កាសែតថ្មី: ព័ត៌មានសំខាន់ៗ

Showing posts with label ព័ត៌មានសំខាន់ៗ. Show all posts

Facebook របស់ Fresh News កើនឡើងដល់១.៥លាននាក់ហើយ ខណៈអ្នកប្រើប្រាស់ Fresh News បន្តកើនជិត៨៣ម៉ឺននាក់

(ភ្នំពេញ)៖ គិតត្រឹមថ្ងៃទី១២ ខែមករា ឆ្នាំ២០១៧នេះ ចំនួនអ្នកគាំទ្រ និងតាមដានព័ត៌មានលើ Facebook របស់ Fresh News បានកើនឡើងដល់ ១.៥លាននាក់ហើយ ចំណែកអ្នកប្រើប្រាស់ Fresh News បានបន្តកើនឡើងជាលំដាប់រហូតដល់ជិត៨៣ម៉ឺននាក់។ ដោយក្នុងមួយថ្ងៃអមានអ្នក Like នៅលើ Facebook ប្រមាណពី៥០០០-៦០០០នាក់ ដោយឡែកអ្នកប្រើប្រាស់ Fresh News (App) លើទូរស័ព្ទដៃវិញក្នុងមួយថ្ងៃមានអ្នក Install ប្រមាណចាប់ពី១០០០-១៣០០នាក់។

Fresh News ជាអង្គភាពព័ត៌មានមួយនៅកម្ពុជា ដែលបានប្រើប្រាស់បច្ចេកវិទ្យាទំនើប ក្នុងការបាញ់បញ្ជូនព័ត៌មានថ្មីៗ និងចុងក្រោយបំផុតទៅកាន់ Mobile និង Computer ព្រមៗគ្នាត្រឹមតែមួយនាទីប៉ុណ្ណោះទៅកាន់អ្នកប្រើប្រាស់ទាំងអស់របស់ Fresh News ទាំង iOS និង Android។

* រាល់ព័ត៌មានដែលផ្សាយចេញគឺអូតូស្វ័យប្រវត្តិ (Automatic) ទៅកាន់ ៣កន្លែងព្រមៗគ្នា៖

ទី១៖ បង្ហាញនៅលើគេហទំព័រ www.freshnewsasia.com ដែលមានចំនួនអ្នកចូលមើលជាប្រចាំក្នុងមួយថ្ងៃជាង៣០ម៉ឺន។ (ទិន្នន័យតាម Alexa)
ទី២៖ បាញ់ទៅកាន់ទូរស័ព្ទដៃ ដែលមានអ្នកប្រើប្រាស់ក្បែរ៨៣ម៉ឺននាក់។ (មានតារាងចំនួនអ្នកប្រើប្រាស់)
ទី៣៖ Share ទៅកាន់ Faceboook ដែលមានចំនួនជាង១.៥លាននាក់។ (ចំនួនមាននៅលើ Facebook)

Fresh News មានអ្នកយកព័ត៌មាន ដែលមានបទពិសោធន៍យូរឆ្នាំ លើវិស័យព័ត៌មាន នឹងខិតខំអស់ពីកម្លាំងកាយចិត្ត ដើម្បីប្រមូលយកព័ត៌មានពីគ្រប់ទីកន្លែង និងគ្រប់តថភាពសង្គមទាំងអស់ ចែកជូនប្រជាពលរដ្ឋ កម្ពុជាគ្រប់ស្រទាប់វណ្ណៈ។ Fresh News ក៏សូមធ្វើជាអ្នកឆ្លើយឆ្លង ពាំនាំព័ត៌មានគ្រប់បែបយ៉ាងពីប្រជាពលរដ្ឋ ទៅកាន់មន្រ្តីរាជរដ្ឋាភិបាល និងពីមន្រ្តីរាជរដ្ឋាភិបាល ទៅកាន់ប្រជាពលរដ្ឋវិញផងដែរ។ Fresh News ក៏មានព័ត៌មានជាភាសាអង់គ្លេស (English Version) សម្រាប់ពង្រីកព័ត៌មានរបស់កម្ពុជាទៅកាន់ពិភពលោកឲ្យដឹង។

Fresh News សូមទទួលស្វាគមន៍ និងចុះផ្សាយរាល់ព័ត៌មាន ដែលបានកើតមាននៅតាមទីកន្លែងនានា ពីប្រជាពលរដ្ឋកម្ពុជា ដោយអាចផ្ញើមកកាន់ E-mail: appfreshnews@gmail.com និង ទូរស័ព្ទលេខ៖ ០១៧ ៦០៨ ០០៦។ អង្គភាពយើងខ្ញុំ ក៏ទទួលស្វាគមន៍រាល់ការរិះគន់ នានាពីមិត្តអ្នកអាន ដើម្បីនូវភាពចន្លោះប្រហោង របស់យើងខ្ញុំ៕

Fresh News

នាវាយក្ស ២គ្រឿង ដឹកភ្ញៀវទេសចរជាង ២ពាន់នាក់ ចូលចតនៅកំពង់ផែព្រះសីហនុ

(ព្រះសីហនុ)៖ កំពង់ផែស្វយ័តខេត្តព្រះសីហនុ បានបញ្ជាក់ថា នៅវេលាម៉ោង ៧ព្រឹក ថ្ងៃទី១២ ខែមករា ឆ្នាំ២០១៧នេះ នាវាទេសចរណ៍ខ្នាតយក្សចំនួន ២គ្រឿង បានចូលចតនៅកំពង់ផែស្វយ័តក្រុងព្រះសីហនុ រួមជាមួយអ្នកដំណើរ និងភ្ញៀវទេសចរជាង ២ពាន់នាក់។

កំពង់ផែស្វយ័តខេត្តព្រះសីហនុ បានឲ្យដឹងថា នាវាទី១ ឈ្មោះ SEABOURN SOJOURN ផ្ទុកអ្នកដំណើរចំនួន «៤៤៩នាក់ (ស្រី២១៦នាក់)» មាន ២៥សញ្ជាតិ ក្នុងនោះភ្ញៀវអាមេរិក ២១០នាក់ និងភ្ញៀវអង់គ្លេស ៧៨នាក់ រួមទាំងនាវិក និងអ្នកបម្រើការចំនួន ៣៥០នាក់ (ស្រី៩៧នាក់)។ នាវានេះ មានបណ្តោយ ១៩៨ម៉ែត្រ ទទឹង២៦ម៉ែត្រ ជម្រៅ ទឹក៦.៤ម៉ែត្រ។

នាវាទី២ ឈ្មោះ COSTA VICTORIA ផ្ទុកអ្នកដំណើរ និង ភ្ញៀវទេសចរចំនួន ១,៩២៨នាក់ រួមទាំងនាវិក និងអ្នកបម្រើការចំនួន ៧១៨នាក់។ នាវាទាំងពីរ ដែលចូលចតនៅកំពង់ផែស្វយ័តក្រុងព្រះសីហនុនេះ ជានាវាទី៣ និងទី៤ ហើយ សម្រាប់ដើមឆ្នាំ២០១៧នេះ។

របាយការណ៍ខាងលើបានបន្ថែមថា នាវាទាំងពីរនេះ បានចេញដំណើរមកពីកំពង់ផែ Laem Chabang ប្រទេសថៃ ហើយនឹងចាកចេញពីកំពង់ផែស្វយ័តក្រុងព្រះសីហនុនៅម៉ោង ៩យប់ថ្ងៃដដែល ដោយនាវាទី១ បន្តដំណើរឆ្ពោះទៅកាន់កំពង់ផែ Hochiminh និងនាវាទី២ បន្តទៅកាន់កំពង់ផែ Phu Quoc ប្រទេសវៀតណាម។

បើតាមលោកឧត្តមសេនីយ៍ទោ ជួន ណារិន ស្នងការនគរបាលខេត្តព្រះសីហនុ បានបញ្ជាក់ថា លោកបានចាត់កម្លាំងនគរបាលចេញប្រតិបត្តិការការពារសណ្ដាប់ធ្នាប់ និងការពារសុវត្ថិភាព ជូនភ្ញៀវទេសចរទាំងអស់ រួចជាស្រេចហើយ រហូតដល់នាវាទាំងពីរ ចាកចេញពីខេត្តព្រះសីហនុ៕

Fresh News

កប៉ាល់ផ្ទុកយន្តហោះចម្បាំង ឆ្លងកាត់ច្រកសមុទ្រតៃវ៉ាន់ ក្រោយពេលមានភាពតានតឹង

កប៉ាល់ផ្ទុកយន្តហោះចំបាំង និងកប៉ាល់ចំបាំងចិន ជាច្រើនគ្រឿង បានធ្វើដំណើរឆ្លងកាត់ ច្រកសមុទ្ររបស់កោះតៃវ៉ាន់។ នេះបើតាមការបញ្ជាក់របស់ ក្រសួងការពារជាតិតៃវ៉ាន់។

កប៉ាល់ផ្ទុកយន្តហោះ ឈ្មោះ ឡាំងនីង (Liaoning) បានវិលត្រឡប់មកវិញ បន្ទាប់ពីធ្វើសមយុទ្ធ នៅសមុទ្រចិនខាងត្បូង និងបានបើកឆ្លងកាត់ ច្រកសមុទ្រកោះតៃវ៉ាន់ ក្រោយពេលមាន ភាពតានតឹង។

