កាសែតថ្មី: ការអភិវឌ្ឍ

Showing posts with label ការអភិវឌ្ឍ. Show all posts

Facebook របស់ Fresh News កើនឡើងដល់១.៥លាននាក់ហើយ ខណៈអ្នកប្រើប្រាស់ Fresh News បន្តកើនជិត៨៣ម៉ឺននាក់

(ភ្នំពេញ)៖ គិតត្រឹមថ្ងៃទី១២ ខែមករា ឆ្នាំ២០១៧នេះ ចំនួនអ្នកគាំទ្រ និងតាមដានព័ត៌មានលើ Facebook របស់ Fresh News បានកើនឡើងដល់ ១.៥លាននាក់ហើយ ចំណែកអ្នកប្រើប្រាស់ Fresh News បានបន្តកើនឡើងជាលំដាប់រហូតដល់ជិត៨៣ម៉ឺននាក់។ ដោយក្នុងមួយថ្ងៃអមានអ្នក Like នៅលើ Facebook ប្រមាណពី៥០០០-៦០០០នាក់ ដោយឡែកអ្នកប្រើប្រាស់ Fresh News (App) លើទូរស័ព្ទដៃវិញក្នុងមួយថ្ងៃមានអ្នក Install ប្រមាណចាប់ពី១០០០-១៣០០នាក់។

Fresh News ជាអង្គភាពព័ត៌មានមួយនៅកម្ពុជា ដែលបានប្រើប្រាស់បច្ចេកវិទ្យាទំនើប ក្នុងការបាញ់បញ្ជូនព័ត៌មានថ្មីៗ និងចុងក្រោយបំផុតទៅកាន់ Mobile និង Computer ព្រមៗគ្នាត្រឹមតែមួយនាទីប៉ុណ្ណោះទៅកាន់អ្នកប្រើប្រាស់ទាំងអស់របស់ Fresh News ទាំង iOS និង Android។

* រាល់ព័ត៌មានដែលផ្សាយចេញគឺអូតូស្វ័យប្រវត្តិ (Automatic) ទៅកាន់ ៣កន្លែងព្រមៗគ្នា៖

ទី១៖ បង្ហាញនៅលើគេហទំព័រ www.freshnewsasia.com ដែលមានចំនួនអ្នកចូលមើលជាប្រចាំក្នុងមួយថ្ងៃជាង៣០ម៉ឺន។ (ទិន្នន័យតាម Alexa)
ទី២៖ បាញ់ទៅកាន់ទូរស័ព្ទដៃ ដែលមានអ្នកប្រើប្រាស់ក្បែរ៨៣ម៉ឺននាក់។ (មានតារាងចំនួនអ្នកប្រើប្រាស់)
ទី៣៖ Share ទៅកាន់ Faceboook ដែលមានចំនួនជាង១.៥លាននាក់។ (ចំនួនមាននៅលើ Facebook)

Fresh News មានអ្នកយកព័ត៌មាន ដែលមានបទពិសោធន៍យូរឆ្នាំ លើវិស័យព័ត៌មាន នឹងខិតខំអស់ពីកម្លាំងកាយចិត្ត ដើម្បីប្រមូលយកព័ត៌មានពីគ្រប់ទីកន្លែង និងគ្រប់តថភាពសង្គមទាំងអស់ ចែកជូនប្រជាពលរដ្ឋ កម្ពុជាគ្រប់ស្រទាប់វណ្ណៈ។ Fresh News ក៏សូមធ្វើជាអ្នកឆ្លើយឆ្លង ពាំនាំព័ត៌មានគ្រប់បែបយ៉ាងពីប្រជាពលរដ្ឋ ទៅកាន់មន្រ្តីរាជរដ្ឋាភិបាល និងពីមន្រ្តីរាជរដ្ឋាភិបាល ទៅកាន់ប្រជាពលរដ្ឋវិញផងដែរ។ Fresh News ក៏មានព័ត៌មានជាភាសាអង់គ្លេស (English Version) សម្រាប់ពង្រីកព័ត៌មានរបស់កម្ពុជាទៅកាន់ពិភពលោកឲ្យដឹង។

Fresh News សូមទទួលស្វាគមន៍ និងចុះផ្សាយរាល់ព័ត៌មាន ដែលបានកើតមាននៅតាមទីកន្លែងនានា ពីប្រជាពលរដ្ឋកម្ពុជា ដោយអាចផ្ញើមកកាន់ E-mail: appfreshnews@gmail.com និង ទូរស័ព្ទលេខ៖ ០១៧ ៦០៨ ០០៦។ អង្គភាពយើងខ្ញុំ ក៏ទទួលស្វាគមន៍រាល់ការរិះគន់ នានាពីមិត្តអ្នកអាន ដើម្បីនូវភាពចន្លោះប្រហោង របស់យើងខ្ញុំ៕

Fresh News

ប្រជាពលរដ្ឋ០២គ្រួសារ ស្រុកកំពង់ត្របែកទទួលបានផ្ទះពីសាខាកាកបាទក្រហមកម្ពុជា

ព្រៃវែង ៖ នៅព្រឹកថ្ងៃទី១១ ខែមករា ឆ្នាំ២០១៧ លោកជា សុមេធី ប្រធានគណៈកម្មាធិការសាខា រួមដំណើរដោយ សមាជិក សមាជិកាគណៈកម្មាធិការសាខា ក្រុមប្រតិបត្តិសាខា មន្ត្រីអនុសាខាស្រុកកំពង់ត្របែក អ្នកស្ម័គ្រចិត្ត និងយុវជន កាកបាទក្រហម បានចុះសំណេះសំណាល សួរសុខទុក្ខ និងប្រគល់ផ្ទះ ចំនួន ២ខ្នង ទំហំ ៤មx៥ម ធ្វើអំពីឈើ ជញ្ជាំងនិងដំបូលប្រក់ស័ង្កសី ជូនដល់គ្រួសារក្រីក្រ គ្មានទីពឹង ចំនួន ២គ្រួសារ ១- ឈ្មោះ ចាន់ សារួន ភេទស្រី អាយុ ៤៨ឆ្នាំ រស់នៅភូមិចំណងទាក ឃុំពាមមន្ទារ ស្រុកកំពង់ត្របែក ខេត្តព្រៃវែង។ ២- ឈ្មោះ អ៊ឹម រតនា ភេទប្រុស អាយុ ៧៨ឆ្នាំ រស់នៅភូមិកន្សោមអក ឃុំកន្សោមអក ស្រុកកំពង់ត្របែក ខេត្តព្រៃវែង។

លោកស្រី ចាន់ សារួន និងលោកយាយអ៊ឹម រតនា បានថ្លែងនូវអំណរគុណចំពោះសាខាកាកបាទក្រហមកម្ពុជា ដែលបានសាងសង់ផ្ទះជូនពួកគាត់ ឲ្យមានកន្លែងស្នាក់នៅសមរម្យ ភ្លៀងលែងទទឹក រស់នៅបានស្រួល ព្រមទាំងបានជួយឧបត្ថម្ភស្បៀងនិងថវិកាជាច្រើនទៀតផង សម្រាប់ដោះស្រាយជីវភាព។

លោក បាននាំយកនូវប្រសាសន៍ផ្តាំផ្ញើ សាកសួរសុខទុក្ខ ពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្តេចតែងយកចិត្តទុកដាក់ គិតគូរពីសុខទុក្ខរបស់បងប្អូនប្រជាពលរដ្ឋទាំងអស់ដោយមិន ប្រកាន់វណ្ណៈ ឬនិន្នាការនយោបាយអ្វីឡើយ។ ក្រៅពីការផ្តល់ផ្ទះ សាខាបានផ្តល់ជូននូវអំណោយបន្ថែមទៀតដោយក្នុង ១គ្រួសារទទួលបាន អង្ករ ២៥គក កន្ទេល ០១ ឃីត ០១កញ្ចប់ មី ០១កេស ត្រីខ ០១យួរ ចំរោះទឹកស្អាត ០១កំប្លេ និងថវិកា ចំនួន ១០០,០០០រៀល។

លោកប្រធាន បានជួយឧបត្ថម្ភ ថវិកាផ្ទាល់ខ្លួន បន្ថែម ១០០,០០០រៀលក្នុង ១គ្រួសារ និងចែកជូនអ្នកចូលរួមទាំងអស់ មានលោកតា លោកយាយក្នុងម្នាក់ ៥,០០០រៀល ក្មេងៗ ក្នុងម្នាក់ ១,០០០រៀល អ្នកស្ម័គ្រចិត្ត និងយុវជន ក្នុងម្នាក់ ១០,០០០រៀល សរុបថវិកា ចំនួន ៧០០,០០០រៀល។

លោក បានផ្តាំផ្ញើដល់ប្រជាពលរដ្ឋដែលមានកូនតូចៗដែលរស់នៅតាមមាត់ទន្លេ កុំបណ្តោយអោយកូននៅម្នាក់ឯង ត្រូវមើលថែរក្សាកូនអោយបានល្អ កុំបណ្តោយអោយលេងទឹកបណ្តាលអោយលង់ទឹកស្លាប់ និងបានផ្តាំផ្ញើដល់បងប្អូនទាំងអស់ ជួយថែរក្សាលោកយាយចាស់ជរាគ្មានពឹងផងជួយយកអាសាគាត់ផងចាត់ទុកថាជាការធ្វើបុណ្យធ្វើទាន និងចេះជួយគ្នាក្នុងគ្នាក្រ៕

កម្ពុជាថ្មី
សៅគ្រី

ក្រសួងពាណិជ្ជកម្ម ជ្រើសរើសប្រធានក្រុមទីប្រឹក្សាថ្មី ដើម្បីពង្រឹងប្រសិទ្ធភាពការងារ ឆ្នាំ២០១៧

ភ្នំពេញ ៖ ក្រុមទីប្រឹក្សា និងជំនួយការរបស់ក្រសួងពាណិជ្ជកម្ម ដែលមានសមាជិកចំនួន ២០រូប បានជួបប្រជុំគ្នាជាលើកដំបូង ដើម្បីបោះឆ្នោតជ្រើសរើសថ្នាក់ដឹកនាំថ្មីរបស់ខ្លួន ដើម្បីពង្រឹងប្រសិទ្ធភាពការងាររបស់ក្រសួង ជាពិសេសធានាបាននូវការអនុវត្តគោលដៅសំខាន់ៗ និងផែនការសកម្មភាពសម្រាប់ឆ្នាំ ២០១៧ ឲ្យទទួលបានជោគជ័យ។

ក្រសួងបានឲ្យដឹងថា រសៀលថ្ងៃទី ១១ ខែមករា ឆ្នាំ២០១៧នេះ ក្រុមទីប្រឹក្សា និងជំនួយការរបស់ក្រសួងពាណិជ្ជកម្ម ដែលមានសមាជិកចំនួន ២០រូប បានជួបប្រជុំគ្នាជាលើកដំបូង ដើម្បីបោះឆ្នោតជ្រើសរើសថ្នាក់ដឹកនាំថ្មីរបស់ខ្លួន ក្រោមអធិបតីភាព លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម។

ក្រសួងបន្ថែមថា គោលបំណងសំខាន់នៃការបោះឆ្នោតជ្រើសរើសនេះ គឺដើម្បីពង្រឹងប្រសិទ្ធភាពការងាររបស់ក្រសួង ជាពិសេសធានាបាននូវការអនុវត្តគោលដៅសំខាន់ៗ និងផែនការសកម្មភាពសម្រាប់ឆ្នាំ ២០១៧ ឲ្យទទួលបានជោគជ័យ។ ជាលទ្ធផល បេក្ខជនដែលត្រូវបានអង្គប្រជុំផ្តល់សេចក្តីទុកចិត្ត និងបោះឆ្នោតឲ្យធ្វើជាប្រធាន គឺលោក វ៉ា រុតសាន ដែលជាមន្ត្រីជាន់ខ្ពស់ មានចំណេះដឹង និងបទពិសោធន៍យូរឆ្នាំខាងការងារកម្មសិទ្ធិបញ្ញា និងទំនាក់ទំនងពាណិជ្ជកម្មក្នុងប្រទេស និងអន្តរជាតិ។

