ភ្នំពេញ៖ លោកប្រធានាធិបតីហ្វីលីពីន Rodrigo Duterte និងស្តេចប្រដាល់ Manny Pacquiao នឹងធ្វើដំណើរទស្សនកិច្ចជាផ្លូវការនៅក្នុងប្រទេសកម្ពុជាថ្ងៃទី១៣ និង១៤ខែធ្នូសប្តាហ៍ក្រោយនេះ។ ក្រៅពីគម្រោងផ្លូវការចូលគាល់សម្តែងការគួរសមជាមួយព្រះមហាក្សត្រនៃព្រះរាជាណាចក្រកម្ពុជា និងសម្តេចនាយករដ្ឋមន្ត្រី ហ៊ុន សែន, លោក Pacquiao អាចនឹងជួបកីឡាករខ្មែរល្បីៗជម្រើសជាតិនៅក្នុងប្រទេសកម្ពុជា។
កិច្ចការជាក់ស្តែងមិនទាន់ត្រូវបានកំណត់ឲ្យច្បាស់លាស់នៅឡើយទេ។ ប៉ុន្តែបើតាមគម្រោងដែលបង្ហើបឲ្យអោយដឹងដោយលោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា, លោក Pacquiao សេ្តចប្រដាល់ និងជាសមាជិកព្រឹទ្ធសភានៃប្រទេសហ្វីលីពីន គ្រោងនឹងចំណាយពេលវេលារបស់លោកដើម្បីធ្វើការសំណេះសំណាលជាមួយកីឡាករជម្រើសជាតិនៃប្រទេសកម្ពុជានៅល្ងាចថ្ងៃទី១៣ខែធ្នូ។ ទីកន្លែងពិតប្រាកដអាចប្រព្រឹត្តិទៅនៅពហុកីឡដ្ឋានជាតិ ឬអាចនៅទីស្នាក់ការនៃគណៈកម្មាធិការជាតិអូឡាំពិកកម្ពុជា។
ទស្សនកិច្ច Pacquiao នៅក្នុងប្រទេសកម្ពុជានៅពេលនេះនឹងមានតម្លៃជាសកលសម្រាប់កីឡាករនៅអាស៊ី និងជាពិសេស នៅកម្ពុជា។ លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានបញ្ជាក់ប្រាប់សារព័ត៌មានថ្មីៗ នៅថ្ងៃអាទិត្យនេះថា៖«វត្តមានគាត់នៅកម្ពុជានឹងជំរុញទឹកចិត្តកីឡាករខ្មែរ និងកីឡាករនៅអាស៊ី។ អ្វីដែលជំរុញទឹកចិត្តកីឡាករខ្លាំងនោះ គឺនៅត្រង់ថា គាត់មានមាឌតូច ហើយអាចក្លាយជាស្តេចប្រដាល់បាន។ ដូច្នេះ វាជំរុញកីឡាករដែលមានមាឌតូច។ ចំណុចមួយទៀត គឺថា លោកកើតចេញពីគ្រួសារកីក្រ។ ជីវិតក្រីក្រ តស៊ូ អាចនាំឲ្យជោគជ័យ»។
ចំណុចពីរខាងលើនេះ ត្រូវបានលោក វ៉ាត់ ចំរើន គិតថា វានឹងជំរុញទឹកចិត្តកីឡាករខ្មែរឲ្យប្រឹងប្រែងបន្ថែមទៀត។ ក្រៅពីជួបកីឡាករជម្រើសជាតិ លោក Pacquiao នឹងជួបសំណេះសំណាលជាមួយលោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា, លោក ហង់ ជួនណារ៉ុន រដ្ឋមន្ត្រីក្រសួងអប់រំ និងលោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា។
សូមបញ្ជាក់ថា សម្តេចនាយករដ្ឋមន្ត្រី ហ៊ុន សែន ដែលនឹងត្រូវជួបសំណេះសំណាលជាមួយស្តេចប្រដាល់ហ្វីលីពីនលោក Pacquiao ក្នុងក្របខណ្ឌទស្សនកិច្ចផ្លូវរដ្ឋនោះ ធ្លាប់ត្រូវបានគេដឹងថា លោក ក៏ជាបុគ្គលម្នាក់«ស្រឡាញ់ និងគាំទ្រ»ការប្រដាល់របស់លោក Pacquiao ដែរ៕
ថ្មីៗ
អត្ថបទ : ចំណារ
No comments:
Post a Comment