ក្រសួងការពារជាតិតៃវ៉ាន់ បានអោយដឹងថា កប៉ា់ល់នេះ មិនបានបើកចូលដែនទឹក របស់កោះតៃវ៉ាន់នោះទេ ប៉ុន្តែបើកឆ្លងកាត់តំបន់ ដែនអាកាសរបស់តៃវ៉ាន់។

វាគឺជាការធ្វើអោយឡើងកំដៅ កាន់តែខ្លាំងឡើង បន្ទាប់ពីមានភាពតានតឹង រវាងប្រទេសជិតខាង ទាំងពីរនេះ ហើយអាជ្ញាធរតៃវ៉ាន់ បានស្នើអោយសាធារណជន បន្តភាពស្ងប់ស្ងៀម។

ចិន ចាត់ទុក កោះតៃវ៉ាន់ ដែលមានរដ្ឋាភិបាលគ្រប់គ្រងខ្លួនឯង គឺជាផ្នែកមួយនៃទឹកដីរបស់ចិន ហើយចិន បានអះអាងថា នឹងបញ្ជូលទឹកដីទាំងពីរ ជាមួយគ្នា ដោយប្រើកំលាំងកងទ័ព ក្នុងករណីចាំបាច់។

ភាពតានតឹង បានចាប់ផ្តើមកើនឡើង ចាប់តាំងពី ប្រធានាធិបតី ជាប់ឆ្នោតថ្មីអាមេរិក ដូណាល់ ត្រាំ បានបញ្ចប់អនុស្សរណៈ ផ្នែកការទូតជាមួយចិន ហើយលោត្រាំ ក៍បានទទួលទូរស័ព្ទ អបអរសាទរពី ប្រធានាធិបតីតៃវ៉ាន់ សៃ អ៊ីងវិន (Tsai Ing-wen) ៕

CEN

រុស្ស៊ីប្រាប់អាមេរិកថា ខ្លួនជួយអស់លទ្ធភាពហើយក្នុងការកម្ទេចក្រុមរដ្ឋឥស្លាមនៅស៊ីរី

ប្រមុខការពារជាតិរុស្ស៊ី Sergei Shoigu បានប្រតិកម្មខ្លាំងៗទៅនឹងការអធិប្បាយរបស់រដ្ឋមន្ត្រីការពារជាតិអាមេរិក Ashton Carter លើកឡើងថា យុទ្ធនាការប្រឆាំងក្រុមជ្រុលនិយមរដ្ឋឥស្លាមរបស់រុស្ស៊ីនៅស៊ីរី សឹងតែមិនទទួលបានលទ្ធផលអ្វីទាំងអស់ និងទុកឲ្យអាមេរិកជាអ្នកដោះស្រាយតែម្នាក់ឯង។ លើសពីនោះ ប្រមុខការពារជាតិរុស្ស៊ី ក៏ប្រាប់ឲ្យលោក Carter ត្រូវចេះប្រយ័ត្ន ពេលធ្វើការវាយតម្លៃស្ថានការណ៍ផងដែរ។

រដ្ឋមន្ត្រីការពារជាតិរុស្ស៊ី Sergei Shoigu បានរិះគន់សមភាគីអាមេរិក Ashton Carter ដែលចាត់ទុកយុទ្ធនាការប្រឆាំងភេវកម្មរបស់រុស្ស៊ីនៅស៊ីរី ថាមិនទទួលបានអ្វីសោះ។ ក្នុងកិច្ចប្រជុំជាមួយមន្ត្រីក្រសួងការពារជាតិរុស្ស៊ីនៅថ្ងៃទី១០ ខែមករា លោក Shoigu និយាយថា លោក Carter ច្រឡំប្រទេសហើយ ដែលចាត់ទុករុស្ស៊ីមិនជួយអ្វីសោះនោះ ហើយលោក Carter ផ្ទាល់ត្រូវប្រយ័ត្នប្រយែងពេលនិយាយលើកក្រោយៗ។

ក្នុងបទសម្ភាសន៍ជាមួយទូរទស្សន៍ NBC នៅថ្ងៃទី៨ ខែមករា រដ្ឋមន្ត្រីការពារជាតិអាមេរិកអះអាងថា រុស្ស៊ី មិនបានជួយអ្វីឡើយ។ ពោល គឺរុស្ស៊ី ចូលមកស៊ីរី និងនិយាយថា ពួកគេនឹងប្រយុទ្ធក្រុមជ្រុលនិយមរដ្ឋឥស្លាម និងជួយដោះស្រាយជម្លោះនៅស៊ីរី។ ប៉ុន្តែរុស្ស៊ី មិនបានធ្វើអ្វីទេ ហើយចុងក្រោយនោះ អាមេរិកត្រូវប្រយុទ្ធនឹងក្រុមរដ្ឋឥស្លាមតែម្នាក់ឯង។ ហើយរុស្ស៊ី វាយប្រហារតែគោលដៅក្រុមឧទ្ទាមប្រឆាំងមួយចំនួន ដែលរុស្ស៊ីចាត់ទុកជាក្រុមរដ្ឋឥស្លាម ឬជាប់ពាក់ព័ន្ធក្រុមនេះប៉ុណ្ណោះ។

ប្រមុខការពារជាតិរុស្ស៊ី Sergei Shoigu បានទាត់ចោលការលើកឡើងខាងលើនេះ និងបានគូសបញ្ជាក់ថា កងទ័ពអាកាសរុស្ស៊ី បានបំពេញតាមបទបញ្ជាដែលទទួលបាន ខណៈដែលសម្ព័ន្ធមិត្តអន្តរជាតិដឹកនាំមុខដោយអាមេរិក បានត្រឹមធ្វើឲ្យស្ថានការណ៍កាន់តែអាក្រក់ប៉ុណ្ណោះ។ ទន្ទឹមគ្នានេះ លោក ក៏បានលើកឡើងពីការប្រឹងប្រែងរបស់កងទ័ពរុស្ស៊ីទាំងអស់ ដែលព្យាយាមកម្ចាត់ក្រុមជ្រុលនិយមរដ្ឋឥស្លាម។

«យើងសម្រេចបានគោលដៅ ដែលអគ្គមេបញ្ជាការកំពូលកំណត់កាលពីឆ្នាំមុន។ បើទោះជានេះជារឿងលំបាកសម្រាប់យើង ហើយយើងត្រូវការជំនួយពីអន្តរជាតិក៏ដោយ យើងមិនដែលទទួលជំនួយឡើយ។ ម្យ៉ាងទៀត ប្រតិបត្តិការនេះ តម្រូវឲ្យយើងបញ្ចេញគ្រប់កម្លាំងទាំងអស់រួមទាំងការបញ្ជូននាវាមួយក្រុមធំទៅកាន់ស៊ីរី ពង្រាយកងកម្លាំងអាកាស និងមន្ត្រីប៉ូលិសយោធាទៀតផង»។ នេះជាការលើកឡើងរបស់លោក Shoigu ទាក់ទងនឹងការព្យាយាមរបស់រុស្ស៊ីដែលចេញផ្សាយក្នុងសារព័ត៌មាន RT ។

តាំងពីដើមទីមក ក្រុងមូស្គូ និងក្រុងវ៉ាស៊ីនតោន មានទស្សនៈ និងគោលដៅផ្ទុយគ្នាលើទាំងជម្លោះនៅស៊ីរី និងការប្រយុទ្ធប្រឆាំងក្រុមជ្រុលនិយមរដ្ឋឥស្លាម។ អាមេរិក ចោទរុស្ស៊ីថា គិតតែជួយការពាររបបប្រធានាធិបតីអាសាដ និងវាយប្រហារតែគោលដៅក្រុមឧទ្ទាមប្រឆាំង។ ឯរុស្ស៊ីឆ្លើយវិញថា អាមេរិកមិនជួយសហការដើម្បីកំណត់មុខសញ្ញាក្រុមឧទ្ទាម ឬក្រុមជ្រុលនិយមឲ្យច្បាស់ឡើយ គឺគិតតែរឿងទម្លាក់លោក អាសាដ ពីតំណែងប្រធានាធិបតីប៉ុណ្ណោះ៕

ថ្មីៗ
អត្ថបទ : តន ចាន់រិទ្ធារ៉ា

ក្រៅពីរម្លឹកមរតកនយោបាយ អូបាម៉ា អរគុណនិងលាប្រជាជនអាមេរិកក្នុងសុន្ទរកថាចុងក្រោយ

ប្រធានាធិបតីជិតផុតអាណត្តិ លោក បារ៉ាក់ អូបាម៉ា បានផ្តល់សុន្ទរកថាជាលើកចុងក្រោយទៅកាន់ប្រជាជនអាមេរិកមុនលោកផ្ទេរអំណាចនៅថ្ងៃ ២០ មករាខាងមុខ។ ថ្លែងសុន្ទរថាប្រកបដោយមនោសញ្ចេតនា និងអារម្មណ៍ជ្រាលជ្រៅបំផុតនោះ ប្រធានាធិបតីស្បែកខ្មៅដែលអ្នកផងទាំងពួងចូលចិត្តនេះផ្តោតអារម្មណ៍លើបញ្ហាជាច្រើនតាំងពីបញ្ហានយោបាយក្នុងស្រុង ដល់បញ្ហាសន្តិសុខ,បញ្ហាបរិស្ថាន និង សមិទ្ធផលនយោបាយដែលលោកម្រេចបានក្នុងរយៈពេល៨ឆ្នាំមកនេះ។