នៅក្នុងឱកាសនោះ លោក ប៉ាន សូរស័ក្តិ បានអបអរសាទរចំពោះ លោក វ៉ា រុតសាន និងបានថ្លែងអំណរគុណដល់ទីប្រឹក្សា និងជំនួយការទាំងអស់ ដែលបានប្រឹងប្រែងបំពេញការងារជូនក្រសួងពាណិជ្ជកម្ម។ លោករដ្ឋមន្ត្រី ក៏បានផ្ដែផ្ដាំដល់ប្រធានទីប្រឹក្សាថ្មី ឲ្យបន្តដឹកនាំសមាជិកទាំងអស់ ដើម្បីបំពេញភារកិច្ចជូនក្រសួងប្រកបដោយស្មារតីយកចិត្តដាក់ និងការទទួលខុសត្រូវខ្ពស់៕

កម្ពុជាថ្មី
ឌួងវិរះជ័យ

រដ្ឋមន្ត្រីពាណិជ្ជកម្មអន្តរជាតិនៃប្រទេសកាណាដា សរសើរអាជ្ញាធរជាតិអប្សរា ដែលបំពេញបេសកកម្មអភិរក្សប្រាសាទអង្គរ ទទួលបានជោគជ័យ

(សៀមរាប)៖ នៅក្នុងជំនួបរវាងលោក សុខ សង្វារ អគ្គនាយករង និងជាតំណាងអគ្គនាយកអាជ្ញាធរជាតិអប្សរា ជាមួយលោក Michael Chan រដ្ឋមន្ត្រីពាណិជ្ជកិច្ចកម្មអន្តរជាតិ នៃរដ្ឋ Ontarioប្រទេសកាណាដា នៅថ្ងៃទី១១ ខែមករា ឆ្នាំ២០១៧នេះ លោក Michael Chan បានថ្លែងស្ងើចសរសើរចំពោះស្ថាដៃដូនតាខ្មែរ ដែលបានសាងសង់ ប្រាសាទយ៉ាងល្អឥតខ្ចោះ ជាពិសេសលោកពិតជាស្ងើចសរសើរចំពោះការខិតខំប្រឹងប្រែងរបស់អាជ្ញាធរជាតិអប្សរា ដែលបំពេញបេសកកម្មដ៏ធំធេង របស់ខ្លួន បានទទួលលទ្ធផលយ៉ាងជោគជ័យ។

លោកបានបញ្ជាក់ថា «មុនចេញដំណើរមក ប្រពន្ធខ្ញុំបានស្វែងរកក្នុងប្រព័ន្ធអ៊ីនធើណិតអំពីអង្គរ ហើយបានដឹងថាអង្គរពិតជាអស្ចារ្យណាស់ យើងបានដឹងថា ថ្មីៗនេះអង្គរបានក្លាយជាគោលដៅទស្សនាដ៏ល្អបំផុតលើលោកទៀតផង»។

លោក Michael Chan រដ្ឋមន្ត្រីពាណិជ្ជកិច្ចកម្មអន្តរជាតិនៃរដ្ឋ Ontario ប្រទេសកាណាដា បានមកបំពេញទស្សនកិច្ច និង ស្វែងយល់អំពីការងារគ្រប់គ្រងរមណីយដ្ឋានអង្គរ ពីសំណាក់មន្ត្រីជំនាញនៃអាជ្ញាធរជាតិអប្សរា នាថ្ងៃទី១១ ខែមករា ឆ្នាំ២០១៧ នៅទីស្នាក់ការអាជ្ញាធរជាតិអប្សរា។

នៅក្នុងឱកាសនោះដែរ លោក សុខ សង្វារ បានបញ្ជាក់ឲ្យដឹងអំពីភាពជោគជ័យ នៃការគ្រប់គ្រងរមណីយដ្ឋានអង្គររយៈពេល ជាង២០ឆ្នាំកន្លងមកនេះ របស់អាជ្ញាធរ ជាតិអប្សរា តាមរយៈយន្តការICC Angkor និងកិច្ចសហប្រតិបត្តិការយ៉ាងល្អពី សំណាក់ដៃគូជាតិ និងអន្តរជាតិជាច្រើនទៀត។ មិនត្រឹមតែជោគជ័យនៅអង្គរទេ យន្តការICC-Angkor ត្រូវបានបណ្តាប្រទេសជាច្រើនយកគំរូទៅអនុវត្តតាមទៀតផង។ ក្រៅពីនេះមន្ត្រីជំនាញ៤រូបផ្សេងទៀត ក៏បានធ្វើបទបង្ហាញជូនឯកឧត្តមរដ្ឋមន្ត្រី អំពីកិច្ចការអភិរក្សជួសជុលប្រាសាទ ក្នុងរមណីយដ្ឋានអង្គរ ការអភិវឌ្ឍនិងគ្រប់គ្រងទេសចរណ៍អង្គរ ការអភិវឌ្ឍន៍សហគមន៍ក្នុងរមណីយដ្ឋានអង្គរ និងការគ្រប់គ្រងបរិស្ថានក្នុងរមណីយដ្ឋានអង្គរ។

ជាមួយគ្នានោះដែរ លោក សុខ សង្វារ ក៏បានបង្ហាញជូនគណៈប្រតិភូកាណាដាអំពីការវិវត្តសំខាន់ៗដែលពាក់ព័ន្ធនឹងការរៀបចំ គ្រប់គ្រង រមណីយដ្ឋានអង្គរ។ លោកបានបន្តថា ចាប់ពីអង្គរត្រូវបានដាក់ចូលក្នុងបញ្ជីបេតិកភណ្ឌពិភពលោក ក្នុងឆ្នាំ១៩៩២ មក តាមរយៈឆន្ទៈនយោបាយរបស់រាជរដ្ឋាភិបាលកម្ពុជា ការគ្រប់គ្រងអង្គរត្រូវបានរៀបចំឡើងយ៉ាងយកចិត្តទុកដាក់បំផុត ជាក់ស្តែង ការរៀបចំគណៈកម្មាធិការអន្តរជាតិICC-Angkor ក្នុងឆ្នាំ១៩៩៣ ការកំណត់តំបន់ការពារក្នុងឆ្នាំ១៩៩៤ ការបង្កើតអាជ្ញាធរជាតិអប្សរាក្នុងឆ្នាំ១៩៩៥ ការបង្កើតច្បាប់ស្តីពីការគ្រប់គ្រងបេតិកភណ្ឌក្នុងឆ្នាំ១៩៩៦ គោលនយោបាយបើកលំហជើងមេឃឆ្នាំ១៩៩៧យុទ្ធសាស្ត្រឈ្នះៗដែលបានបញ្ចប់សង្គ្រាមផ្ទៃក្នុងទាំងស្រុងក្នុងឆ្នាំ១៩៩៨។ កត្តាទាំងនេះហើយ ដែលជំរុញឲ្យអង្គរត្រូវបានដកចេញពីបញ្ជីបេតិកភណ្ឌប្រឈមនឹងគ្រោះថ្នាក់ឆ្នាំ២០០៤៕

Fresh News

NBC ដាក់ឲ្យដេញថ្លៃសាច់ប្រាក់ ៤០ពាន់លានរៀលលើកទី៤

ភ្នំពេញ៖ ធនាគារជាតិនៃកម្ពុជា (NBC) ប្រកាសដាក់ឲ្យដេញថ្លៃសាច់ប្រាក់ ៤០ពាន់លានរៀល (ជិត១០លានដុល្លារ) លើកទី៤ សម្រាប់គ្រឹះស្ថានធនាគារ និងមីក្រូហិរញ្ញវត្ថុ ដែលមានតម្រូវការប្រាក់រៀលនៅក្នុងចរន្តឥណទានរបស់ខ្លួន។ នេះបើតាមសេចក្ដីជូនដំណឹងរបស់ NBC នៅថ្ងៃទី១០ខែមករា។

NBC នឹងដាក់ឲ្យដេញថ្លៃប្រាក់រៀលលើកទី៤នេះ នៅថ្ងៃទី១៧ខែមករាឆ្នាំនេះ។ ការដេញថ្លៃនេះ គឺស្ថិតក្នុងប្រតិបត្តិការផ្ដល់សន្ទនីយភាពដោយមានការធានា (LPCO) ដែលត្រូវបាន NBC ដាក់ឲ្យអនុវត្តចាប់តាំងពីខែតុលាឆ្នាំ២០១៦ មក ដើម្បីបង្កើនការប្រើប្រាស់ប្រាក់រៀល និងផ្ដល់កម្ចីប្រាក់រៀលជាមួយអត្រាការប្រាក់សមរម្យ។ តាមរយៈប្រតិបត្តិការនេះ NBC នឹងផ្ដល់ទុនបង្វិលជាប្រាក់រៀល ដល់គ្រឹះស្ថានហិរញ្ញវត្ថុជាមួយអត្រាការប្រាក់ក្នុងកម្រិតណាមួយ។

គួរបញ្ជាក់ថា ការដេញថ្លៃប្រាក់រៀលរបស់ NBC នេះ គឺប្រព្រឹត្តទៅជារៀងរាល់ខែ។ សាច់ប្រាក់ដាក់ឲ្យដេញថ្លៃ ៣លើកមុននេះ គឺមានទំហំ ៤០ពាន់លានរៀលដូចគ្នា។ ហើយទឹកប្រាក់ដេញថ្លៃបានសរុបក្នុងលើកមុនៗ មិនលើសពី ១២ពាន់លានរៀលនោះទេ ជាមួយនឹងអត្រាការប្រាក់ ៣ភាគរយក្នុង១ឆ្នាំ។

ថ្មីៗ
អត្ថបទ : ញ៉ុង ហេង

សាលាបឋមសិក្សា៣នៅសៀមរាប ចាប់ផ្តើម«រៀនពេញមួយថ្ងៃ» ក្នុងគម្រោងសាកល្បង

សាលាបឋមសិក្សាចំនួន៣នៅក្នុងស្រុកអង្គរធំនៃខេត្តសៀមរាប បានចាប់ផ្តើមកម្មវិធីសិក្សាពេញមួយថ្ងៃ ដែលនេះគឺជាគម្រោងសាកល្បងរបស់ក្រសួងអប់រំចាប់ពីខែមករានេះទៅ។ សាលាបឋមសិក្សា ដូនឪ, ត្រពាំងស្វាយ និងគោកគ្រើល ត្រូវបានជ្រើសរើសដោយក្រសួងអប់រំ ដើម្បីអនុវត្តសាកល្បងនូវកម្មវិធី «សាលារៀនជំនាន់ថ្មី» ដែលតម្រូវឲ្យសិស្សានុសិស្សទាំងអស់សិក្សាពេញមួយថ្ងៃនៅសាលារៀន ដោយបរិភោគអាហារថ្ងៃត្រង់នៅសាលារៀនតែម្តង។

លោក រស់ សាលីន អ្នកនាំពាក្យនៃក្រសួងអប់រំបានបញ្ជាក់ប្រាប់សារព័ត៌មានថ្មីៗថា គម្រោងសាកល្បងដែលបន្ថែមម៉ោងរៀន និងម៉ោងបង្រៀននេះ គឺជាការអនុវត្តផែនការយុទ្ធសាស្ត្រ និងឯកសារទស្សនទានរបស់ក្រសួងអប់រំ ដែលស្របទៅនឹងយុទ្ធសាស្ត្រជាតិក្នុងការបង្កើនគុណភាពធនធានមនុស្ស។

មន្ត្រីជាន់ខ្ពស់នៃក្រសួងអប់រំដដែលបានបន្យល់បន្ថែមយ៉ាងដូច្នេះថា៖«ក្រសួងអប់រំចាប់ផ្តើមអនុវត្តគម្រោងសាកល្បងដោយបន្ថែមការរៀន និងការបង្រៀនពេញមួយថ្ងៃ និងផ្តល់អាហារថ្ងៃត្រង់ដែលមានកម្រិតស្តង់ដារមួយស្មើនឹងប្រទេសក្នុងតំបន់ទៅដល់សិស្សានុសិស្ស។ គម្រោងនេះជាផ្នែកមួយនៃការបង្កើនគុណភាពសិស្សថ្នាក់បឋមសិក្សា»។

គម្រោងសាកល្បងនេះមានរយៈពេល៣ឆ្នាំដោយទទួលបានការឧបត្ថម្ភពីធនាគារពិភពលោក និងកម្មវិធីស្បៀងអាហារពិភពលោក។

«សម្រាប់អនុវត្តគម្រោងនេះ យើងចំណាយជាង១០ម៉ឺនដុល្លារក្នុងមួយឆ្នាំ។ ថវិកាទាំងនោះត្រូវចំណាយទៅលើការឧបត្ថម្ភគ្រូបង្រៀន ការបំប៉នបច្ចេកទេស ការងារពិនិត្យតាមដានគម្រោងនេះ និងការចំណាយលើអាហារថ្ងៃត្រង់ ជាដើម»។ នេះជាការអត្ថាធិប្បាយរបស់លោក រស់ សាលីន។

