប្រែប្រួលមួយដែលគួរអោយចាប់អារម្មណ៍ បន្ទាប់ពីទម្ងន់ខ្លួនរបស់ខ្លួនបង្កផលប៉ះពាល់ដល់សមត្ថភាពការប្រកួតរបស់ខ្លួន រហូតធ្វើអោយអ្នកគាំទ្រខកចិត្តដដែលជាដដែល។
កីឡាករ ផាន់ គ្រាន់ សារភាពក្រោយប្រកួតចាញ់កីឡាករថៃដោយពិន្ទុនៅសង្វៀនទូរទស្សន៍អាស៊ីអាគ្នេយ៍ថា លោកពិតជាស្ទក់ដៃជើងនិងឆាប់ហត់ប្លែក បន្ទាប់ពីលោកបណ្ដោយខ្លួនអោយឡើងគីឡូខ្លាំងខុសពីមុន។ ការបណ្ដោយខ្លួនអោយឡើងគីឡូខ្លាំង លោកថាមានការប៉ះពាល់ចំពោះសមត្ថភាពប្រកួត បន្ទាប់ពីលោកហ្វឹកហាត់មិនបានជាប់លាប់ ដែលជាឥទ្ធិពលបណ្ដាលមកពីធាត់បែកសាច់និងឡើងទម្ងន់ខ្លួនរហូតដល់ជាង៦៩គីឡូក្រាមនាពេលនេះ។
លោកថា គីឡូដើមរបស់លោក គឺត្រឹមតែជាង៥០គីឡូក្រាមប៉ុណ្ណោះ តែក្រោយមកលោកក៏បានវិវត្តន៍ទៅប្រកួតប្រភេទទម្ងន់៦៣គីឡូក្រាមដើម្បីបានឡើងប្រកួតដណ្ដើមខ្សែក្រវាត់នៅលើសង្វៀនទូរទស្សន៍ ជាពិសេសការប្រកួតក្នុងប្រភេទទម្ងន់៦៣,៥គីឡូក្រាម។
លោកថាហេតុផលក្នុងក្លឹបដែលលោកហ្វឹកហាត់ មិនសូវមានឧបករណ៍ហ្វឹកហាត់ ក៏ជាហេតុធ្វើអោយលោកមិនសូវចង់ហ្វឹកហាត់ផងដែរ ទើបលោកចេះតែប្រហែសខ្លួនបណ្ដោយអោយធាត់ ហើយបណ្ដាលអោយប៉ះពាល់ដល់សមត្ថភាពប្រកួតក្រោយពេលបែកសាច់។
លោកថាកីឡាករប្រដាល់ ខុសពីអាជីពផ្សេងទៀត ពោលគឺអោយតែភ្លាត់ឡើងទម្ងន់នោះប៉ះពាល់ភ្លាម ដោយសារតែពេលបែកសាច់គឺសរសៃសសូងមានភាពស្ពឹកស្រពន់លែងសូវរស់រវើក។
លោកថាបើទោះជាបានប្រតិបត្តិសកម្មភាពហ្វឹកហាត់ដូចគ្នានឹងមុនពេលឡើងរេញមុនៗក៏នៅតែមិនសូវរស់រវើក ដូចមុនដែលលោកមិនទាន់បែកសាច់។
លោកថាហេតុផលផ្ទះឆ្ងាយពីក្លឹបដែលលោកហ្វឹកហាត់ ក៏ជាហេតុផលធ្វើឡើងលោកមិនសូវចង់ហ្វឹកហាត់ជាប់លាប់ផងដែរ ទើបគីឡូរបស់លោកចេះតែឡើងគីឡូក្រោយទប់មិនជាប់។
ក្នុងនោះបញ្ហាផ្គូរផ្គងមិនសូវបានច្រើនដូចមុនក្នុងមួយខែៗ ក៏ជាមូលហេតុធ្វើអោយលោកមិនសូវប្រយ័ត្នប្រយែងរឿងរក្សាទម្ងន់ខ្លួន។
លោកនិយាយថា៖ «រយៈពេលមួយឆ្នាំហ្នឹង ក្លឹបដែលខ្ញុំហ្វឹកហាត់អត់សូវមានអីហាត់ ហើយផ្គូរផ្គងក៏មិនសូវច្រើន ទើបចេះតែបណ្ដោយៗចឹងទៅ តែលូវអត់ទុកចឹង ព្រោះប៉ះពាល់ច្រើនណាស់!»។
លោកសារភាពថាដៃជើងចាប់ផ្ដើមស្ពឹកៗនិងមានសភាពឆាប់ហត់ បន្ទាប់ពីលោកបណ្ដោយអោយឡើងគីឡូក្នុងពេលហ្វឹកហាត់មិនសូវជាប់លាប់ស្របគ្នា។