សូមស្តាប់ពត៌មានលម្អិត

សុន្ទរកថាចុងក្រោយរបស់ប្រធានាធិបតីលោក បារ៉ាក់ អូបាម៉ា បានក្លាយជាសារមួយដ៏សំខាន់សម្រាប់ប្រជាជនអាមេរិកនិងប្រជាជនទាំងអស់លើពិភពលោក។ ក្នុងពិធីថ្លែងសុន្ទរកថានេះ ស្ត្រីទីមួយលោកស្រី Michelle Obama, អនុប្រធានាធិបតី Joe Biden, បណ្តាមន្ត្រីដែលបំពេញការងារជាមួយលោក បារ៉ាក់ អូបាម៉ា សុទ្ធតែមានវត្តមាន។ ហើយសុន្ទរកថាចុងក្រោយបង្កប់ដោយមនោសញ្ចេតនា និងអារម្មណ៍ជ្រាលជ្រៅបំផុត ហើយវាបង្ហាញពីភាពអាឡោះអាល័យនៅពេលដែលប្រធានាធិបតីទី ៤៤ ត្រូវចាកចេញនៅប៉ុន្មានថ្ងៃខាងមុខ។

សុន្ទរកថាចុងក្រោយនេះ ក្រៅពីរំលឹកឡើងវិញសមិទ្ធផលទាំងអម្បាលម៉ានដែលលោកសម្រេចបានក្នុងពេល ៨ឆ្នាំ លោកបានទាញយកបញ្ហាប្រឈមដែលត្រូវដោះស្រាយ។ ប៉ុន្តែប្រធានាធិបតីរូបនេះនៅតែបង្ហាញសុទិដ្ឋិនិយមចំពោះសហរដ្ឋអាមេរិកដោយលោកបន្តជំរុញឲ្យប្រជាជនអាមេរិកបន្តចូលរួមឲ្យសកម្មក្នុងរឿងនយោបាយ និងបន្តជឿជាក់លើ«ប្រព័ន្ធប្រជាធិបតេយ្យ»។ លោកបញ្ចប់សុន្ទរកថាដោយប្រើពាក្យស្លោក «Yes we can. Yes we did. Yes we can»។

១.«Chicago» កន្លែងមានអនុស្សាវរីយ៍ច្រើនសម្រាប់លោក អូបាម៉ា

លោក បារ៉ាក់ អូបាម៉ា បានជ្រើសរើសយកទីក្រុង Chicago ដើម្បីផ្តល់សុន្ទរកថាចុងក្រោយ មុនចេញលោកចាកពីតំណែង។ តាមពិតទៅប្រធានាធិបតីរូបនេះបានត្រឡប់ទៅកាន់ទីក្រុង Chicago ជាកន្លែងដែលលោកប្រកាសជ័យជម្នះក្នុងឆ្នាំ ២០០៨។ ហើយអ្វីដែលធ្វើឲ្យ Chicago ជាកន្លែងពិសេសសម្រាប់លោកគឺ វាក៏ជាស្រុកកំណើត, ជាកន្លែងដែលលោកបានជួបលោកស្រី Michelle Obama និងជាកន្លែងដែលចាប់ផ្តើមការងារសាធារណៈមុនឈានទៅក្លាយជាសមាជិកព្រឹទ្ធសភាដែរ។

២. អូបាម៉ា រំលឹកសមិទ្ធផលសំខាន់ៗ ៨ឆ្នាំ

ប្រធានាធិបតី អូបាម៉ា បានឆ្លៀតលើកឡើងពីសមិទ្ធផលសំខាន់ៗដែលរដ្ឋបាលលោកសម្រេចក្នុងពេល ៨ឆ្នាំ។ សមិទ្ធផលនេះមិនត្រឹមត្រូវជួយប្រជាជនអាមេរិកឲ្យរួចផុតពីបញ្ហាលំបាកសេដ្ឋកិច្ចនិងសង្គមប៉ុណ្ណោះទេ តែវាជួយរក្សាសន្តិសុខផងដល់ប្រជាជនអាមេរិកដែរ។

រឿងសមិទ្ធផលសេដ្ឋកិច្ច គេចាំបានច្បាស់ថា ប្រធានាធិបតីរូបនេះចូលកាន់តំណែងពេលដែលសេដ្ឋកិច្ចអាមេរិកស្ថិតក្នុងវិបត្តិ។ រដ្ឋបាលលោកបានប្រឹងប្រែងធ្វើគ្រប់បែបយ៉ាងដើម្បីស្ថារសេដ្ឋកិច្ចនេះឡើងវិញនិងកាត់បន្ថយអត្រាអ្នកគ្មានការងារធ្វើដ៏ច្រើនសន្ធឹកសន្ធាប់នោះ។

សមិទ្ធផលសំខាន់ផ្សេងទៀត ដែល បារ៉ាក់ អូបាម៉ា បានលើកឡើងដែរនោះមានការភ្ជាប់ទំនាក់ទំនងការទូតជាមួយគុយបាវិញ, ការសម្រេចបានកិច្ចព្រមព្រៀងនុយក្លេអ៊ែរអ៊ីរ៉ង់, គាំទ្រកិច្ចព្រមព្រៀងអាកាសធាតុក្រុងប៉ារីស និងការកម្ចាត់ក្រុមភេរវជនក្នុងនោះមានការសម្លាប់មេខ្លោងក្រុមអាល់កៃដា អូសាម៉ា ប៊ិនឡាដិន។

រឿងប្រឆាំងភេរវកម្ម លោកបានឆ្លៀតអួតអាងថា រដ្ឋបាលលោកបានកម្ចាត់ក្រុមភេរវជនរាប់ម៉ឺននាក់ហើយសម្ព័ន្ធអន្តរជាតិប្រឆាំងក្រុមរដ្ឋឥស្លាមបានកម្ចាត់មេខ្លោងក្រុមនេះជាបន្តបន្ទាប់និងបានដណ្តើមទឹកដីបានពាក់កណ្តាលពីនេះ។ លោកប្រកាសប្រាប់អ្នកចូលរួមដោយមានជំនឿចិត្តខ្ពស់ ថាក្រុមនេះនឹងត្រូវកម្ចាត់ចោលឆាប់ៗ ហើយ«រាល់អ្នកដែលគំរាមកំហែងអាមេរិកមិនដែលនៅបានសុខសាន្តឡើយ»។

៣.អូបាម៉ា នៅបារម្ភពីបញ្ហារើសអើងពូជសាសន៍ ពណ៌សម្បុរស្បែកក្នុងសង្គមអាមេរិក

ក្រៅពីការជាប់ឆ្នោតរបស់លោក ដូណាល់ ត្រាំ រឿងមួយទៀតដែលធ្វើឲ្យលោក អូបាម៉ា ខ្វាយខ្វល់គឺ «ការរើសអើងជាតិសាសន៍និងពណ៌សម្បុរស្បែក»នៅបន្តចាក់ស្រេះក្នុងសង្គមអាមេរិក។

គេធ្លាប់គិតថា សមាជិកព្រឹទ្ធស្បែកខ្មៅ បារ៉ាក់ អូបាម៉ា ជាប់ឆ្នោតជាប្រធានាធិបតីឆ្នាំ ២០០៨ ប្រហែលជាថ្ងៃអវសាន្តនៃការរើសអើងជាតិសាសន៍និងពណ៌សម្បុរស្បែកហើយ។ តែ ៨ឆ្នាំមកនេះ បញ្ហាដ៏ស្មុគស្មាញនេះនៃតែលងបន្លាចអាមេរិកទៀត។

ក្នុងពេលសុន្ទរកថា លោក អូបាម៉ា ទទួលស្គាល់ថា បែកខ្ញែកគ្នារឿងជាតិសាសន៍និងព៌ណសម្បុរស្បែកនេះនៅតែធ្ងន់ធ្ងរក្នុងសង្គមអាមេរិក ដែលចាំបាច់ត្រូវកែប្រែ។

«ក្រោយពេលខ្ញុំជាប់ឆ្នោត វាមានការជជែកគ្នាពីការប្រែប្រួលបញ្ហាជាតិសាសន៍ក្នុងសង្គមអាមេរិក (Post-racial America)។ ប៉ុន្តែការយល់ឃើញនេះមិនកើតឡើងពិតប្រាកដឡើយ។ បញ្ហាពូជសាសន៍នៅតែជាកម្លាំងដ៏ខ្លាំងបង្កឲ្យមានការបែកខ្ញែកគ្នាក្នុងសង្គមយើង។ ជារួមខ្ញុំមើលឃើញថា វាមានការប្រសើរឡើងជាង ១០ ឬ២០ឆ្នាំមុន។ ប៉ុន្តែ យើងមិនទាន់ទៅដល់កន្លែងដែលយើងត្រូវទៅឡើយ»។

៤ .អូបាម៉ា ទទូចឲ្យប្រជាជនបន្តជឿជាក់លើ «ប្រជាធិបតេយ្យ» និងប្រឡូកក្នុងនយោបាយ

ក្នុងពេលថ្លែងសុន្ទរកថានេះ ប្រធានាធិបតីជិតផុតអាណត្តិលោក បារ៉ាក់ អូបាម៉ា បានផ្តាំផ្ញើឲ្យប្រជាជនអាមេរិកបន្តការជឿជាក់លើរបបប្រជាធិបតេយ្យ ដោយបន្តចូលរួមឲ្យបានសកម្មក្នុងបញ្ហានយោបាយនិងឈរឈ្មោះប្រកួតយកតំណែងនយោបាយជាដើម។ ហើយលោកបានអះអាងថា «ឈ្នះឬចាញ់ក្នុងនយោបាយ» ជារឿងធម្មតាក្នុងបរិបទប្រជាធិបតេយ្យ។