ក្រសួងអប់រំកំពុងធ្វើការងារជាច្រើនដើម្បីកែទម្រង់ប្រព័ន្ធអប់រំ ដែលត្រូវបានរិះគន់តាំងពីយូរឆ្នាំមកហើយថា «នៅខ្សោយ» ។ ប៉ុន្តែប៉ុន្មានឆ្នាំចុងក្រោយនេះ ក្រសួងអប់រំបានធ្វើយុទ្ធនាការចាំបាច់ជាច្រើនដែរដើម្បីបង្កើនការចូលរៀនរវាងសិស្សស្រី និងសិស្សប្រុសឲ្យច្រើនដូចគ្នា និងពិសេសការចុះឈ្មោះចូលរៀននៅថ្នាក់បឋមសិក្សាដោយឥតគិតថ្លៃជាដើម។

យោងតាមរបាយការណ៍របស់របស់ក្រសួងអប់រំ កុមារអាយុ ៦ឆ្នាំ ឬ៧០ខែ ចំនួន២៧.៥១៤៨នាក់ បានចុះឈ្មោះចូលរៀននៅក្នុងឆ្នាំសិក្សាកន្លងទៅ ដែលធ្វើឲ្យភាគរយនៃការចុះឈ្មោះចូលរៀននៃកុមារកម្ពុជាកើនដល់៩៩,៤ ភាគរយ៕

ថ្មីៗ
អត្ថបទ : លាង ដឺលុច

លោក ឡុង ឌីម៉ង់៖ ទឹកប្រាក់ជាង៥០០លានដុល្លារ ត្រូវបានផ្ញើមកស្រុក តាមរយៈពលករខ្មែរធ្វើការនៅកូរ៉េក្នុងឆ្នាំ២០១៦

(កូរ៉េខាងត្បូង)៖ លោក ឡុង ឌីម៉ង់ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានថ្លែងថា នៅក្នុងឆ្នាំ២០១៦កន្លងទៅនេះ ទឹកប្រាក់មានរហូតជាង៥០០លានដុល្លារ ត្រូវបានផ្ញើមកស្រុក តាមរយៈពលករខ្មែរដែលកំពុងបម្រើការងារនៅកូរ៉េខាងត្បូង។

នៅថ្ងៃទី១០ ខែមករា ឆ្នាំ២០១៧ ក្រុមការងារស្ថានទូតកម្ពុជា ប្រចាំនៅសាធារណរដ្ឋកូរ៉េ ដឹកនាំដោយលោក ឡុង ឌីម៉ង់ ឯកអគ្គរាជទូត បានចុះសួរសុខទុក្ខ និងស្វាគមន៍ បងប្អូនពលករកម្ពុជាចំនួន៤៣នាក់ ផ្នែកឧស្សាហកម្ម ដែលទើបមកដល់សាធារណរដ្ឋកូរ៉េ ហើយកំពុងចូលរួមវគ្គបណ្ដុះបណ្ដាលរយៈពេល៣ថ្ងៃ នៅវិទ្យាស្ថាន Ansung ខេត្តGyeonggi នៃសាធារណរដ្ឋប្រជាធិបតេយ្យកូរ៉េ មុននឹងចេញទៅបម្រើការងារនៅតាមរោងចក្រ។

ជាមួយគ្នានោះ លោក ឡុង ឌីម៉ង់ និងក្រុមការងារ ក៏បានជួបពិភាក្សាការងារជាមួយនឹង លោក Kim Yong Boo នាយកផ្នែកបណ្ដុះបណ្ដាលពលករបរទេស នៃវិទ្យាស្ថាន Ansung និងសហការី។

លើកឡើងក្នុងកិច្ចប្រជុំនោះ លោកឯកអគ្គរាជទូត បានចាត់ទុកថាការបញ្ជូនពលករពីកម្ពុជា មកបម្រើការងារគីមានសារសំខាន់ណាស់សម្រាប់ការអភិវឌ្ឍន៍ប្រទេសទាំងពីរ និងការអភិវឌ្ឍន៍ធនធានមនុស្សរបស់កម្ពុជា។ «ជាក់ស្ដែង នៅក្នុងឆ្នាំ២០១៦ ទឹកប្រាក់ប្រមាណជាង៥០០លានដុល្លា បានហូរចូលកម្ពុជា តាមរយៈបងប្អូនពលករខ្មែរ ដែលបម្រើការងារនៅសាធារណរដ្ឋកូរ៉េ ផ្ញើជូនទៅក្រុមគ្រួសារ»។

បន្ថែមពីលើនេះ លោកបានចាត់ទុកថា សាធារណរដ្ឋកូរ៉េ គឺជាសាលាដ៏ធំមួយ ដែលបានបណ្ដុះបណ្ដាលវិជ្ជាជីវៈបច្ចេកទេស ដល់ពលករកម្ពុជាប្រមានជាង៥ម៉ឺននាក់ ដែលកម្ពុជាកំពុងមានតម្រូវការពលករជំនាញបែបនេះ។

ឆ្លៀតក្នុងឱកាសនោះលោក ឡុង ឌីម៉ង់ និងក្រុមការងារ បានបន្ដអប់រំផ្សព្វផ្សាយពីការថែរក្សាសុខភាព សុវត្ថិភាព ក្នុងការរស់នៅ និងធ្វើការនៅសាធារណរដ្ឋកូរ៉េ ការផ្ដល់សេវាសាធារណៈរបស់ស្ថានទូត និងការរៀបចំទុកដាក់សន្សំថវិការ ជូនបងប្អូនពលករដែលទើបនឹងមកដល់សាធារណរដ្ឋកូរ៉េ៕

Fresh News

សម្តេចតេជោ ហ៊ុន សែនៈ ការសម្ពោធអគារទីស្នាក់ការត្រួតពិនិត្យច្រកទ្វារព្រំដែនអន្តរជាតិត្រពាំងក្រៀល ដើម្បីពង្រឹងពង្រីកទំនាក់ទំនងរវាង កម្ពុជា ឡាវ

ភ្នំពេញ: សម្តេចនាយករដ្ឋមន្ត្រី ហ៊ុន សែន និងលោក ថងលូន ស៊ីស៊ូលីត នាយករដ្ឋមន្ត្រីឡាវ អញ្ជើញធ្វើជាអធិបតីរួមគ្នា ក្នុងពិធីសម្ពោធដាក់ ឲ្យប្រើប្រាស់ជាផ្លូវការ នូវអគារទីស្នាក់ការ ត្រួតពិនិត្យច្រកទ្វារព្រំដែន អន្តរជាតិរវាងកម្ពុជា (ត្រពាំងក្រៀល-ខេត្តស្ទឹងត្រែង) និងឡាវ (ច្រកណងណុកខៀន-ខេត្តចម្ប៉ាសាក់) នៅថ្ងៃទី១០ ខែមករា ឆ្នាំ២០១៧ នេះ។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងលោក ថងលូន ស៊ីស៊ូលីត នាយករដ្ឋមន្ត្រីឡាវ ថ្លែងសន្ទរកថា ក្នុងពិធីសម្ពោធ បន្ទាប់មក បានអញ្ជើញកាត់ខ្សែបូរ ដើម្បីដាក់ឲ្យប្រើប្រាស់ ជាផ្លូវការនូវអគារ ទីស្នាក់ការត្រួតពិនិត្យនេះ។

បន្ទាប់ពីពិធីសម្ពោធសម្តេចតេជោ ហ៊ុន សែន អញ្ជើញទៅទស្សនា ទំនប់វារីអគ្គិសនី ដនសាហុង ដែលមានទីតាំង នៅក្នុងខេត្តចម្ប៉ាសាក់។

ការបើកឲ្យប្រើប្រាស់ ច្រកទ្វារត្រួតពិនិត្យព្រំដែន ជាមួយសាធារណរដ្ឋ ប្រជាធិបតេយ្យ ប្រជាមានិតឡាវ ថ្មីនេះ បង្ហាញពីការរីកចំរើនថ្មីមួយ ក្នុងទំនាក់ទំនងទ្វេភាគី រវាងប្រទេសទាំងពីរ។ ការបើកឲ្យប្រើប្រាស់នេះ ក៏នឹងឆ្លើយតបផងដែរ ចំពោះតម្រូវការពង្រឹង ចំណងមិត្តភាព និងកិច្ចសហប្រតិបត្តិការ ព្រមទាំងជួយសម្រួល បន្ថែមទៀត ដល់ពាណិជ្ជកម្ម តាមព្រំដែន ទេសចរណ៍ និងការតភា្ជប់ រវាងប្រទេសទាំងពីរ។

សម្តេចតេជោ ហ៊ុន សែន បានមានប្រសាសន៍ថា រាជរដ្ឋាភិបាល និងប្រជាជនកម្ពុជា សូមធ្វើការវាយតម្លៃខ្ពស់ និងមានការពេញចិត្ត ពេញថ្លើម ចំពោះការរីកចំរើន ឥតឈប់ឈរ នៅទំនាក់ទំនងជាមិត្តភាព និងសហប្រតិបត្តិការ ប្រកបដោយផ្លែផ្កា លើគ្រប់វិស័យ រវាងប្រទេសទាំងពីរ កម្ពុជា ឡាវ ដែលជាប្រទេសភូមិផង របងតែមួយ មានប្រពៃណី សហការជួយឧបត្ថម្ភ គាំទ្រគ្នាទៅវិញទៅមក ប្រកបដោយភាពស្មោះសរ។

សម្តេចនាយករដ្ឋមន្ត្រី ហ៊ុន សែន បានថ្លែងថា កិច្ចសហការរៀបចំរួមគ្នា នូវពិធីសម្ពោធដាក់ ឲ្យប្រើប្រាស់នូវ អគារទីស្នាក់ការត្រួតពិនិត្យ ច្រកទ្វារព្រំដែនអន្តរជាតិ រវាងកម្ពុជា (ច្រកត្រពាំងក្រៀល-ខេត្តស្ទឹងត្រែង) និងឡាវ (ច្រកណងណុកខៀន-ខេត្តចម្ប៉ាសាក់) គឺជាសមទ្ធិផលថ្មី មួយទៀត ដើម្បីពង្រឹងពង្រីក ទំនាក់ទំនង រវាងប្រទេសទាំងពីរ កម្ពុជា ឡាវ។
អគារទីស្នាក់ការត្រួតពិនិត្យ ច្រកទ្វារព្រំដែនអន្តរជាតិនេះ បានតភ្ជាប់ទៅវិញទៅមក រវាងផ្លូវជាតិលេខ៧ របស់កម្ពុជា ជាមួយផ្លូវជាតិលេខ១៣ របស់ឡាវ ដែលជាច្រករបៀង ដឹកជញ្ជូនផ្លូវគោក ដ៏មានសក្តានុពល ក្នុងការតភ្ជាប់ ប្រទេសទាំងពីរ និងជាបណ្តាញគមនាគមន៍ តភ្ជាប់ រវាងកម្ពុជា ឡាវ វៀតណាម ព្រមទាំងបណ្តាប្រទេស នៅក្នុងតំបន់មេគង្គផងដែរ។

ការអភិវឌ្ឍន៍បណ្តាញ គមនាគមន៍តភ្ជាប់ រវាងប្រទេសទាំងពីរ ព្រមជាមួយនឹងការអភិវឌ្ឍន៍ ហេដ្ឋារចនាសម្ព័ន្ធ ត្រួតពិនិត្យការចេញ ចូល ឆ្លងកាត់ព្រំដែន ប្រកបដោយភាពងាយស្រួល គឺពិតជាបានចូលរួមបង្កើន ទំហំពាណិជ្ជកម្ម ការវិនិយោគ និងការដឹកជញ្ជូន ឆ្លងកាត់ព្រំដែន ការបង្កើនលំហូរ ភ្ញៀវទេសចរណ៍ រវាងប្រទេសទាំងពីរ ក៏ដូចជា ប្រទេសទី៣ ឆ្លងកាត់ព្រំដែន ព្រមទាំងជួយសម្រួល ដល់ការផ្លាស់ប្តូរ ទំនិញកសិផល ការបង្កើនទំនាក់ទំនង ផ្សាភ្ជាប់គ្នា រវាងប្រជាពលរដ្ឋ នៅតំបន់ព្រំដែន នៃប្រទេសទាំងពីរ ស្របតាមឆន្ទៈ និងការប្តេជ្ញាចិត្ត របស់ថ្នាក់ដឹកនាំ និងប្រជាជននៃ ប្រទេសទាំងពីរ កម្ពុជា ឡាវ៕