លោកប្រកាសស្វែងរកទីតាំងហ្វឹកហាត់នៅក្នុងក្លឹបដែលល្អជាងក្លឹបចាស់ ដើម្បីកែខៃសមត្ថភាពចុះខ្សោយអោយផុតពីការរិះគន់ បន្ទាប់ពីការប្រកួតនៅលើសង្វៀនកាលពីថ្ងៃទី៨ មករា ទទួលបរាជ័យ។
លោកនិយាយថា៖ «ចាំមើលខ្ញុំដូរក្លឹប ព្រោះក្លឹបខ្ញុំហាត់រាល់ថ្ងៃខ្វះខាតសម្ភារៈ ទើបចេះតែខ្ជិល!»។
លោកប្រកាសសម្រកទម្ងន់អោយនៅត្រឹម៦៤គីឡូក្រាមក្នុងពេលខាងមុខ ដោយលោកបញ្ជាក់ថាមិនអាចបណ្ដាលទម្ងន់ខ្លួននៅតែធាត់បែបហ្នឹងបានទេ។
យ៉ាងណាលោកក៏សម្ដែងក្ដីបារម្ភរឿងសម្រកទម្ងន់មិនបានដូចការគ្រោងទុក ដោយសារតែលោកយល់ថាក្នុងរយៈពេលចុងក្រោយ បើទោះជាលោកមិនសូវហូបច្រើននិងមិនសូវផឹក ក៏នៅតែធាត់បែកសាច់។ លោកនិយាយថាតាំងពីធាត់ខ្លាំងមក ការប្រកួតលែងមានលំនឹងដូចមុនទៀតហើយ ជាពិសេសនៅពេលដៃជើងកក៏ស្ទក់ ហើយនៅពេលសម្រុកខ្លាំងក៏ឆាប់ហត់ប្លែក មិនខុសពីបញ្ជាដៃជើងលែងសូវបាន។
យោងតាមការប្រកួតដែលបានធ្វើឡើងកីឡាករ ផាន់ គ្រាន់ ដែលជាកីឡាករល្បីម្នាក់ត្រូវបានកីឡាករថៃឈ្មោះPhath Say Fa វាយត្រូវខ្ចប់ៗ បើទោះជាកីឡាករកម្ពុជាបញ្ចេញថ្វីដៃមិនសូវទំនេរ។
លោក ញាណ សុធី អ្នករៀបចំព្រឹត្តិការប្រដាល់ប្រចាំនៅទូរទស្សន៍អាស៊ីអាគ្នេយ៍ បានអះអាងថាធៀបនឹងការប្រកួតមុនៗ កីឡាករ ផាន់ គ្រាន់ ធ្លាក់ដៃខុសប្លែក ជាពិសេសបន្ទាប់ពីកីឡាករកម្ពុជារូបនេះឡើងទម្ងន់។ លោកថាកីឡាករ ផាន់ គ្រាន់ ធ្លាប់តែប្រកួតក្នុងប្រភេទទម្ងន់ក្រោម៦៥គីឡូក្រាម ចឹងហើយទើបក្រោយពេលឡើងប្រកួតក្នុងប្រភេទ៦៩គីឡូក្រាម ទើបមានការប្រែប្រួលសមត្ថភាព។
លោកថាការប្រកួតរបស់ ផាន់ គ្រាន់ ចាប់ផ្ដើមបាត់ភាពទាក់ទាញ ដោយលោកប្រកាសថាតាំងពីទូរទស្សន៍អាស៊ីអាគ្នេយ៍ប៉ុន្មានលើកចុងក្រោយ គឺចាញ់ច្រើនជាងឈ្នះ។ លោកបានថ្លែងថា លោកកំណត់អោយ ផាន់ គ្រាន់ សម្រកទម្ងន់ ដ្បិតថាបើលោកនៅតែទុកខ្លួនអោយធាត់បែបនោះ គឺគណៈកម្មការទូរទស្សន៍អាស៊ីអាគ្នេយ៍នឹងផ្អាកផ្គូរផ្គងអោយលោកឡើងប្រកួត។
លោកនិយាយថា៖ «ផាន់ គ្រាន់ ប្រកួតអត់ល្អសោះតាំងឡើងគីឡូ តែមុនខ្ញុំអោយស្រកចឹង បើនៅតែចឹងអត់ផ្គូរផ្គងទេ ខ្ញុំអោយសម្រកព្រោះស្ដាយវាវ៉ៃល្អ!»។
កីឡាករ ផាន់ គ្រាន់ ក៏បានបង្ហាញជំហរសម្រកទម្ងន់អោយខានតែបាន ដោយសារតែលោកក៏មិនចង់បាត់បង់អាជីពប្រដាល់ដោយសារឡើងគីឡូនោះដែរ៕
VOD
ដោយ លោក សុខ ឆាយ