លោកក៏ជំរុញឲ្យប្រជាជនអាមេរិកទាំងអស់ចូលរួមប្រកួតប្រជែងដោយឈរឈ្មោះដើម្បីកាន់កាប់មុខងារនយោបាយដើម្បីកែប្រែបញ្ហាប្រឈម បើសិនមិនពេញចិត្តចំពោះមន្ត្រីដែលជាតំណាងរបស់ខ្លួននោះ។

៥. អូបាម៉ា ប្រាប់មន្ត្រីរបស់លោក៖ «អ្នកបានផ្លាស់ប្តូរពិភពលោក»

នៅក្នុងពេលនោះដែរ លោក បារ៉ាក់ អូបាម៉ា បានយកពេលចុងក្រោយនៃសុន្ទរកថាដើម្បីបង្ហាញការដឹងគុណ និងអរគុណដល់មិត្តរួមការងារនិងជាមន្ត្រីក្នុងរដ្ឋបាលលោកជាពិសេសឆ្លៀតឱកាសថ្លែងអំណរគុណអនុប្រធានាធិបតីJoe Bidenផង។ លោកបានប្រាប់ពួកគេដែលមានវត្តមាននៅទីនោះថា ពួកគេបានជួយបានផ្លាស់ប្តូរពិភពលោក។

«អ្នកទាំងអស់គ្នាបានផ្លាស់ប្តូរពិភពលោក»។ លោក អូបាម៉ា ថ្លែងចប់ អ្នកចូលរួមនាំគ្នាជូតទឹកភ្នែក។

បន្តមកទៀតលោកបានអំពាវនាវឲ្យប្រជាជនអាមេរិកជឿជាក់លើប្រទេសជាតិ ហើយលោកបានប្រាប់អ្នកចូលរួមថាលោកមានសុទិដ្ឋិនិយមចំពោះការវិវត្តនៃសហរដ្ឋអាមេរិក។

«ខ្ញុំចាកចេញពីឆាកនៅយប់នេះដោយមានសុទិដ្ឋិនិយមចំពោះសហរដ្ឋអាមេរិកជាងពេលខ្ញុំចាប់ផ្តើមដំបូង។ ខ្ញុំសុំឲ្យអ្នកទាំងអស់គ្នាជឿជាក់។ មិនមែនលើសមត្ថភាពរបស់ខ្ញុំក្នុងការបង្កើតឲ្យមានការផ្លាស់ប្តូរឡើយ តែជឿជាក់លើសមត្ថភាពរបស់អ្នក»។

លោកបានបញ្ចប់សុន្ទរកថា ដោយលើកយកពាក្យស្លោកដែលលោកធ្លាប់ប្រើក្នុងពេលឃោសនាបោះឆ្នោត។ ដែលពាក្យស្លោកនោះគឹ«Yes we can. Yes we did. Yes we can»៕

ថ្មីៗ
អត្ថបទ : ថ្មីៗ

ឥណ្ឌាបើកមហោស្រពវប្បធម៌នៅកម្ពុជា ផ្លូវការ

ភ្នំពេញ៖ ក្រសួងវប្បធម៌ឥណ្ឌា តាមរយៈស្ថានទូតឥណ្ឌាប្រចាំកម្ពុជា បានបើកមហោស្រពវប្បធម៌ឥណ្ឌា ចាប់ពីថ្ងៃទី១០ ខែមករា រហូតដល់ថ្ងៃទី១០ ខែកុម្ភៈ ឆ្នាំ២០១៧ ក្នុងរាជធានីភ្នំពេញ សៀមរាប និងខេត្តបាត់ដំបង។

លោក Naveen Srivastava ឯកអគ្គរដ្ឋទូតឥណ្ឌាប្រចាំកម្ពុជា បានប្រាប់ហេតុផលដែលឥណ្ឌា រៀបចំមហោស្រពវប្បធម៌នៅកម្ពុជា ពីព្រោះឥណ្ឌាចង់រឹតចំណងមិត្តភាពរវាងប្រទេស និងប្រជាជនប្រទេសទាំងពីរដែលមានទំនាក់ទំនងជាង ២ពាន់រហូតមក។

លោកឯកអគ្គរដ្ឋទូតឥណ្ឌា បង្ហើបទៀតថា មហោស្រពវប្បធម៌ដែលនឹងប្រព្រឹត្តឡើងក្នុងខេត្ត បាត់ដំបងជាលើកទីមួយនេះ ស្របតាមគោលនយោបាយផ្សព្វផ្សាយវប្បធម៌រវាងរដ្ឋាភិបាលឥណ្ឌាជាមួយរដ្ឋាភិបាលប្រទេសក្នុងតំបន់ រួមទាំងកម្ពុជាផង។

ដោយសហការជាមួយក្រសួងទេសចរណ៍ និងក្រសួងវប្បធម៌ និងវិចិត្រសិល្បៈកម្ពុជា ឯកអគ្គរដ្ឋទូតប្រទេសមហាអំណាចសេដ្ឋកិច្ចទីពីរនៅអាស៊ីរូបនេះ បានបញ្ជាក់ដូច្នេះថា៖«យើងចង់ឲ្យ ប្រជាជនប្រទេសទាំងពីរ ពិសេសគឺ យុវជនជំនាន់ក្រោយ យល់ដឹងពីវប្បធម៌ អរិយធម៌ដែលយើងបានផ្សារភ្ជាប់កន្លងមក ថែមទៀត»។

មហោស្រពដែលបើកឲ្យសាធារណជនចូលទស្សនាដោយសេរី រួមមាន ការសម្តែងរបាំបុរាណរាមាយណៈ របាំបុរាណកាតាក់ឥណ្ឌា របាំប្រពៃណីម៉ានងារ ពិធីបុណ្យព្រះពុទ្ធសាសនា និងបុណ្យអាហារ ជាដើម។ ពិធីបើកព្រឹត្តិការណ៍មហោស្រពឥណ្ឌាបានប្រព្រឹត្តឡើង កាលពីល្ងាចថ្ងៃទី១០ ខែមករា ឆ្នាំ២០១៧ នាមហោស្រពចតុមុខ រាជធានីភ្នំពេញ ដោយមានការសម្តែង រាមាយណៈ (រាមកេរ្តិ៍) សម្តែងដោយក្រុមសិប្បៈល្បីល្បាញ Kalakshetra និងភ្ញៀវកិត្តិយសជាតិ អន្តរជាតិជាង ៤០០នាក់ចូលទស្សនា នៅថ្ងៃដំបូង។

ក្រៅគោលបំណងរឹតចំណងអរិយធម៌ភាគីទាំងពីរ លោក Naveen Srivastava បន្ថែមថា ឥណ្ឌាចូលរួមសាទរខួប ២៥ឆ្នាំ នៃទំនាក់ទំនង ការទូតឥណ្ឌា និងអាស៊ានដែលកម្ពុជាជាសមាជិកអាស៊ានមួយ តែងចូលរួមជួយជ្រោមជ្រែងបេសសកម្មការបរទេសឥណ្ឌាក្នុងតំបន់អាស៊ាន។

លោកឯកអគ្គរដ្ឋទូតសង្ឃឹមថា ពលរដ្ឋខ្មែរ ពិសេសគឺ យុវជនចាប់អារម្មណ៍ស្វែងយល់ពីមហោស្រពវប្បធម៌ដែលមានស្រាប់ថែមទៀត។ តាមឯកអគ្គរដ្ឋទូតឥណ្ឌា ទេសចរឥណ្ឌាជាង ១៨លាននាក់បានធ្វើដំណើរក្រៅប្រទេស ក្នុងនោះ ឥណ្ឌាជាង ៣លាននាក់មកតំបន់អាស៊ាន និងជាង ៣ម៉ឺននាក់មកកម្ពុជា ក្នុងឆ្នាំ២០១៤ ។ កន្លងទៅ រដ្ឋមន្ត្រីទេសចរណ៍លោក ថោង ខុន រំពឹងថា កម្ពុជានឹងទទួលភ្ញៀវទេសចរអន្តរជាតិជាង ៧លាននាក់ ក្នុងឆ្នាំ ២០២០ ក្នុងនោះ ទេសចរឥណ្ឌាជាង ១សែននាក់៕

ថ្មីៗ
អត្ថបទ : រឿន ភារុន

នៅសល់តែ១០ថ្ងៃទៀតប៉ុណ្ណោះ បុរសដែលមេបក្សប្រឆាំងនៅកម្ពុជាហៅថាជនផ្តាច់ការ នឹងឡើងកាន់តំណែងជាមេដឹកនាំមហាអំណាចពិភពលោក

(អាមេរិក)៖ ថ្ងៃឡើងកាន់តំណែងប្រធានាធិបតីថ្មី របស់សហរដ្ឋអាមេរិក ដែលជាប្រទេសកំពូលប្រជាធិបតេយ្យ និងមហាអំណាចលើពិភពលោក ត្រូវបានរៀបចំឡើងក្នុងរយៈពេលបួនឆ្នាំម្តង។ ព្រឹត្តិការណ៍នេះត្រូវបានរៀបចំឡើង បន្ទាប់ពីព្រឹត្តិការណ៍បោះឆ្នោតជ្រើសរើសប្រធានាធិបតីអាមេរិក កាលពីថ្ងៃទី០៩ ខែវិច្ឆិកាកន្លងទៅ។ នៅថ្ងៃទី២០ ខែមករាខាងមុខនេះលោក ដូ ណាល់ត្រាំ ដែលមេបក្សប្រឆាំងនៅកម្ពុជាលោក សម រង្ស៊ី ហៅថាជាជនផ្តាច់ការនោះ នឹងត្រូវស្បថចូលកាន់តំណែងជាមេដឹកនាំមហាអំណាចពិភពលោក។