CEN
ដោយ: មុនីរាជ

ថ្នាក់ដឹកនាំក្រសួងបរិស្ថាន, អង្គការ CI និងក្រុមហ៊ុន Mitsui បានចុះកិច្ចព្រមព្រៀងលើគម្រោងរេដបូករយៈពេល៣ឆ្នាំ ដើម្បីអនុវត្តនៅដែនជម្រកសត្វព្រៃ ព្រៃឡង់

(ភ្នំពេញ)៖ លោក អ៊ាង សុផល្លែត អនុរដ្ឋលេខាធិការក្រសួងបរិស្ថាន បានចុះហត្ថលេខាលើកិច្ចព្រមព្រៀង សម្រាប់ការរៀបចំគម្រោងរេដបូកក្នុងដែនជម្រកសត្វព្រៃ ព្រៃឡង់ ជាមួយតំណាងក្រុមហ៊ុនជប៉ុន Mitsui និងអង្គការអភិរក្សអន្តរជាតិ (CI) ក្នុងក្របខណ្ឌយន្តការឥណទានកាបូនរួមគ្នា (JCM) នៅថ្ងៃទី៩ ខែមករា ឆ្នាំ២០១៧នេះ នៅទីស្តីការក្រសួងបរិស្ថាន ក្រោមអធិបតីភាពលោក សាយ សំអាល់ រដ្ឋមន្ត្រីក្រសួងបរិស្ថាន។

កិច្ចព្រមព្រៀងនេះគឺជាក្របខណ្ឌសហប្រតិបត្តិការរវាងក្រសួងបរិស្ថាន អង្គការ CI និងក្រុមហ៊ុន Mitsui ក្នុងការសិក្សា រៀបចំរួមគ្នា នូវគម្រោងរេដបូកក្នុងរយៈពេលបីឆ្នាំខាងមុខ ដើម្បីអនុវត្តនៅក្នុងដែនជម្រកសត្វព្រៃ-ព្រៃឡង់។ នៅក្នុងដំណាក់កាលនេះ ក៏មានការគាំទ្រផ្នែកបច្ចេកទេសនិងហិរញ្ញវត្ថុដល់ការអនុវត្តការការពារនិងអភិរក្សព្រៃឈើ និងការលើកកម្ពស់ជីវភាពសហគមន៍នៅក្នុងភូមិសាស្ត្រខេត្តស្ទឹងត្រែងក្នុងចំណោមខេត្តទាំងបួនគ្របដណ្តប់តំបន់ព្រៃឡង់។

សូមបញ្ជាក់ថា គម្រោងរេដបូកដែលនឹងត្រូវចាប់ផ្តើមរៀបចំនាពេលនេះ មានគោលបំណងបង្កើតយន្តការហិរញ្ញវត្ថុ និរន្តរភាព សម្រាប់ការពារ និងអភិរក្សធនធានធម្មជាតិ ជាពិសេសដែនជម្រកសត្វព្រៃ ព្រៃឡង់ ឱ្យកាន់តែមានប្រសិទ្ធភាព រួមទាំងជួយដល់ការកែលម្អជីវភាពរស់នៅរបស់ប្រជាសហគមន៍មូលដ្ឋាននៅក្នុងតំបន់ការពារធម្មជាតិដ៏មានសារ:សំខាន់នេះផងដែរ។ម្យ៉ាងទៀតគម្រោងនេះនឹងចូលរួមក្នុងការកាត់បន្ថយឥទ្ធិពលនៃការប្រែប្រួលអាកាសក្នុងអនុសញ្ញាក្របខណ្ឌសហប្រជាជាតិស្តីពីការប្រែប្រួលអាកាសធាតុ (UNFCCC)។

បច្ចុប្បន្ននេះ ក្រសួងបរិស្ថានបានកំពុងសហការជាមួយអង្គការ WCS និងក្រុមហ៊ុន Disney ក្នុងការអនុវត្តគម្រោងរេដបូក ក្រោមរូបភាពទីផ្សារស្ម័គ្រចិត្តនៅក្នុងដែនជម្រកសត្វព្រៃកែវសីម៉ា ហើយក៏កំពុងសហការជាមួយអង្គការ Wildlife Alliance ក្នុងការរៀបចំគម្រោងប្រភេទនេះសម្រាប់អនុវត្តនៅក្នុងឧទ្យានជាតិ ជួរភ្នំក្រវ៉ាញ ភាគខាងត្បូងផងដែរ៕

Fresh News

មន្ទីរពេទ្យបង្អែកខេត្តសៀមរាប បានចុះកិច្ចព្រមព្រៀងសហប្រតិបត្តិការ ជាមួយសាកលវិទ្យាល័យ EWHA កូរ៉េ

(សៀមរាប)៖ ពិធីចុះកិច្ចព្រមព្រៀងសហប្រតិបត្តិការ រវាងមន្ទីរពេទ្យបង្អែកខេត្តសៀមរាប ជាមួយនិងសាកលវិទ្យាល័យ នៃមជ្ឈមណ្ឌលវេជ្ជសាស្ត្រស្ត្រី អេវ៉ា (EWHA WOMANS MEDICAL CENTER) នៃក្រុងសេអ៊ូល របស់សាធារណរដ្ឋកូរ៉េ បានរៀបចំនៅរសៀលថ្ងៃទី០៩ ខែមករា ឆ្នាំ២០១៧នេះ នៅឯមន្ទីរពេទ្យបង្អែកខេត្តសៀមរាប ក្នុងគោលបំណងដើម្បីការផ្លាស់ប្ដូរនូវបទពិសោធន៍គ្នាទៅវិញទៅមកខាងជំនាញវេជ្ជសាស្ត្រ, ការផ្លាស់ប្ដូរការងារអ្នកស្ម័គ្រចិត្តខាងវេជ្ជសាស្ត្រ និងការបញ្ជូនអ្នកជម្ងឺ រវាងគ្នាទៅវិញទៅមក ពិសេសខាងកម្ពុជា ឱ្យទៅព្យាបាលនៅកូរ៉េ។

ពិធីនេះ គឺខាងភាគីកម្ពុជា ស្ថិតក្នុងវត្តមានរបស់លោកវេជ្ជបណ្ឌិត ក្រុស សារ៉ាត់ ប្រធានមន្ត្រីសុខាភិបាលខេត្តសៀមរាប និងលោកវេជ្ជបណ្ឌិត ប៉ែន ផលគុណ ប្រធានមន្ទីរពេទ្យបង្អែកខេត្តសៀមរាប រួមនិងមន្ត្រីជំនាញ ផងដែរ ។ ចំណែកឯខាងភាគីកូរ៉េ គឺមានវត្តមានរបស់លោក ថាក សឿងឃ្យូ អគ្គកុងស៊ុល នៃសាធារណរដ្ឋកូរ៉េ ប្រចាំខេត្តសៀមរាប និងលោកវេជ្ជបណ្ឌិត សាស្ត្រាចារ្យ ខ្វាន ចាង គីម នៃមន្ទីរវះកាត់បេះដូង និងសរសៃឈាមបេះដូង នៃសាកលវិទ្យាល័យ អេវ៉ា តំណាងឱ្យលោកវេជ្ជបណ្ឌិត គីម សឿង ចុល នាយកសាកលវិទ្យាល័យ អេវ៉ា រួមជាមួយនិងក្រុមការងាររបស់សាកលវិទ្យាល័យ អេវ៉ា មួយចំនួនទៀតផងដែរ។

លោកវេជ្ជបណ្ឌិត ប៉ែន ផលគុណ បានថ្លែងឱ្យអ្នកសារព័ត៌មានដឹងថា ការចុះកិច្ចព្រមព្រៀងនេះ គឺជាការផ្ដួចផ្ដើមគំនិតដោយលោក អគ្គកុងស៊ុល នៃសាធារណរដ្ឋកូរ៉េ ប្រចាំខេត្តសៀមរាប ក្នុងគោលបំណងដើម្បីមានការវិវឌ្ឍន៍នូវសេវាសុខាភិបាលឱ្យមានរីកចម្រើនសម្រាប់មន្ទីរពេទ្យបង្អែកខេត្តសៀមរាប និងការពង្រឹងនូវចំណងមិត្តភាព សហប្រតិបត្តិការ រវាង ប្រទេសនិងប្រជាជនកូរ៉េ ជាមួយនិងកម្ពុជា ពិសេសនៅខេត្តសៀមរាប យើងនេះ។

លោកបានបញ្ជាក់ថា ៖ ការចុះកិច្ចព្រមព្រៀងនេះ គឺមានខ្លឹមសារសំខាន់ចំនួន ៣ គឺ ៖ ទី១) គឺធ្វើឱ្យការអភិវឌ្ឍន៍ និងមានវឌ្ឍនភាព នូវសេវាសុខាភិបាល គឺសំដៅលើគុណភាពសេវា និងសមត្ថភាព នៃវិស័យសុខាភិបាល រវាងភាគីទាំងសង្ខាង ពិសេសគឺខាងភាគីកម្ពុជាយើង។ ទី២) គឺដើម្បីរឹតចំណងសាមគ្គីភាព តាមរយៈមានការផ្លាស់ប្ដូរអ្នកស្ម័គ្រចិត្ត រវាងគ្នាទៅវិញទៅមក ដោយមានការទទួលយកអ្នកស្ម័គ្រចិត្ត ជាគ្រួពេទ្យខាងផ្នែកឯកទេស ខាងភាគីកូរ៉េ មកសហការ ផ្លាស់ប្ដូរ ចែករំលែកបទពិសោធន៍ ដល់ក្រុមគ្រូពេទ្យកម្ពុជា។ ទី៣) គឺការបញ្ជូនអ្នកជម្ងឺ ឱ្យទៅព្យាបាលនៅសាកលវិទ្យាល័យ អេវ៉ា នៅពេលដែលខាងភាគីកម្ពុជាយើង អស់លទ្ធភាពក្នុងការព្យាបាល ពិសេសក្នុងករណីធ្ងន់ធ្ងរ ដូចជាជម្ងឺមហារីក ការវះកាត់ធំៗ ដូចជា ការវះកាត់បេះដូង ជាដើមនោះ។

លោកវេជ្ជបណ្ឌិតបញ្ជាក់ថា៖ ភាគីទាំងពីរ នឹងធ្វើផែនការរួមគ្នា ដើម្បីពិនិត្យមើលថាតើយើង នឹងចាប់ផ្ដើមនូវសកម្មភាពអ្វីខ្លះ ដើម្បីឱ្យបានសម្រេចនូវគោលបំណងទាំងបីខាងលើនេះ។ នៅក្នុងពិធីនារសៀលនេះ ខាងភាគីកូរ៉េ បានប្រគល់ជូននូវឱសថ និងបរិក្ខាពេទ្យ មួយចំនួន ផងដែរ ដល់ខាងមន្ទីរពេទ្យបង្អែកខេត្តសៀមរាប សម្រាប់ប្រើប្រាស់ ពិសេសសម្រាប់ពេលធ្វើការវះកាត់ព្យាបាលអ្នកជម្ងឺ៕

Fresh News

ម៉្សៅទឹកដោះគោដ៏ល្បី របស់អូស្ត្រាលី ម៉ាក ROYAL AUSNZ ទទួលបានការគាំទ្រខ្ពស់លើទីផ្សារកម្ពុជា

(ភ្នំពេញ)៖ ROYAL AUSNZ ជាម៉្សៅទឹកដោះគោសរីរាង្គ ដែលផលិតនៅប្រទេសអូស្ត្រាលី តាមបែបធម្មជាតិ ដែលទទួលបានសិទ្ធិនាំចូល និងចែកចាយផ្តាច់មុខដោយក្រុមហ៊ុន Beautex Cambodia Co., Ltd ដោយមានលិខិតអនុញ្ញាតិ ពីក្រសួងសុខាភិបាលលេខ ០២៧អបស/ឪអបស ចុះថ្ងៃទី២២ មករា ឆ្នាំ២០១៥ បានទទួលការគាំទ្រខ្ពស់ ពីសំណាក់អតិថិជន ទូទាំងប្រទេស។