តាមរយៈគេហទំព័រព័ត៌មាន «ខេមបូឌា ដេលី» ចេញផ្សាយនៅពេលបោះឆ្នោតនៅអាមេរិក លោក សម រង្ស៊ី បានលើកឡើងថា «លោកស្រី គ្លីនតុន មានការអប់រំខ្ពស់ជាង មានចិត្តទូលាយជាងប្រកបដោយ បរិយាប័នជាង។ លោកស្រីហាក់យកចិត្តទុកដាក់ខ្លាំងជាងចំពោះសន្តិសុខសង្គម។ ផ្ទុយទៅវិញ លោក ត្រាំ ដែលមានអត្តចរិតច្រឡោត និងឆេវឆាវ ហាក់មានគ្រោះថ្នាក់ សម្រាប់សន្តិភាពពិភពលោក»។ លោក សម រង្ស៊ី បានបន្តយ៉ាងដូច្នេះ «បក្សីដែលមានរោមដូចគ្នា វានៅផ្ដុំជាមួយគ្នា។ លោក ត្រាំ ហាក់ជឿជាក់លើអំណាចផ្ដាច់ការ របស់លុយ ហើយលោក ហ៊ុន សែន ហាក់ជឿជាក់អំណាចផ្ដាច់ការរបស់កាំភ្លើងបូករួមជាមួយនឹងលុយ។ ត្រាំ និងលោក ហ៊ុន សែន ពិតជាមិនមែនអ្នក ប្រជាធិបតេយ្យនោះទេ»។

កម្មវិធីស្បថចូលកាន់តំណែងរបស់បុរសដែលត្រូវលោក សម រង្ស៊ី ចោទថា ជាជនផ្តាច់ការនោះ នឹងប្រព្រឹត្តទៅនាពេលរសៀលថ្ងៃទី២០ ខែមករា ក្នុងរដ្ឋធានី Washington DC។ វាជាកម្មវិធីនៃការចាប់ផ្តើមអាណត្តិថ្មីរបស់ប្រធានាធិបតីជាប់ឆ្នោតអាមេរិក ដែលមានរយៈពេលបួនឆ្នាំ។ កម្មវិធីឡើងកាន់អំណាចនេះ ត្រូវបានរៀបចំឡើងសម្រាប់ការចាប់ផ្តើមអាណត្តិនីមួយៗ បើទោះបីជាប្រធានាធិបតីរូបនោះបន្តកាន់អំណាច ក្នុងរយៈពេលអាណត្តិទីពីរក៏ដោយក្តី។

ក្រៅពីកម្មវិធីស្បថចូលកាន់ដំណែង ការថ្លែងសន្ទរកថា និងកម្មវិធីផ្សេងៗនោះ ក៏មានការរៀបចំក្បួនព្យុះហយាត្រាតាមបណ្តោយដងវិថី Pennsylvania ផងដែរ។ ប្រធានាធិបតីថ្មី ទស្សនាការធ្វើព្យុះហយាត្រាដែលមានមនុស្សចូលរួមដង្ហែរាប់ពាន់នាក់។

* កាលបរិច្ឆេទ៖
កម្មវិធីតែងតាំងប្រធានាធិបតីទីមួយរបស់អាមេរិក គឺលោក George Washington ដែលត្រូវបានរៀបចំឡើងនៅថ្ងៃទី៣០ ខែមេសា ឆ្នាំ១៧៨៩ នៅសាលសហព័ន្ធ ក្នុងទីក្រុង ញ៉ូវយក ជាកន្លែងដែលលោកបានស្បថចូលកាន់ដំណែង។ តែចាប់តាំងពីឆ្នាំ១៧៩៣រហូតដល់ឆ្នាំ១៩៣៣ កម្មវិធីនេះត្រូវបានប្តូរទៅថ្ងៃទី០៤ ខែមីនា។ តែក្នុងករណីដែលថ្ងៃនោះត្រូវចំថ្ងៃអាទិត្យ គេនឹងលើកទៅថ្ងៃចន្ទវិញ គឺថ្ងៃទី០៥ ខែមិនា។

ក្រោយមកគឺឆ្នាំ១៩៣៧ ថ្ងៃឡើងកាន់ដំណែងប្រធានាធិបតីថ្មីរបស់អាមេរិក ត្រូវបានផ្លាស់ប្តូរទៅរសៀលថ្ងៃទី២០ ខែមករា ដោយរដ្ឋធម្មនុញ្ញអាមេរិក។ ប៉ុន្តែប្រសិនបើថ្ងៃទី២០ ខែមករា ត្រូវនឹងថ្ងៃអាទិត្យ ប្រធានាធិបតីតម្រូវឱ្យស្បថក្នុងលក្ខណៈឯកជនជាមួយប្រធានមន្ត្រីយុត្តិធម៌ប៉ុណ្ណោះ បន្ទាប់មកកម្មវិធីស្បថនៅមុខសារធារណជន ត្រូវលើកទៅថ្ងៃចន្ទដែលជាថ្ងៃបន្ទាប់ គឺត្រូវនឹងថ្ងៃទី២១ ខែមករា។

* អ្នកចូលរួម៖
ក្រៅពីសាធារណជន អ្នកចូលរួមក្នុងកម្មវិធីនេះ ជាទូទៅមានដូចជា សមាជិកសភា តុលាការកំពូល មន្ត្រីយោធាជាន់ខ្ពស់ អតីតប្រធានាធិបតី អ្នកទទួលបាន មេដាយកត្តិយស និងភ្ញៀវកិត្តិយសជាច្រើនរូបទៀត។ អតីតប្រធានាធិបតីមុនៗជាទូទៅក៏ចូលរួមក្នុងកម្មវិធីនេះផងដែរ លើកលែងតែក្នុងករណីដែលពួកគេស្លាប់។
កម្មវិធីនេះជាទូទៅ ត្រូវបានរៀបចំឡើងតាមទំនៀមទម្លាប់ច្រើនជាងតាមរដ្ឋធម្មនុញ្ញ លើកលែងតែការធ្វើពាក្យសម្បថ។

តាមទម្លាប់ប្រធានាធិបតីជាប់ឆ្នោតបានមកដល់សេតវិមាន ព្រមទាំងដំណើរការកម្មវិធីនេះរួមជាមួយវត្តមានប្រធានាធិបតីកំពុងកាន់អំណាច។ កម្មវិធីធ្វើពាក្យសម្បថត្រូវបានរៀបចំឡើងនៅវេលាម៉ោង១២ថ្ងៃត្រង់ ដោយមានប្រធានមន្ត្រីយុត្តិធម៌ជាអ្នកគ្រប់គ្រង។ យោធាអាមេរិកក៏បានចូលរួមក្នុងកម្មវិធីនេះផងដែរ ចាប់តាំងពីការឡើងកាន់អំណាចរបស់អតីតប្រធានាធិបតី Gorge Washington ដោយសារកាលនោះលោកជាមេបញ្ជាការយោធា។

* ទីកន្លែងរៀបចំពិធី៖
កម្មវិធីតែងតាំងប្រធានាធិបតី ស្ទើរទាំងអស់ត្រូវបានរៀបចំនៅវិមានកាពីតូល ក្នុងរដ្ឋធានីវ៉ាស៊ីនតោន។ ដោយឡែកចំពោះកម្មវិធីធ្វើពាក្យសម្បថវិញ វាអាស្រ័យទៅលើអាកាសធាតុ ដែលពេលខ្លះត្រូវបានរៀបចំ នៅខាងក្នុង ឬពេលខ្លះខាងក្រៅនៅខាងក្រៅវិមានកាពីតូល។ និយាយពីកម្មវិធីនៅខាងក្រៅអគារវិញ ពីមុនមកត្រូវបានរៀបចំឡើងនៅភាគខាងកើតផ្នែកខាងមុខនៃវិមាន។ តែចាប់តាំងពីខែមិថុនា ឆ្នាំ១៩៨០មក គណកម្មាធិកាបានសម្រេចផ្លាស់ប្តូរទៅភាគខាងលិច នៃវិមានវិញម្តងដើម្បីសន្សំថវិកា និងផ្តល់ទីតាំងធំទូលាយសម្រាប់អ្នកទស្សនា។

ឈានដល់អាណត្តិលោក Ronald Reagan អតីតប្រធានាធិបតីរូបនេះបានស្នើរៀបចំកម្មវិធីដោយបែរទៅមុខទៅទៅខាងលិចគឺទៅរដ្ឋ California ដែលជារដ្ឋកំណើតរបស់លោកវិញ។ ចាប់តាំងពីពេលនោះមក រាល់កម្មវិធីនៅខាងក្រៅវិមានត្រូវបានរៀបចំឡើង បែរមុខទៅទិសខាងលិច។