ម៉្សៅទឹកដោះគោ ROYAL AUSNZ ផ្សំពីសារធាតុដែលសំបូរទៅដោយវិតាមីន ជំនួយដល់ការលូតលាស់ខួរក្បាល និងរាង្គកាយរបស់កុមារ ជួយបំប៉នភ្នែក ឆ្អឹង និង មុខងារថ្លើម និងប្រព័ន្ធប្រសាទ ព្រមទំាងការពារប្រឆំាងនឹងជំងឺមហារីក ពិសេសមានសារៈសំខាន់ សម្រាប់បង្កើនប្រសិទិ្ធភាព ប្រព័ន្ធរំលាយអាហារ (ពោះវៀន) និងជួយកុមារមិនឲ្យក្តៀន និងមានទម្ងន់តាមស្តង់ដារ។

កាលពីចុងសប្ដាហ៍នេះ ក្រុមហ៊ុន Beautex Cambodia ក៏បានរៀបចំកម្មវិធីជួបជុំអ្នកចែកចាយ ROYAL AUSNZ ទូទាំងប្រទេស ដែលបានធ្វើឡើងនៅសណ្ឋាគារ ហ៊ីម៉ាវ៉ារី ដើម្បីជាការថ្លែងអំណរគុណដល់ការគាំទ្រ របស់ក្រុមហ៊ុន ចំពោះអតិថិជន និងអ្នកចែកចាយទាំងអស់ ហើយក៏ផ្តល់ទំនុកចិត្តបន្ថែម លើគុណភាពផលិតផលរបស់ Royal Ausnz ដែលធ្វើបទបង្ហាញពីអ្នកតំណាងរោងចក្រផលិតម៉្សៅទឹកដោះគោ ពីប្រទេសអូស្រ្តាលី ពីអាហាររូបត្ថម្ភ របស់អ្នកម្តាយ និងទារក ដោយសាស្រ្តចារ្យវេជ្ជបណ្ឌិត ឯក ម៉េងលី ដែលជាអ្នកឯកទេសផ្នែកសម្ភព និងរោគស្រ្តី ប្រចាំគ្លីនិកលុច្ស ដើម្បីទុកជាចំណេះដឹង ផ្នែកសុខភាព ដល់សារធារណជនផងដែរ។

គួរបញ្ជាក់ថា ម៉្សៅទឹកដោះគោ ROYAL AUSNZ ផលិតពីទឹកដោះគោស្រស់ តាមបទដ្ឋានចំណីអាហារ និងការត្រួតពិនិត្យយ៉ាងតឹងរឹង មុននឹងអនុញ្ញាត ឲ្យចែកចាយនៅលើទីផ្សារ ហើយ ROYAL AUSNZ មានកសិដ្ឋានចិញ្ចឹមគោផ្ទាល់នៅរដ្ឋ Victoria ប្រទេសអូស្រ្តាលី កសិដ្ឋានផ្ទាល់នេះ អនុញ្ញាតឲ្យក្រុមហ៊ុនផលិតម៉្សៅទឹកដោះគោ ដែលស្រស់តាមបែបធម្មជាតិ ដោយចំណាយពេលត្រឹមតែ២០នាទីប៉ុណ្ណោះ ក្នុងការដឹកជញ្ជូនទឹកដោះគោស្រស់ ពីកសិដ្ឋានទៅរោងចក្រចំរាញ់ទឹកដោះ និងរយៈពេលតែ១២ម៉ោងប៉ុណ្ណោះ ក្នុងការបំលែង ពីទឹកដោះគោស្រស់ ទៅជាម៉្សៅទឹកដោះគោ។ ពិសេស ម៉្សៅទឹកដោះគោនេះ មិនមានសារធាតុគីមីសម្រាប់ទុកបានយូរ (No Preservatives) មិនមានសារធាតុគីមីបំលែងពណ៌ (No Artificial Color) មិនមានបន្ថែមរសជាតិ (No Synthetic Flavor) និងមិនបានឆ្លងកាត់ការបំលែង ហ្សែន GMO (GMO FREE)។

ដោយសារលក្ខណៈពិសេសទាំងអស់នេះហើយ ទើបម៉្សៅទឹកដោះគោ Royal Ausnz បានទទួលមេដាយប្រាក់ ៣ឆ្នាំជាប់គ្នា 2014-2015-2016 ពីប្រទេសអូស្ត្រាលីលើគុណភាព និងអត្ថប្រយោជន៍ចំពោះសុខភាព ដែលជំរុញ ដល់ការលូតលាស់របស់ទារក និងកុមារ។ ម៉្សៅទឹកដោះគោ Royal Ausnz ក៏ត្រូវបានទទួលស្គាល់ពីសំណាក់ សមាគមន៏ចំណីអាហារអ៊ីស្លាម ដែលមានន័យថា វាមិនមានសារធាតុខ្លាញ់ជ្រូក ដែលប៉ះពាល់ដល់ការប្រើប្រាស់ របស់បងប្អូនអ៊ីស្លាមទាំងអស់ផងដែរ។

ព័ត៌មានបន្ថែម សូមទំនាក់ទំនងលេខទំនាក់ទំនង៖ 016 9000 11 / 012 742 000,វេបសាយ៖ www.gotop.com.au/, ហ្វេសប៊ុក: Royal Ausnz Cambodia, អ៊ីម៉ែល៖ info@royalausnzcambodia.com និងអញ្ជើញទៅកាន់ទីតាំង៖ ផ្ទះលេខ 544,ផ្លូវ 1986, សង្កាត់ភ្នំពេញ, ខណ្ឌសែនសុខ, រាជធានីភ្នំពេញ៕

Fresh News

សេវាអ៊ិនធឺណិតអ៊ុបទិកក្រោមដីរបស់ TODAY ISP បានមកដល់ក្រុងតាខ្មៅហើយ

(ភ្នំពេញ)៖ ដើម្បីជាការឆ្លើយតបនឹងតម្រូវការអ៊ិនធឺណិតគុណភាពខ្ពស់ ដែលកំពុងតែកើនឡើងឥតឈប់ ក្រុមហ៊ុន TODAY ISP បានពង្រីកបណ្តាញអ៊ិនធឺណិតអ៊ុបទិកក្រោមដី របស់ខ្លួន ទៅដល់ទីក្រុងតាខ្មៅហើយ។

នេះជាដំណឹងល្អសម្រាប់ ម្ចាស់អាជីវកម្មនានា ក៏ដូចជាអ្នកប្រើប្រាស់តាមគេហដ្ឋាន មានឱកាសទទួលយកសេវាម្មអ៊ិនធឺណិតថ្មី ដែលមានគុណតម្លៃពិតប្រាកដ។

ក្រុមហ៊ុន បានភ្ជាប់មកជាមួយនូវ ការបញ្ចុះតម្លៃ ៥០% សម្រាប់អតិថិជនក្រុងតាខ្មៅ ដែលភ្ជាប់ប្រើប្រាស់តាមគេហដ្ឋាន និងល្បឿនទ្វេដង សម្រាប់ការប្រើប្រាស់តាមអាជីវកម្ម ឬសហគ្រាសផ្សេងៗ។

សូមចូលទៅកាន់តំណរ https://www.facebook.com/events/1187653577950815/ ។ ជាមួយគ្នានោះដែរក្រុមហ៊ុន នឹងបើកឲ្យមានការបោះឆ្នោតជាពិសេស ដើម្បីស្វែងរកសាលា នៅក្រុងតាខ្មៅផ្ទាល់ ក្នុងការទទួលយកអ៊ិនធឺណិតឥតគិតថ្លៃពីក្រុមហ៊ុន TODAY ISP នៅពាក់កណ្តាលខែមករានេះ។

ក្រុមហ៊ុន TODAY ISP ក៏នឹងពង្រីកសេវាកម្មទៅដល់ខេត្តសៀមរាបឆាប់ៗនេះផងដែរ លោកអ្នកដែលចាប់អារម្មណ៍ ឬក៏មានបំណងចង់តាមដានព័ត៌មានបច្ចេកវិទ្យាថ្មី អាចចុះឈ្មោះក្នុងបញ្ជី Newsletter ក្នុងគេហទំព័ររបស់ក្រុមហ៊ុនបាន។

ព័ត៌មានលម្អិតសូមទាក់ទងទៅកាន់៖ 087215577 ឬ 023215577 ឬចូលទៅក្នុងវិបសាយផ្ទាល់ www.today.com.kh៕

Fresh News

លោក ប៉ា សុជាតិវង្ស បើកកិច្ចប្រជុំពង្រឹងសេវារថយន្តក្រុងសាធារណៈ, ១១ខែដឹកជញ្ជូនអ្នកដំណើរ ជាង២លាននាក់ បានចំណូលជាង២០ពាន់លានរៀល

(ភ្នំពេញ)៖ លោក ប៉ា សុជាតិវង្ស អភិបាលរាជធានីភ្នំពេញ នៅព្រឹកថ្ងៃទី១០ ខែមករា ឆ្នាំ២០១៧នេះ បានជួបប្រជុំជាមួយមន្ត្រីរដ្ឋាករស្វយ័ត សាធារណៈរថយន្តក្រុង ដើម្បីបង្កើនសមត្ថភាពបម្រើសេវាសាធារណៈរថយន្តក្រុង ឲ្យកាន់តែប្រសើរ ថែមទៀត និងរកមធ្យោបាយអភិវឌ្ឍន៍ វិស័យដឹកជញ្ជូនសាធារណៈតាមរថយន្តក្រុង ឲ្យកាន់តែមានការគាំទ្រពីប្រជាពលរដ្ឋ ដើម្បីដោះស្រាយបញ្ហាកកស្ទះចរាចរណ៍ក្នុងទីក្រុង ។

នៅក្នុងកិច្ចប្រជុំនេះផងដែរ លោកអភិបាល ក៏បានបញ្ជាឲ្យ ប្រធានរដ្ឋាករស្វយ័ត្នត្រូវរៀបចំចំណតនីមួយៗ ឲ្យមានរបៀបរៀបរយឡើងវិញ ព្រោះកន្លងមកចំណតស្ទើរទាំងអស់ មានសភាពមិនសមរម្យ គ្មានអនាម័យបរិស្ថាន សម្រាប់អ្នករង់ចាំជិះរថយន្តឡើយ ធ្វើឲ្យអ្នកជិះគេធុញទ្រាន់ មិនចង់ជិះ ។

លោក ប៉ា សុជាតិវង្ស បានឲ្យដឹងថា រយៈពេល ១១ខែ ចាប់ពីខែមករា ដល់ខែវិច្ឆិកា ២០១៦ មានអ្នកជិះសរុបចំនួន ២,១៦៧,០២២នាក់ ក្នុងនោះអ្នកមានបង់ថ្លៃចំនួន ១,៣៤២,១២៩ នាក់
អ្នកឥតបង់ថ្លៃមានចំនួន ៨២៤,៨៩៣នាក់ ជាមធ្យម ជិះ៦ពាន់នាក់ក្នុងមួយថ្ងៃ និងរកចំណូលបាន ជាង២០ពាន់លានរៀល និងចំណាយ ជាង១៤ពាន់លានរៀល។

លោកបានបន្តទៀតថា សាលារាជធានីត្រៀមនឹង បង្កើនខ្សែរត់បន្ថែមទៀត ដោយសារចិន គ្រោងបញ្ជូនរថយន្តក្រុងចំនួន១០០ គ្រឿងនៅពេលឆាប់ៗខាងមុខនេះ ។

ជាមួយគ្នានោះដែរ លោក ប៉ា សុជាតិវង្ស អភិបាលរាជធានី ក៏បានណែនាំឲ្យអ្នកបើកបរ ត្រូវមានសុជីវធម៌ នៅក្នុងការបើកបរ ត្រូវគោរពច្បាប់ចរាចរណ៍។ ដោយកន្លងមកសព្វថ្ងៃ គេសង្កេតឃើញថា អ្នកបើកបររថយន្តក្រុង និងរដ្ឋាករស្វយ័តមួយចំនួន មិនទាន់មានការបើកបរគោរពច្បាប់នៅឡើយ។

សូមបញ្ជាក់ផងដែរថា អង្គការ JICA របស់ជប៉ុន បានសម្រេចផ្តល់រថយន្ត ដល់សាលារាជធានី ចំនួន១៤០គ្រឿង ក្នុងនោះ៨០គ្រឿង ប្រគល់នៅខែធ្នូ ចុងឆ្នាំ២០១៧ និង៦០គ្រឿងទៀតឆ្នាំ
២០២០ ខាងមុខនេះ ៕

Fresh News

ក្រោយ MoU រវាងកម្ពុជា-សិង្ហបុរី៖ កម្ពុជានឹងបញ្ជូន គ្រូបង្គោល៨០នាក់ ទៅសិក្សាជំនាញសំខាន់៣មុខ នៅប្រទេសសិង្ហបុរី