* អ្នករៀបចំកម្មវិធី៖
ចាប់តាំងពីឆ្នាំ១៩០១មក រាល់កម្មវិធីឡើងកាន់ដំណែង ត្រូវបានរៀបចំឡើងនៅរដ្ឋធានី សហរដ្ឋអាមេរិក ដោយគណកម្មាធិការសភា រួមទទួលបន្ទុកការឡើង កាន់ដំណែង។ គណកម្មាធិការរៀបចំការឡើងកាន់ដំណែងប្រធានាធិបតី ជាអង្គភាពស្របច្បាប់ ក្នុងការរៃអង្គាស និងចូលរួមមូលនិធីសម្រាប់ការរៀបចំ ព្រឹត្តិការណ៍ផ្សេងៗនៅក្នុងកម្មវិធី ជាក់ស្តែងដូចជា ការដើរព្យុះហយាត្រាជាដើម។

* ឥទិ្ធពលនៃកម្មវិធីចំពោះសាធារណជន៖
ថ្ងៃឡើងកាន់ដំណែងនេះ មិនមែនជាថ្ងៃឈប់សម្រាកជាសាធារណៈឡើយ ហើយប្រជាពលរដ្ឋភាគច្រើន នៅតែបន្តធ្វើការដូចធម្មតា។ សាលារៀន ហាងលក់ទំនិញ និងស្ថាប័នផ្សេងៗ ត្រូវបានបើកដំណើរការជាធម្មតា ខណៈដែលប្រព័ន្ធដឹកជញ្ជូន និងសេវាកម្មផ្សេងៗក៏ត្រូវប្រព្រឹត្តទៅតាមគម្រោងរបស់ខ្លួន។ ប៉ុន្តែវាអាចនឹងមានការផ្លាស់ប្តូរចំពោះប្រព័ន្ធផ្សព្វផ្សាយ ដោយសារគ្រប់ព័ត៌មានភាគច្រើននឹងផ្តោតទៅលើកម្មវិធីនេះទាំងស្រុង។

យ៉ាងនេះក្តី ថ្ងៃឡើងកាន់ដំណែងនេះ គឺជាថ្ងៃឈប់សម្រាកសម្រាប់បុគ្គលិកសហព័ន្ធ ដែលធ្វើការនៅ Washington DC ឬតំបន់ដែលស្ថិតនៅក្បែរនោះ ដោយការឈប់សម្រាកនេះ ដើម្បីក្នុងការកាត់បន្ថយការកកស្ទះចរាចរណ៍ក្នុងតំបន់ដែលត្រូវរៀបចំកម្មវិធីនេះ។

ចំណុចគួរឱ្យចាប់អារម្មណ៍នោះ គឺនៅក្នុងនិងជុំវិញរដ្ឋធានី Washington DC នឹងរងការរំខានជាខ្លាំងក្នុងជីវិតរស់នៅរបស់ប្រជាពលរដ្ឋ ទាំងក្នុងពេល ឬមុន និងក្រោយថ្ងៃឡើងកាន់ដំណែង។ វាមិនមែនដោយសារការរៀបចំកម្មវិធី និងការដើរព្យុះហយាត្រាប៉ុណ្ណោះទេ ប៉ុន្តែដោយសារការធ្វើបាតុកម្មផ្សេងៗ ដែលត្រូវបានរៀបចំឡើងនៅថ្ងៃនោះផងដែរ៕

Fresh News

Facebook បង្កើតគំរោងថ្មី ដើម្បីលើកស្ទួយទំនាក់ទំនង ជាមួយបណ្តាញសារព័ត៌មាននានា និងទប់ស្កាត់ព័ត៌មានឆបោក

(អាមេរិក)៖ ក្រុមហ៊ុន Facebook Inc បានបង្កើតគំរោងថ្មីមួយឈ្មោះថា «Journalism Project» នៅថ្ងៃព្រហស្បតិ៍នេះដោយសារតែក្រុមហ៊ុនបណ្តាញទំនងទំនងសង្គមដ៏ធំជាងគេលើពិភពលោកមួយនេះកំពុងព្យាយាមធ្វើឲ្យទំនាក់ទំនងរបស់ខ្លួនជាមួយនឹងបណ្តាស្ថាប័នព័ត៌មាននានាមានភាពស៊ីជម្រៅជាងមុនកាន់តែខ្លាំង។ នេះបើតាមការចេញផ្សាយដោយទីភ្នាក់ងារព័ត៌មាន Reuters នៅមុននេះបន្តិចនាព្រឹកថ្ងៃព្រហស្បតិ៍ ទី១២ ខែមករា ឆ្នាំ២០១៧។

Facebook បានឲ្យដឹងថាក្រុមហ៊ុននឹងចូលរួមសហការជាមួយបណ្តាស្ថាប័នជាភាគីទីបីដើម្បីលើកកម្ពស់ «អក្ខរកម្មព័ត៌មាន» និងជួយដល់អ្នកប្រើប្រាស់ចំនួនប្រហែលជាង ២ពាន់លាននាក់របស់ខ្លួនក្នុងការសម្រេចចិត្តជ្រើសរើសថាតើប្រភពពត៌មានណាមួយដែលអាចឲ្យជឿទុកចិត្តបាន ហើយបន្ថែមពីនេះក្រុមហ៊ុននឹងនៅតែបន្តធ្វើយ៉ាងណាដោះស្រាយ ជាមួយបញ្ហានៃការផ្សព្វផ្សាយដំណឹងឆបោកនៅលើបណ្តាញទំនាក់ទំនងសង្គមដ៏ធំនេះផងដែរ។

គួរបញ្ជាក់ថាសេចក្តីប្រកាសនេះត្រូវបានធ្វើឡើងមិនដល់មួយសប្តាហ៍នោះឡើយ បន្ទាប់ពីក្រុមហ៊ុន Facebook បានអះអាងថាកំពុងចរចាជាមួយអតីតអ្នកសារព័ត៌មាន ក៏ដូចជាអ្នកសម្របសម្រួលកម្មវិធីនៃស្ថានីយ៍ទូរទស្សន៍ CNN គឺលោកស្រី Campbell Brown ដើម្បីឲ្យមកធ្វើជាអ្នកដឹកនាំក្រុមនៃភាពជាដៃគូព័ត៌មានរបស់ក្រុមហ៊ុន៕

Fresh News

ថៃ នរៈសត្យា មិនការពារ ថៃ នរៈវិទូ រឿងពាក់ព័ន្ធគ្រឿងញៀន

ក្រោយការចាប់ខ្លួនលោក ថៃ នរៈវិទូ ជាអតីតតារាសម្ដែង និងជាអតីតហ្វ្រេស៊ី លោកថៃ នរៈសត្យាជាឪពុក ដែលមាននាទីជារដ្ឋលេខាធិការបស់ក្រសួងវប្បធម៌ និងវិចិត្រសិល្បៈ បានអះអាងថាលោកមិនលូកដៃក្នុងរឿងកូនប្រុសត្រូវតុលាការខេត្តបាត់ដំបងចោទប្រកាន់ពីបទពាក់ព័ន្ធរឿងគ្រឿងញៀននៅនោះឡើយ។ យ៉ាងណាមិញ លោកថាទឹកចិត្តជាឪពុក គឺអាណិត ហើយឈឺចាប់ តែមិនអាចល្មើសច្បាប់បណ្ដាលឲ្យមានការរិះគន់នោះឡើយ។

លោកបានផ្ដល់សម្ភាសន៍ថា លោកមិនបានដឹងរឿងពាក់ព័ន្ធនឹងរឿងកូនប្រុស ភ្លើតភ្លើនរហូតបានក្លាយជាបក្សពួករបស់ក្រុមអ្នកជួញដូរគ្រឿងញៀននៅខេត្តបាត់ដំបងនោះទេ ដោយសារតែពេលកន្លងមកលោក និងលោក ថៃ នរៈវិទូ ជាកូនប្រុស ស្ថិតនៅក្រៅបន្ទុកពីគ្នាចាប់តាំងពីលោករៀបការឲ្យកូនប្រុសមានគ្រួសាររៀងខ្លួន។ លោកថាការងាររវល់ គឺជាមូលហេតុដែលមិនអាចឲ្យលោកបានដឹងស៊ីជម្រៅពាក់ព័ន្ធនឹងរឿងកូនប្រុស ប៉ុន្តែលោកក៏មិនបានប្រកែកថាលោក ថៃ នរៈវិទូ រងការប្រកាន់ ហើយមិនបានពាក់ព័ន្ធនឹងរឿងជួញដូរគ្រឿងញៀននោះឡើយ។ លោកថា មិនមានគម្រោងជួយដោះកូនប្រុសពីការចោទប្រកាន់នោះទេ បើទោះជាលោកមាននាទីជាមន្ត្រីដែលមានឥទ្ធិពលម្នាក់នៅក្នុងក្រសួងមួយ។

លោកនិយាយថា៖ «ទឹកចិត្តឪពុកបានត្រឹមតែអាណិត តែបើឲ្យខ្ញុំទៅធ្វើអីខុសនឹងច្បាប់ខ្ញុំមិនធ្វើទេ ខ្ញុំទុកសិទ្ធិអោយតុលាការគាត់ដោះស្រាយ ធ្វើមិចបើកូនយើងចឹង!»។

លោកបដិសេធឡើងទៅខេត្តបាត់ដំបង ទៅមើលកូនប្រុសដែលត្រូវអាជ្ញាធរចាប់ខ្លួន ដោយថាវត្តមានរបស់លោកនឹងអាចធ្វើឲ្យចំណាត់ការផ្លូវច្បាប់មានភាពស្ទាក់ស្ទើរ ឬទើសទាល់សម្រាប់ក្រុមសមត្ថកិច្ច។ លោកថា ខ្លួនបានត្រឹមតែមានតំណាងគ្រួសារឡើងទៅមើលដើម្បីជួយលើកទឹកចិត្តដល់កូនប្រុសកុំឲ្យឯកោប៉ុណ្ណោះ តែសម្រាប់វិធានការការពារកូនប្រុសអោយនៅក្រៅឃុំគឺលោកមិនធ្វើនោះទេ ដើម្បីបញ្ចៀសនូវការរិះគន់។