(ភ្នំពេញ)៖ បន្ទាប់ពីបញ្ចប់ការចុះអនុស្សណៈនៃការយោគយល់គ្នា រវាងក្រសួងការងារ និងបណ្ដុះបណ្ដាលវិជ្ជាជីវៈកម្ពុជា ជាមួយវិទ្យាស្ថានអប់រំបច្ចេកទេសសិង្ហបុរី នៅរសៀលថ្ងៃទី០៩ ខែមករា ឆ្នាំ២០១៧ នេះរួចនោះ រាជរដ្ឋាភិបាលកម្ពុជានឹងបញ្ជូនគ្រូបង្គោលចំនួន ៨០នាក់ ទៅសិក្សាជំនាញសំខាន់ៗចំនួន៣មុខ នៅប្រទេសសិង្ហបុរី, នេះបើតាមលោក ហេង សួរ អ្នកនាំពាក្យក្រសួងការងារ។

លោក ហេង សួរ បានបញ្ជាក់ថា «តាមរយៈអនុស្សណៈនេះ ប្រទេសសិង្ហបុរី នឹងបណ្តុះបណ្តាលគ្រូបង្គោល ផ្នែកបច្ចេកវិទ្យាចំនួន ៨០នាក់ ចំនួន៣សប្តាហ៍ នៅវិទ្យាស្ថានអប់រំបច្ចេកទេសសិង្ហបុរី លើ៣មុខជំនាញ រួមមាន៖ ១.ជំនាញទំនាកទំនងព័ត៌មានវិទ្យាចំនួន ៣២នាក់, ២.ជំនាញបច្ចេកវិទ្យាគ្រឿងយន្តចំនួន ៣២នាក់, ៣.ជំនាញអេឡិចត្រូនិកចំនួន ១៦នាក់»។

លោកអ្នកនាំពាក្យបានបន្តថា គ្រូបច្ចេកទេសដែលត្រូវបញ្ជូនទៅបណ្តុះបណ្តាល នៅប្រទេសិង្ហបុរីនោះ គឺជាគ្រូបច្ចេកទេសដែលកំពុងបង្រៀន នៅតាមគ្រឹះស្ថានអប់រំបណ្តុះបណ្តាលបច្ចេកទេសវិជ្ជាជីវៈ ក្រោមឱវាទក្រសួងការងារ និងបណ្តុះបណ្តាលវិជ្ជាជីវៈ។ លោកបានបន្ថែមថា ក្រោយការបណ្តុះបណ្តាល គ្រូបច្ចេកទេសបង្គោលទាំង ៨០នាក់នោះ ត្រូវមានកាតព្វកិច្ចបង្រៀនបន្ត ដល់គ្រូបច្ចេកទេសផ្សេងៗទៀត «ក្នុងអត្រាគ្រូបង្គោល ១នាក់ ត្រូវបង្រៀនបន្តដល់គ្រូបច្ចេកទេស ៣នាក់ផ្សេងទៀត»។

វិទ្យាស្ថានអប់រំបច្ចេកទេស (ITE) របស់សិង្ហបុរី គឺជាវិទ្យាស្ថានដ៏ល្បីល្បាញមួយទាំងក្នុងតំបន់ និងសកលលោក ពាក់ព័ន្ធនឹងផ្នែកអប់រំបច្ចេកទេសវិជ្ជាជីវៈ ហើយតាមរយៈអនុស្សណៈនេះ គុណភាពគ្រូបច្ចេកទេសវិជ្ជាជីវៈ លើ៣មុខជំនាញខាងលើ នឹងត្រូវបានពង្រឹង និងពង្រីកបន្ថែម ដើម្បីបំពេញ តាមតម្រូវការទីផ្សារការងារ ក៏ដូចជាជួយគាំទ្រដល់គោលនយោបាយអភិវឌ្ឍន៍វិស័យឧស្សាហកម្ម នៅកម្ពុជាផងដែរ។

សូមជម្រាបថា ក្នុងដំណើរទស្សនកិច្ចផ្លូវរដ្ឋរបស់លោកប្រធានាធិបតីសិង្ហបុរី តូនី តាន់ កេងយាំ នៅប្រទេសកម្ពុជា រយៈពេល៤ថ្ងៃ មានអនុស្សារណៈចំនួន២ ដែលត្រូវចុះហត្ថលេខាក្នុងនោះរួមមាន៖

ទី១.អនុស្សារណៈ ស្តីពីកិច្ចសហប្រតិបត្តិការលើវិស័យអប់រំ បណ្ដុះបណ្ដាលបច្ចេកទេស និងវិជ្ជាជីវៈ រវាងក្រសួងការងារកម្ពុជា ជាមួយវិទ្យាស្ថានអប់រំបច្ចេកទេសសិង្ហបុរី។
ទី២.ពិធីចុះហត្ថលេខាលើអនុស្សារណៈ រវាងមន្ទីរពេទ្យកាល់ម៉ែត្រ ជាមួយនឹងមន្ទីរពេទ្យ Tan Tock Seng ប្រទេសសិង្ហបុរី៕

Fresh News

ការដ្ឋានសួនច្បារចេនឡា ឈានដល់ការដាំដើមត្នោត និងក្រាលស្មៅ

ភ្នំពេញ ៖ សួនច្បារចេនឡា ក្បែរផ្សារដើមគរ ស្ថិតក្នុងសង្កាត់ផ្សារដើមគរ ខណ្ឌទួលគោក ដែលគេទុកចោលជាយូរមកហើយនោះ មកដល់ពេលនេះ បានស្ថាបនាឡើងវិញហើយ ហើយមកដល់ពេលនេះ ការដ្ឋានបានឈានដល់ការដាំដើមត្នោត និងក្រាលស្មៅហើយដែរ។

មន្ត្រីរដ្ឋបាលរាជធានីភ្នំពេញបានឲ្យដឹងថា មកដល់ពេលនេះ រដ្ឋបាលរាជធានីភ្នំពេញ បាននិងកំពុងកែលម្អសួនច្បារចេនឡា ដោយធ្វើសកម្មភាពដាំដើមត្នោត និងក្រាលស្មៅ ដើម្បីបង្កើនសោភ័ណភាពថ្មីរាជធានីភ្នំពេញមួយកម្រិតថែមទៀត។

តាមអ្វី ដែលជាពង្រាងក្នុងការកែលម្អ សោភណភាពសួននេះ គឺនឹងត្រូវរៀបចំឡើងជាកន្លែងលម្ហែកម្សាន្ត ដែលមានទីធ្លា ផ្លូវថ្មើរជើង សួនផ្កា ស្មៅ ដើមឈើ បង់អង្គុយសាធារណៈ ភ្លើងបំភ្លឺសួន ជាដើម។

គួររំលឹកផងដែរថា កាលពីពេលថ្មីៗកន្លងទៅនេះ នៅក្នុងវេទិកាសាធារណៈមួយ នៅក្នុងមជ្ឈមណ្ឌលចេនឡាប្រជាពលរដ្ឋ ក៏បានស្នើឲ្យមានការជួលជុលឡើងវិញផងដែរ ចំពោះសួនច្បារចេនឡានេះផងដែរ ហើយក្នុងឱកាសកាលនោះ លោក ឃួង ស្រេង អភិបាលរងរាជធានីភ្នំពេញ ក៏បានស្នើឲ្យមន្ទីរសាធារណការ និងដឹកជញ្ជូនរាជធានីភ្នំពេញ ធ្វើការជួសជុលឡើងវិញឲ្យឆាប់ៗផងដែរ៕

កម្ពុជាថ្មី
ស្រីរ័ត្ន

រាជរដ្ឋាភិបាលកម្ពុជា កំណត់បែងចែករមណីយដ្ឋានឆ្នេរសមុទ្រជា ៥ ប្រភេទ

បើតាមការផ្សព្វផ្សាយរបស់ក្រសួងទេសចរណ៍ នៅថ្ងៃទី៩ខែមករានេះ បានឲ្យដឹងថា កាលពីថ្ងៃទី២៤ ខែធ្នូ ឆ្នាំ២០១៦ ក្នុងឱកាសនៃពិធីបុណ្យសមុទ្រឆ្នាំ២០១៦ នាខេត្តព្រះសីហនុ រាជរដ្ឋាភិបាលកម្ពុជា បានសម្រេចដាក់ឲ្យអនុវត្តនូវសេចក្តីសម្រេច
របស់រាជរដ្ឋាភិបាលកម្ពុជា លេខ១៣១ សសរ ចុះថ្ងៃទី២២ ខែធ្នូ ឆ្នាំ២០១៦ ស្តីពី
“គោលការណ៍ណែនាំអភិវឌ្ឍរមណីយដ្ឋានឆ្នេរសមុទ្រ”។

យោងតាមប្រសាសន៍របស់ លោក ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍គណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា ថ្លែងក្នុងសន្និសីទអន្តរជាតិភាពជាដៃគូ រដ្ឋ-ឯកជន លើកទី១ ស្តីពី “ការអភិវឌ្ឍតំបន់ឆ្នេរសមុទ្រកម្ពុជា”កាលពីថ្ងៃទី២៣ ខែធ្នូ ឆ្នាំ២០១៦ បានបញ្ជាក់ថា សេចក្តីសម្រេចនេះមានគោលដៅដាក់ឲ្យអនុវត្ត “គោលការណ៍ណែនាំអភិវឌ្ឍរមណីយដ្ឋានឆ្នេរសមុទ្រ” ប្រកបដោយប្រសិទ្ធភាព សំដៅដល់ការចូលរួមអភិវឌ្ឍរមណីយដ្ឋានឆ្នេរសមុទ្រ ឲ្យក្លាយជាផលិតផលទេសចរណ៍ ប្រកបដោយគុណភាព សុវត្ថិភាព និងនិររន្តរភាព។ ឯកសារនេះ គឺជាឯកសារគ្រឹះសម្រាប់ធានាការអភិវឌ្ឍ និងការគ្រប់គ្រងរមណីយដ្ឋានឆ្នេរសមុទ្រ ប្រកបដោយនិរន្តរភាពបរិស្ថាន រក្សាបាននូវសណ្តាប់ធ្នាប់សាធារណៈ ចូលរួមចំណែកក្នុងការអភិវឌ្ឍសេដ្ឋកិច្ចជាតិ និងលើកតម្កើងឧត្តមភាពរបស់ឆ្នេរសមុទ្រកម្ពុជា ឱ្យក្លាយទៅជាគោលដៅទេសចរណ៍ កម្រិតអន្តរជាតិដ៏ទាក់ទាញ ដែលផ្តល់នូវបទពិសោធន៍គុណភាពខ្ពស់ សម្រាប់ភ្ញៀវទេសចរជាតិនិងអន្តរជាតិ។

ផ្អែកលើសក្តានុពល និងលក្ខណៈពិសេស នៃធម្មជាតិតំបន់ឆ្នេរសមុទ្រកម្ពុជា រាជរដ្ឋាភិបាលកម្ពុជាកំណត់បែងចែករមណីយដ្ឋានឆ្នេរសមុទ្រជា ៥ ប្រភេទ គឺ៖ ទី១. ឆ្នេរអភិរក្សស្នូល ទី២. ឆ្នេរអេកូទេសចរណ៍ ទី៣.ឆ្នេរកម្សាន្តបែបប្រណិត ទី៤. ឆ្នេរកម្សាន្តសាធារណៈកម្រិតខ្ពស់ និងទី៥.ឆ្នេរកម្សាន្តសាធារណៈកម្រិតទាប និងបានកំណត់ទម្រង់អ្នកអភិវឌ្ឍរមណីយដ្ឋានឆ្នេរសមុទ្រ (Developer) ជា ២ ប្រភេទ គឺ (ទី១). អ្នកអភិវឌ្ឍជារដ្ឋ (State Management) និង (ទី២). អ្នកអភិវឌ្ឍឆ្នេរមានទម្រង់ចម្រុះ (Co-Management) ដែលអាចជាភាពជាដៃគូ រដ្ឋ-ឯកជន (PPP) ឬភាពជាដៃគូ សហគមន៍-រដ្ឋ-ឯកជន (CPPP) ដោយការអភិវឌ្ឍរបស់ផ្នែកឯកជន ឬសហគមន៍ គឺធ្វើឡើងក្រោមទម្រង់ (DBO-Design, Build, Operate) ដោយជាប់កិច្ចសន្យាជាមួយរដ្ឋ ផ្សាភ្ជាប់ជាមួយសៀវភៅបន្ទុកមួយច្បាស់លាស់ និងបានគាំទ្រឱ្យមានការរៀបចំនូវធម្មនុញ្ញឆ្នេរ (Beach Charter) សម្រាប់ឆ្នេរនីមួយៗ ដោយផ្អែកលើគោលការណ៍ភាពជាដៃគូ រដ្ឋ-ឯកជន-ប្រជាពលរដ្ឋមូលដ្ឋាន និងដៃគូអភិវឌ្ឍ (4Ps)ស្របអភិក្រមសមាហរណកម្មពីគ្រប់ភាគី (Integrated Approach)។

ទន្ទឹមនឹងនេះ រាជរដ្ឋាភិបាលកម្ពុជា (តាមរយៈគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា) បានរៀបចំកែលំអរឆ្នេរនៅខេត្តព្រះសីហនុ និងបានដាក់ចេញនូវទិសដៅយុទ្ធសាស្ត្រអភិវឌ្ឍ “ឆ្នេរអូត្រេះ ជាឆ្នេរកម្សាន្តបែបប្រណីត
(Luxury Beach)” “ឆ្នេរអូឈើទាលជាឆ្នេរកម្សាន្តសាធារណៈកម្រិតខ្ពស់”( Popular Leisure Beach)” និង “ឆ្នេរឯករាជ្យ ជាឆ្នេរកម្សាន្តសាធារណៈកម្រិតខ្ពស់”(Popular Leisure Beach)” ហើយនាពេលខាងមុខ ផ្អែកលើសេចក្តីសម្រេចរបស់រាជដ្ឋាភិបាលកម្ពុជា ស្តីពី “គោលការណ៍ណែនាំអភិវឌ្ឍរមណីយដ្ឋានឆ្នេរសមុទ្រ” គ.អ.ឆ.ក
នឹងរៀបចំផែនការមេអភិវឌ្ឍរមណីយដ្ឋានឆ្នេរសមុទ្រ (Master Plan) ដោយត្រូវមានភ្ជាប់ជាមួយនឹងផែនការគ្រប់គ្រងទេសចរណ៍ សម្រាប់ឆ្នេរនីមួយៗ (Tourism Management Plan) របាយការណ៍វាយតម្លៃហេតុប៉ះពាល់បរិស្ថាន និងប្លង់គោលនិងផែនការប្រើប្រាស់ដី អមជាមួយការរៀបចំធម្មនុញ្ញ (Beach Charter) របស់ខ្លួន
សំដៅកំណត់កាតព្វកិច្ចនៃភាគីនីមួយៗ ក្នុងការចូលរួមអភិវឌ្ឍ និងអភិរក្សបរិស្ថាន និងកាតព្វកិច្ចនៃការចូលរួមហិរញ្ញវត្ថុ ទ្រទ្រង់ការថែទាំឆ្នេរ ដែលមានប្រភពមកពីជាអាទិ៍៖ ថ្លៃប្រើប្រាស់ (user fee) Tourism- Levy ការបង់វិភាគទានឈរលើគោលការណ៍អ្នកបំពុលអ្នកបង់ (Polluter Payer) (ប៉ុន្តែមិនមានកម្រៃចូល- entrance fee) នោះទេ ក្នុងគោលបំណងដើម្បីចូលរួមដល់ការ សម្រេចឱ្យបានចក្ខុវិស័យ ត្រៀមទទួលទេសចរអន្តរជាតិឱ្យបាន ១លាននាក់និងទេសចរជាតិប្រមាណ ២លាននាក់ នៅឆ្នាំ២០២០ សម្រាប់ខេត្តព្រះសីហនុ ដូចមានចែងក្នុងផែនការយុទ្ធសាស្ត្រអភិវឌ្ឍទេសចរណ៍ខេត្តព្រះសីហនុ ២០១៦-២០២៥ ៕

CEN
ដោយ: ដាវុធ

ទិញ និងកក់ Sky Tree ខុនដូរ ឥឡូវនេះ លោកអ្នកនឹងទទួលបាន ការផ្ដល់ជូនយ៉ាងពិសេសភ្លាមៗ

(ភ្នំពេញ)៖ មធ្យោបាយ ក្នុងការស្វែងរកប្រាក់ចំណេញ ឬប្រាក់ចំនូល របស់បុគ្គលម្នាក់ៗ មានភាពខុសៗគ្នា អ្នកខ្លះស្វែងរកតាមរយៈការបំរើការងារ ការប្រកបអាជីវកម្ម ការធ្វើកសិកម្ម ការធ្វើជំនួញ និងតាមវិធីសាស្រ្តជាច្រើនទៀត។

ពេលនេះលោកអ្នកនឹងចំណេញពីការធ្វើវិនិយោគ ជាមួយនឹងក្រុមហ៊ុនអចលនទ្រព្យ J&L (ស្កាយទ្រីខុនដូ) ដោយលោកអ្នក មិនមានការកក់ប្រាក់ជាមុន មិនចាំបាច់មានប្រាក់តម្កល់ និងមិនអស់ការប្រាក់ ប្រសិនជាលោកអ្នកមិនមានលទ្ធភាព បង់គ្រប់គ្រាន់ទេនោះ លោកអាចធ្វើការកម្ចី ពីធានាគារណាមួយ ដែលលោកអ្នកពេញចិត្ត។

លោកអ្នកសម្រេចចិត្តទិញ ឬកក់ ស្កាយទ្រីខុនដូនៅពេលនេះ និងមានឱកាសទទួលបានប្រាក់ចំណូលច្រើន លើលពីការរំពឹងទុក ដោយសារតែរយៈ ពីរឬបីឆ្នាំខាងមុខទៀត តម្លៃរបស់ស្កាយទ្រីខុនដូ និងមានការកើនឡើង។ លោកអ្នកគ្រាន់តែចំណាយលុយ តិចតួចបង់ជាប្រចាំខែ ដើម្បីទទួលបាននូវការបង្កើនប្រាក់ចំណូល និងលំនៅឋាន ក្រុមគ្រួសារជាទីស្រលាញ់របស់អ្នក ទៅថ្ងៃអនាគត។

ប្រសិនបើអ្នកកំពុងស្វែងរក អចលនទ្រព្យដែលមានគុណភាព ពីក្រុមហ៊ុនល្បីឈ្មោះ និងមានប្រសិទ្ធភាព សូមជ្រើសរើសយកក្រុមហ៊ុន អចលនទ្រព្យ J&L ដែលជាគម្រោងថ្មី នៅក្នុងប្រទេសកម្ពុជាពិតជា ដៃគូដែលល្អបំផុត។

ព័ត៌មានលម្អិត សូមទំនាក់ទំនងមកកាន់ J&L រាល់ម៉ោងធ្វើការ ចាប់ពីម៉ោង៖ ០៨៖៣០នាទីព្រឹក រហូតទៅដល់ម៉ោង០៦៖៣០នាទីល្ងាច និងទៅកាន់ការិយាល័យលក់៖ ផ្ទះលេខ KH1 ផ្លូវ១០៥ សង្កាត់ទូលសង្កែ ខណ្ឌឬស្សីកែវ រាជធានីភ្នំពេញ និងលេខទូរស័ព្ទ៖ ០២៣/០៨៩/ ០៨១ ៩០១ ៦៨៨ ឬតាមរយៈ គេហទំព័រ www.skytreecondominium.com៕

Fresh News

ប្រជាពលរដ្ឋក្រុងសំរោង ថ្លែងអំណរគុណសម្តេចតេជោ ដែលបានប្រែក្លាយពីគ្រួសក្រហម៧ខ្សែ ជាផ្លូវក្រាលកៅស៊ូ សម្រួលដល់ការធ្វើដំណើរ

(ឧត្តរមានជ័យ)៖ លោក ស ថាវី អភិបាលខេត្តឧត្តរមានជ័យ និងលោក យឹម ធិន ប្រធានក្រុមប្រឹក្សាខេត្ត នៅព្រឹកថ្ងៃទី០៩ ខែមករា ឆ្នាំ២០១៧នេះ បានបើកការដ្ឋានស្ថាបនាសាងសង់ ផ្លូវគ្រួសក្រហម ប្រែក្លាយជាផ្លូវក្រាលកៅស៊ូ ប្រភេទ DBST ចំនួន៧ខ្សែ ដែលមានទទឹងផ្លូវប្រវែង៦ម៉ែត្រ សរុបប្រវែង៥៦៥០ម៉ែត្រ ស្ថិតនៅសង្កាត់សំរោង ក្រុងសំរោង ខេត្តឧត្តរមានជ័យ។

លោក ស ថាវី អភិបាលខេត្តឧត្តរមានជ័យបានថ្លែងឲ្យដឹងថា ផ្លូវក្រាលកៅស៊ូប្រភេទ DBST ចំនួន៧ខ្សែនេះ គឺប្រើប្រាស់កញ្ចប់ថវិកា អភិវឌ្ឍន៍របស់ខេត្ត ដើម្បីជាការបំរើនូវសេចក្តីត្រូវការរបស់បងប្អូនប្រជាពលរដ្ឋយើង មានចំនួន៤ភូមិ គឺភូមិឈូក ភូមិគោកគរ ភូមិដូនកែន និងភូមិពុរ ស្ថិតសង្កាត់-ក្រុងសំរោង ។

នាពេលនោះដែល ប្រជាពលរដ្ឋក៏បានសម្តែង ការសប្បាយចិត្តយ៉ាងខ្លាំង ព្រមទាំងបានជូនពរ និងថ្លែងអំណរគុណ ចំពោះលោកស ថាវី អភិបាលខេត្ត និងជាពិសេសនោះ គឺសូមថ្លែងនូវអំណរគុណ ចំពោះសម្តេចតេជោ ហ៊ុន សែន នាយរដ្ឋមន្រ្តីនៃកម្ពុជា ដែលជានិច្ចជាកាល សម្តេចតែងតែគិតគូរពីសុខទុក្ខ និងរាល់ការលំបាក របស់ប្រជាពលរដ្ឋជានិច្ច ជាពិសេសនោះជាក់ស្តែងនៅពេលនេះ គឺបានអភិវឌ្ឍន៍នៅភូមិឃុំ របស់ពួកគាត់៕

Fresh News

អាជ្ញាធរអប្សរា បើកយុទ្ធនាការថែទាំនិងព្យាបាលជួយសង្គ្រោះដើមស្ពង់ នៅតំបន់អង្គរ ព្រោះឈើប្រណិតនេះ បានរួមចំណែកទាក់ទាញភ្ញៀវទេសចរ

(សៀមរាប)៖ ក្រុមអ្នកជំនាញរបស់អាជ្ញាធរជាតិអប្សរា បានបើកយុទ្ធនាការថែទាំ និងព្យាបាលជួយសង្គ្រោះដើមស្ពង់នានា ដែលមានអាយុកាលរាប់រយឆ្នាំ ក្នុងតំបន់អង្គរ ដើម្បីបន្តអាយុកាលរបស់វាតទៅទៀត ព្រោះដើមស្ពង់នេះ បានរួមចំណែកទាក់ទាញចំណាប់អារម្មណ៍ភ្ញៀវទេសចរ ដែលចូលទៅទស្សនាតំបន់អង្គរ។

ក្នុងបំណងអភិរក្ស និងថែរក្សាដើមឈើចំណាស់ ដែលដុះក្នុងឧទ្យានអង្គរ នាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន នៃអាជ្ញាធរជាតិអប្សរា បានចុះព្យាបាលប្រភេទដើមឈើចំណាស់ៗជាច្រើន ជាពិសេសដើមស្ពង់។ ជាក់ស្តែង ដើមស្ពង់ចំណាស់មួយដើម នៅជិតខ្លោងទ្វារទន្លេអុំ ត្រូវបានអភិរក្សថែទាំដោយយកចិត្តទុកដាក់ ពីក្រុមអ្នកជំនាញរបស់អាជ្ញាធរជាតិអប្សរា។ ការជួយសង្រ្គោះនេះ ត្រូវបានធ្វើឡើងនៅព្រឹកថ្ងៃទី០៦ ខែមករា ឆ្នាំ២០១៧។