លោកនិយាយថា៖ «លូវហ្នឹងខ្ញុំមានការទៅប្រជុំនៅខេត្តផ្សេង រឿងហ្នឹងប្រហែលគ្រួសារខ្ញុំ(ប្រពន្ធ កូន) ទៅមើល តែមិនមែនទៅដោះស្រាយទេ គឺយើងទុកអោយច្បាប់គាត់ចាត់ចែង សម្រាប់ខ្ញុំជាឪពុក ខ្ញុំអត់ចង់ឃើញកូនត្រូវជាប់ឃុំចឹងទេ ហើយក៏រឹតមិនចង់អោយកូនប្រុសស្អុយឈ្មោះចឹងទៀត តែធ្វើមិចបើច្បាប់រកឃើញចឹង ចឹងយើងរង់ចាំស្ដាប់ការដោះស្រាយរបស់ច្បាប់វិញ យើងអត់ទៅធ្វើអ្វីលើសពីនិតិវិធីច្បាប់បានទេ!»។

លោកមិនហ៊ានរំពឹងថាលោក ថៃ នរៈវិទូ រួចផុតពីការចោទប្រកាន់នោះទេ បន្ទាប់ពីខាងសមត្ថកិច្ចរកឃើញជនពាក់ព័ន្ធគ្រឿងញៀនមួយក្រុមធំនៅខេត្តបាត់ដំបងមានគ្នា៦នាក់ ហើយក្រោយសារភាពគឺលោកថៃ នរៈវិទូ ក៏ជាបក្សពួកក្នុងរឿងប្រើប្រាស់ និងចែកកចាយគ្រឿងញៀនម្នាក់ដែរ។

លោកនិយាយថា៖ «ខ្ញុំអត់ដឹងថាគេ(ថៃ នរៈវិទូ) ធ្វើអីខ្លះទេរាល់ថ្ងៃ តែខ្ញុំអត់ថាកូនខ្ញុំត្រូវទេ ចាំមើលនិតិវិធីច្បាប់សិន!»។

យោងតាមព័ត៌មានចុះផ្សាយ គឺលោក ថៃ នរៈវិទូ និងបក្ស ពួកត្រូវបានមន្ត្រីប៉ូលីសខេត្តបាត់ដំបងចាប់បានកាលពីរសៀលថ្ងៃទី១០ខែមករា នៅក្នុងហាងមួយ ក្រោមការដឹកនាំដោយ លោក ប៉ង់ ចាន់សុយុទ្ធារា មន្ត្រីជាន់ខ្ពស់បង្រ្កាបគ្រឿងញៀននៅខេត្តបាត់ដំបង។

ព័ត៌មានផ្សាយថា ទីតាំងខារ៉ាអូខេយីហោ ដឺសោន ហ្វាមីលី (The Sound Family KTV) ត្រូវបានប៉ូលិសចុះបង្ក្រាប ហើយបានរកឃើញសារធាតុញៀនជាច្រើន និងមនុស្សពាក់ព័ន្ធចំនួន៦នាក់។

លោក ស៊ាន សុណាល់ នាយការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តបាត់ដំបងបានថ្លែងប្រាប់បណ្ដាញសារព័ត៌មានក្នុងស្រុកថា ជនសង្ស័យចំនួន៦នាក់ គឺទី១ឈ្មោះ ហេង យូសុង ភេទប្រុសអាយុ២៤ឆ្នាំរស់នៅភូមិ១៣មករា សង្កាត់ព្រែកព្រះស្តេច ក្រុងបាត់ដំបង។ ទី២ឈ្មោះ ថៃ នរៈពិទូ (អតីតតារាសម្ដែង) ភេទប្រុសអាយុ៣២ឆ្នាំ រស់នៅភូមិអូរឬស្សី២ ខណ្ឌប្រាំពីរមករា រាជធានីភ្នំពេញ។ ទី៣ឈ្មោះ ភា ប៊ុនហេង ភេទប្រុសអាយុ៣២ឆ្នាំរស់នៅភូមិព្រែកព្រះស្តេច សង្កាត់ព្រែកព្រះស្តេច ក្រុងបាត់ដំបង។ ទី៤ឈ្មោះ ហាប់ សុវត្ថិ ភេទប្រុសអាយុ២៩ឆ្នាំរស់នៅក្រុងបាត់ដំបង។ ទី៥ ឈ្មោះ អោក រតនះ ប៉ុណ្ណិកា ភេទស្រីអាយុ២៧ឆ្នាំរស់នៅសង្កាត់បឹងកក់២ ខណ្ឌទួលគោក រាជធានីភ្នំពេញ និង ទី៦ឈ្មោះ ហ៊ុន ម៉ាណេ ភេទស្រីអាយុ២៧ឆ្នាំស្នាក់នៅបន្ទប់ជួល ក្នុងភូមិរំចេក៤ សង្កាត់រតនះ ក្រុងបាត់ដំបង គឺជាមុខសញ្ញាដែលជាប់ពាក់ព័ន្ធនឹងការជួញដូរគ្រឿងញៀនទាំងនោះ។ លោកថា វត្ថុតាងដែលដកហូតបានរួមមាន ថ្នាំញៀនប្រភេទកេតាមីន(KETAMINEខេ) ៣ថង់ ទម្ងន់០,៨៨ក្រាម។ ឧបករណ៍ (ពុម្ភ) សំរាប់កែច្នៃថ្នាំញៀនអ៊ិស្តាស៊ីចំនួន២។ ថ្នាំអំពូលDiazepam ២អំពូល ថ្នាំគ្រាប់ ZEPAM ១៦បន្ទះ និងសម្ភារះវិចខ្ចប់ថ្នាំញៀនមួយចំនួនទៀត។

លោក ស៊ាន សុណាល់ ថា លោក ថៃ នរៈវិទូ និងជនសង្ស័យដែលត្រូវចាប់បាន៥រូបទៀត នឹងប្រឈមជាប់ពន្ធនាគារ ប្រសិនបើរកឃើញថាពិតជាជាប់ពាក់ព័ន្ធលើករណីចែកចាយគ្រឿងញៀនដូចអ្វីដែលបានចោទប្រកាន់។ អ៊ីចឹងហើយទើបម្នាក់ៗមានការកោតសរសើរ បន្ទាប់ពីលោកថៃ នរៈសត្យា ជាមន្ត្រីជាន់ខ្ពស់ ប្រកាសថាមិនការពារកូនប្រុសក្រោយការចាប់ខ្លួន ហើយទុកអោយច្បាប់ដោះស្រាយ៕

VOD
ដោយ លោក វង្ស សុម៉ាលីន

ប្រធានាធិបតីលោក បារ៉ាក់ អូបាម៉ា «ថ្លែងសុន្ទរកថាជាលើកចុងក្រោយ» លាហើយប្រជាជនអាមេរិក!

(វ៉ាស៊ីនតោន)៖ មុនពេលរៀបចំខ្លួនចាកចេញពីសេតវិមានប្រធានាធិបតីអាមេរិកលោក បារ៉ាក់ អូបាម៉ា បានធ្វើការថ្លែងសុន្ទរកថាដ៏រំជួលចិត្តជាលើកចុងក្រោយ នៅក្នុងឱកាសដើម្បីលាប្រជាជនអាមេរិកក្នុងនាមជាមេដឹកនាំកំពូលរបស់ប្រទេស។ នេះបើតាមការចេញផ្សាយដោយសារព័ត៌មាន Business Insider នៅមុននេះបន្តិចនាព្រឹកថ្ងៃពុធ ទី១១ ខែមករា ឆ្នាំ២០១៧។

លោកប្រធានាធិបតីអាមេរិកបានថ្លែងទៅកាន់អ្នកចូលរួមម្នាក់នៅឯទីក្រុង Chicago ដូច្នេះថា «អ្នកទាំងអស់គឺជាការផ្លាស់ប្តូរ... អ្នកបានឆ្លើយតបទៅនឹងសេចក្តីសង្ឃឹមរបស់មនុស្សរាល់គ្នា ហើយដោយសារតែអ្នក សហរដ្ឋអាមេរិកបានក្លាយជាកន្លែងដែលប្រសើរ និងរឹងមាំជាងមុននៅពេលដែលពួកយើងបានចាប់ផ្តើម»។

លោក បារ៉ាក់ អូបាម៉ា បានបញ្ចប់ការថ្លែងសុន្ទរកថា ជាមួយនឹងឃ្លាដ៏ល្បីល្បាញប្រចាំយុទ្ធនាការឃោសនាបោះឆ្នោតទាំងពីរលើករបស់រូបលោកថា «ពិតណាស់! យើងទាំងអស់គ្នាអាចធ្វើបាន។ ពិតណាស់! យើងបានធ្វើវា។ ពិតណាស់! យើងអាចធ្វើបាន»។ ទន្ទឹមគ្នានេះដែរប្រជាជនអាមេរិកទាំងអស់ដែលមានវត្តមាននៅទីនោះបានឆ្លើយតបទៅនឹងការថ្លែងសារដោយរួមគ្នាស្រែកដដែលៗថា «បួនឆ្នាំទៀតៗ» ប៉ុន្តែលោក អូបាម៉ា និយាយទាំងអស់សំណើចថា «ខ្ញុំមិនអាចធ្វើបែបនឹងបានទេ»។