លោក លឹម សៀងហួត បុគ្គលិកជំនាញតាមដានសុខភាព ផ្នែកព្យាបាលដើមឈើ នៃនាយដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន បានឲ្យដឹងថា ដើមស្ពង់ដែលត្រូវបានព្យាបាលនេះ មានការពុកផុយនៅត្រង់គល់ និងចុង។ ដោយសារមានទីតាំងជាប់ផ្លូវដើរ ដ៏សំខាន់សម្រាប់ភ្ញៀវទេសចរ ដូច្នេះក្រុមការងាររបស់លោក ប្រញាប់ក្នុងការព្យាបាល ហើយការព្យាបាលនេះ ក៏មានការចាប់អារម្មណ៍ច្រើន ពីសំណាក់ទេសចរដែលកំពុងទស្សនា នៅទីនោះផងដែរ។ ភ្ញៀវទេសចរទាំងនោះ បានសាកសួរពីការងារព្យាបាលដើមស្ពង់ ដែលក្រុមការងារកំពុងជួយសង្រ្គោះនេះ។

ដើមស្ពង់ដែលក្រុមជំនាញកំពុងព្យាបាលនេះ មានបញ្ហា៣ចំណុច៖ ទី១.ដើមអម្ពិលដែលដុះក្បែរនោះ ឫសរបស់វាចាក់ប្រជែងនឹងគល់ដើមស្ពង់, ទី.ការដើរជាន់ឫសស្ពង់ពីសំណាក់មនុស្ស ព្រោះវានៅជិតផ្លូវដើរ ធ្វើឲ្យវាពិបាកស្រូបយកជីវជាតិក្នុងដី និងទី៣.ចំណុចខ្លះនៃគល់ បានពុកផុយ និងមានសត្វកណ្តៀរឡើង។

សម្រាប់វិធីសាស្រ្តនៃការព្យាបាល លោក សៀង ហួត បានរៀបរាប់ថា «ការព្យាបាលដើមស្ពង់ គឺធ្វើឡើងតាមរយៈ ការកោសសំបកពុកផុយចេញលាបជ័រទឹក ដើម្បីការពារពីការជ្រាបទឹកចូលក្នុងសាច់ និងចុងក្រោយបិទដីដំបូក ដើម្បីឲ្យសាច់ឈើដុះឡើងវិញ។ បន្ទាប់មក ក្រុមការងារនឹងបន្តតាមដាន រយៈពេល៦ខែទៅ១ឆ្នាំ ដើម្បីដឹងពីការវិវត្តថ្មីរបស់ដើមស្ពង់»។

យ៉ាងណាក៏ដោយ តាមបទពិសោធន៍របស់ លោក សៀងហួត ដែលកន្លងមក បានចុះព្យាបាលដើមស្ពង់ជាច្រើនដើមនោះ បាននិយាយថា មានតែដើមស្ពង់ដែលមានសាច់ខ្ចីតែប៉ុណ្ណោះ ដែលអាចលូតលាស់ល្អឡើងវិញ ចំណែកស្ពង់ចាស់មានអាយុលើសពី ១០០ឆ្នាំឡើង លទ្ធភាពលូតលាស់មានតិចតួចបំផុត។ ស្ពង់ខ្ចី កោសិការបស់វា ឆាប់លូតលាស់ជាងស្ពង់ចាស់ ដែលកោសិការបស់វាមួយចំនួន បានងាប់ទៅហើយ ដោយការព្យាបាលគ្រាន់តែពន្យារអាយុកាលរបស់វាតែប៉ុណ្ណោះ។

សូមរម្លឹកថា ស្ពង់ជាប្រភេទឈើក្រៅចំណាត់ថ្នាក់មួយ ហើយភាគច្រើនមានដុះនៅតំបន់អង្គរ។ នៅតំបន់អង្គរ ដើមស្ពង់មានដុះច្រើនជាងគេ នៅប្រាសាទតាព្រហ្ម។ ស្ពង់ជាដើមឈើទាក់ទាញ ចំណែកឫសរបស់វាមួយចំនួន ក៏មានផលប្រយោជន៍ការពារ និងទ្រប្រាសាទផងដែរ៕

Fresh News

បង្គោលអង់តែនសិប្បនិម្មិត ដែលមានទម្រង់រូបរាងជាដើមឈើចំនួន៦ដើម ត្រូវបានដាក់ដំឡើង រួចរាល់ជាស្ថាពរ

សៀមរាប ៖ បង្គោលអង់តែនសិប្បនិម្មិត ដែលមានទម្រង់រូបរាងជាដើមឈើចំនួន៦ដើម ត្រូវបានដាក់ដំឡើង រួចរាល់ជាស្ថាពរដើម្បីអនុញ្ញាតឲ្យក្រុមហ៊ុនទូរស័ព្ទផ្សេងៗបំពាក់អង់តែន បង្កើនសេវាទូរស័ព្ទ និងល្បឿនអ៊ីនធឺណិតឲ្យបានទូលំទូលាយដល់ភ្ញៀវទេសចរ ប្រជាជនក្នុងតំបន់អង្គរ អ្នកប្រកបរបរអាជីវកម្មសេវាកម្មទេសចរណ៍ និងវិស័យឯកជននានានៅក្នុងតំបន់ប្រវត្តិសាស្ត្រខ្មែរដ៏ល្បីមួយនេះ។

តាមការបញ្ជាក់ពីលោក សុខ សង្វារ អគ្គនាយករងអាជ្ញាធរជាតិអប្សរាទទួលបន្ទុកនាយកដ្ឋានអភិវឌ្ឍន៍ទេសចរណ៍អង្គរបានឲ្យដឹងថា បង្គោលអង់តែន បានដំឡើងចំនួន៦ទីតាំង ដូចជា CTL1 នៅភូមិទក្សិណត្បូង សង្កាត់គោកចក CTL2 នៅភូមិក្រវ៉ាន់ សង្កាត់នគរធំ CTL3 នៅភូមិរហាល សង្កាត់នគរធំ CTL4 នៅភូមិនគរក្រៅ សង្កាត់គោកចក CTL5 នៅខ្លោងទ្វារតាកាវ និង CTL6 នៅតាមបណ្តោយផ្លូវកូម៉ៃ។

លោក សុខ សង្វារ បន្តទៀតថា បើគិតមកដល់ថ្ងៃទី០៩ ខែមករា ឆ្នាំ២០១៧ ប្រព័ន្ធទូរស័ព្ទស្មាតជាក្រុមហ៊ុនដំបូងគេ ដែលបានដាក់ឲ្យដំណើរការសេវាទូរស័ព្ទ និងបណ្ដាញអ៊ីនធឺណិត4G យ៉ាងរលូនក្នុងតំបន់រមណីយដ្ឋានអង្គរ ហើយនាពេលឆាប់ៗខាងមុខនេះ នឹងមានប្រព័ន្ធទូរស័ព្ទផ្សេងៗទៀតក្នុងប្រទេសមកបំពាក់សេវាទូរស័ព្ទ និងសេវាអ៊ីនធឺណិតបន្ថែមទៀតផងដែរ។

តាមរយៈការដំឡើងបង្គោលអង់តែនសិប្បនិម្មិត និងបំពាក់សេវាប្រព័ន្ធទូរស័ព្ទនានាក្នុងតំបន់រមណីយដ្ឋានអង្គរនេះ នឹងធ្វើឲ្យភ្ញៀវទេសចរជាតិ-អន្តរជាតិ ដែលមកទស្សនាតំបន់អង្គរ មានភាពងាយស្រួល ទាំងការហៅទូរស័ព្ទ ការផុសរូបក្នុងបណ្ដាញសង្គមហ្វេសប៊ុក និងផ្សាយផ្ទាល់វីដេអូពីដំណើរកម្សាន្តរបស់ខ្លួនបានភ្លាមៗ។ ជាពិសេសជាងនេះទៅទៀត វាបានជួយសម្រួល ដល់ការងាររបស់អាជ្ញាធរ និងសមត្ថកិច្ចពាក់ព័ន្ធក្នុងការប្រតិបត្តិការងាររបស់ខ្លួនផង។

នេះជាលើកទី១ហើយសម្រាប់ប្រទេសកម្ពុជា ដែលបានរៀបចំដំឡើងអង់តែនសិប្បនិម្មិតមានរូបរាងដូចដើមឈើ និងដាក់ឲ្យដំណើរការនៅលើទឹកដីអង្គរបេតិកភណ្ឌពិភពលោក។

អាជ្ញាធរជាតិអប្សរា តែងតែយកចិត្តទុកដាក់បំផុត ចំពោះការផ្តល់ជូននូវភាពងាយស្រួលតាមរយៈការរៀបចំសេវាកម្មទេសចរណ៍ ដើម្បីទាក់ទាញទេសចរឲ្យចូលមកទស្សនាតំបន់ប្រវត្តិសាស្ត្រដ៏ល្បីនេះឲ្យកាន់តែច្រើនឡើង។

លើសពីនោះទៀត អាជ្ញាធរជាតិអប្សរា ក៏បានគិតគូរដល់ការអភិរក្ស និងការថែរក្សាសោភ័ណភាពនៅក្នុងតំបន់អង្គរផងដែរ ជាក់ស្តែងការដំឡើងអង់តែនសិប្បនិម្មិតសម្រាប់បំពាក់ប្រព័ន្ធទូរស័ព្ទ ដូច្នេះក៏តម្រូវឲ្យមានលក្ខណៈធម្មជាតិ ដែលអាចបន្លំ និងរក្សាបាននូវភាពស្រស់បំព្រង នៃទេសចរណ៍ធម្មជាតិ ស្របតាមបទដ្ឋានរបស់តំបន់បេតិកភណ្ឌពិភពលោកទៀតផង៕

កម្ពុជាថ្មី
គឿនវេត

កាសែតថ្មី

Menu

Facebook របស់ Fresh News កើនឡើងដល់១.៥លាននាក់ហើយ ខណៈអ្នកប្រើប្រាស់ Fresh News បន្តកើនជិត៨៣ម៉ឺននាក់

ប្រជាពលរដ្ឋ០២គ្រួសារ ស្រុកកំពង់ត្របែកទទួលបានផ្ទះពីសាខាកាកបាទក្រហមកម្ពុជា

ក្រសួងពាណិជ្ជកម្ម ជ្រើសរើសប្រធានក្រុមទីប្រឹក្សាថ្មី ដើម្បីពង្រឹងប្រសិទ្ធភាពការងារ ឆ្នាំ២០១៧

NBC ដាក់ឲ្យដេញថ្លៃសាច់ប្រាក់ ៤០ពាន់លានរៀលលើកទី៤

សាលាបឋមសិក្សា៣នៅសៀមរាប ចាប់ផ្តើម«រៀនពេញមួយថ្ងៃ» ក្នុងគម្រោងសាកល្បង

មន្ទីរពេទ្យបង្អែកខេត្តសៀមរាប បានចុះកិច្ចព្រមព្រៀងសហប្រតិបត្តិការ ជាមួយសាកលវិទ្យាល័យ EWHA កូរ៉េ

ម៉្សៅទឹកដោះគោដ៏ល្បី របស់អូស្ត្រាលី ម៉ាក ROYAL AUSNZ ទទួលបានការគាំទ្រខ្ពស់លើទីផ្សារកម្ពុជា

សេវាអ៊ិនធឺណិតអ៊ុបទិកក្រោមដីរបស់ TODAY ISP បានមកដល់ក្រុងតាខ្មៅហើយ

ការដ្ឋានសួនច្បារចេនឡា ឈានដល់ការដាំដើមត្នោត និងក្រាលស្មៅ

រាជរដ្ឋាភិបាលកម្ពុជា កំណត់បែងចែករមណីយដ្ឋានឆ្នេរសមុទ្រជា ៥ ប្រភេទ

ទិញ និងកក់ Sky Tree ខុនដូរ ឥឡូវនេះ លោកអ្នកនឹងទទួលបាន ការផ្ដល់ជូនយ៉ាងពិសេសភ្លាមៗ

បង្គោលអង់តែនសិប្បនិម្មិត ដែលមានទម្រង់រូបរាងជាដើមឈើចំនួន៦ដើម ត្រូវបានដាក់ដំឡើង រួចរាល់ជាស្ថាពរ

វប្បធម៌

កីឡា

តារា

Menu

KBobject = new KBclass(); document.write(KBobject.getKhDate(new Date('Thursday, January 12, 2017')));

KBobject = new KBclass(); document.write(KBobject.getKhDate(new Date('Wednesday, January 11, 2017')));

KBobject = new KBclass(); document.write(KBobject.getKhDate(new Date('Tuesday, January 10, 2017')));

KBobject = new KBclass(); document.write(KBobject.getKhDate(new Date('Monday, January 9, 2017')));

វប្បធម៌

កីឡា

តារា