នៅក្នុងឱកាសនោះដែរលោក បារ៉ាក់ អូបាម៉ា ក៏បានគូសបញ្ជាក់បន្ថែមថា «ខ្ញុំបានប្តេជ្ញាចំពោះប្រធានាធិបតីជាប់ឆ្នោតអាមេរិកលោក ដូណាល់ ត្រាំ ថាក្រុមរដ្ឋបាលរបស់ខ្ញុំ នឹងធានាឲ្យបាននូវការផ្ទេរអំណាចដ៏រលូនបំផុតមួយតាមតែអាចធ្វើទៅបាន ដូចកាលដែលអតីតប្រធានាធិបតី George W. Bush បានរៀបចំសម្រាប់ខ្ញុំ ក៏ប៉ុន្តែអ្វីៗគឺវាអាស្រ័យលើរូបយើងទាំងអស់ដើម្បីធានឲ្យបានថារដ្ឋាភិបាលរបស់ពួកយើងអាចជួយយើងដោះស្រាយបញ្ហាដែលយើងនៅតែកំពុងប្រឈម»។

គួរបញ្ជាក់ដែរនៅសល់តែ ១០ថ្ងៃទៀតប៉ុណ្ណោះលោក ដូណាល់ ត្រាំ នឹងស្បថចូលកាន់តំណែងជាប្រធានាធិបតីអាមេរិកទី ៤៥ ជាផ្លូវការហើយ៕

Fresh News

ដូណាល់ ត្រាំ តែងតាំកូនប្រសា ជាទីប្រឹក្សាជាន់ខ្ពស់នៅសេតវិមាន

លោកប្រធានាធិបតី ជាប់ឆ្នោតថ្មីអាមេរិក ដូណាល់ ត្រាំ បានតែងតែកូនប្រសារបស់ខ្លួន ឈ្មោះ Jared Kushner អោយធ្វើជាទីប្រឹក្សាជាន់ខ្ពស់ម្នាក់នៅសេតវិមាន។

Jared Kushner អាយុ ៣៥ឆ្នាំ នឹងទទួលរ៉ាប់រងធ្វើកិច្ចការសំខាន់ៗ នៅសេតវិមាន រួមមានទាំងធ្វើកិច្ចការគោលនយោបាយការបរទេស និងផ្ទៃក្នុងរបស់អាមេរិក។

ការតែងតាំងកូនប្រសារបស់ខ្លួន អោយកាន់តំណែងដ៍ធំនេះ ធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីលោក បារ៉ាក់ អូបាម៉ា ដែលនឹងផុតអាណត្តិនៅថ្ងៃទី ២០ មករា ខាងមុខ បានណែនាំអោយលោក ដូណាល់ ត្រាំ កុំអោយប៉ុនប៉ងយកសេតវិមាន ធ្វើជាកន្លែងដែល គ្រប់គ្រងជំនួញគ្រួសារ។

Jared Kushner ដែលជាស្វាមីរបស់ Ivanka Trump បានដើរតួយ៉ាងសំខាន់ ក្នុងយុទ្ធនាការបោះឆ្នោតកន្លងទៅ ដែលធ្វើអោយឪពុកក្មេករបស់ខ្លួនឈ្នះការបោះឆ្នោត ប្រធានាធិបតី។

ក្រោយពីមានការតែងតាំងនេះ គណបក្សប្រជាធិបតេយ្យ បានស្នើអោយលោក ដូណាល់ ត្រាំ ពិចារណាឡើងវិញអំពីការដាក់កូនប្រសារបស់ខ្លួន អោយកាន់តំណែងសំខាន់ នៅក្នុងសេតវិមាន ព្រោះវាជាអំពើបក្សពួកនិយម ហើយប្រឆាំងនឹងច្បាប់។

ប៉ុន្តែក្រុមសមាជិករបស់ លោក ដូណាល់ ត្រាំ បានបដិសេធចំពោះការលើកឡើងរបស់ បក្សប្រជាធិបតេយ្យ ហើយនិយាយថា ច្បាប់ដែលហាមឃាត់មិនអោយមន្ត្រី ផ្តល់ការងារដល់សាច់ញាតិ មិនត្រូវគេអនុវត្តន៍នៅសេតវិមាននោះទេ៕

CEN

សម្តេចតេជោ ហ៊ុន សែនៈ ការសម្ពោធអគារទីស្នាក់ការត្រួតពិនិត្យច្រកទ្វារព្រំដែនអន្តរជាតិត្រពាំងក្រៀល ដើម្បីពង្រឹងពង្រីកទំនាក់ទំនងរវាង កម្ពុជា ឡាវ

ភ្នំពេញ: សម្តេចនាយករដ្ឋមន្ត្រី ហ៊ុន សែន និងលោក ថងលូន ស៊ីស៊ូលីត នាយករដ្ឋមន្ត្រីឡាវ អញ្ជើញធ្វើជាអធិបតីរួមគ្នា ក្នុងពិធីសម្ពោធដាក់ ឲ្យប្រើប្រាស់ជាផ្លូវការ នូវអគារទីស្នាក់ការ ត្រួតពិនិត្យច្រកទ្វារព្រំដែន អន្តរជាតិរវាងកម្ពុជា (ត្រពាំងក្រៀល-ខេត្តស្ទឹងត្រែង) និងឡាវ (ច្រកណងណុកខៀន-ខេត្តចម្ប៉ាសាក់) នៅថ្ងៃទី១០ ខែមករា ឆ្នាំ២០១៧ នេះ។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងលោក ថងលូន ស៊ីស៊ូលីត នាយករដ្ឋមន្ត្រីឡាវ ថ្លែងសន្ទរកថា ក្នុងពិធីសម្ពោធ បន្ទាប់មក បានអញ្ជើញកាត់ខ្សែបូរ ដើម្បីដាក់ឲ្យប្រើប្រាស់ ជាផ្លូវការនូវអគារ ទីស្នាក់ការត្រួតពិនិត្យនេះ។

បន្ទាប់ពីពិធីសម្ពោធសម្តេចតេជោ ហ៊ុន សែន អញ្ជើញទៅទស្សនា ទំនប់វារីអគ្គិសនី ដនសាហុង ដែលមានទីតាំង នៅក្នុងខេត្តចម្ប៉ាសាក់។

ការបើកឲ្យប្រើប្រាស់ ច្រកទ្វារត្រួតពិនិត្យព្រំដែន ជាមួយសាធារណរដ្ឋ ប្រជាធិបតេយ្យ ប្រជាមានិតឡាវ ថ្មីនេះ បង្ហាញពីការរីកចំរើនថ្មីមួយ ក្នុងទំនាក់ទំនងទ្វេភាគី រវាងប្រទេសទាំងពីរ។ ការបើកឲ្យប្រើប្រាស់នេះ ក៏នឹងឆ្លើយតបផងដែរ ចំពោះតម្រូវការពង្រឹង ចំណងមិត្តភាព និងកិច្ចសហប្រតិបត្តិការ ព្រមទាំងជួយសម្រួល បន្ថែមទៀត ដល់ពាណិជ្ជកម្ម តាមព្រំដែន ទេសចរណ៍ និងការតភា្ជប់ រវាងប្រទេសទាំងពីរ។

សម្តេចតេជោ ហ៊ុន សែន បានមានប្រសាសន៍ថា រាជរដ្ឋាភិបាល និងប្រជាជនកម្ពុជា សូមធ្វើការវាយតម្លៃខ្ពស់ និងមានការពេញចិត្ត ពេញថ្លើម ចំពោះការរីកចំរើន ឥតឈប់ឈរ នៅទំនាក់ទំនងជាមិត្តភាព និងសហប្រតិបត្តិការ ប្រកបដោយផ្លែផ្កា លើគ្រប់វិស័យ រវាងប្រទេសទាំងពីរ កម្ពុជា ឡាវ ដែលជាប្រទេសភូមិផង របងតែមួយ មានប្រពៃណី សហការជួយឧបត្ថម្ភ គាំទ្រគ្នាទៅវិញទៅមក ប្រកបដោយភាពស្មោះសរ។

សម្តេចនាយករដ្ឋមន្ត្រី ហ៊ុន សែន បានថ្លែងថា កិច្ចសហការរៀបចំរួមគ្នា នូវពិធីសម្ពោធដាក់ ឲ្យប្រើប្រាស់នូវ អគារទីស្នាក់ការត្រួតពិនិត្យ ច្រកទ្វារព្រំដែនអន្តរជាតិ រវាងកម្ពុជា (ច្រកត្រពាំងក្រៀល-ខេត្តស្ទឹងត្រែង) និងឡាវ (ច្រកណងណុកខៀន-ខេត្តចម្ប៉ាសាក់) គឺជាសមទ្ធិផលថ្មី មួយទៀត ដើម្បីពង្រឹងពង្រីក ទំនាក់ទំនង រវាងប្រទេសទាំងពីរ កម្ពុជា ឡាវ។
អគារទីស្នាក់ការត្រួតពិនិត្យ ច្រកទ្វារព្រំដែនអន្តរជាតិនេះ បានតភ្ជាប់ទៅវិញទៅមក រវាងផ្លូវជាតិលេខ៧ របស់កម្ពុជា ជាមួយផ្លូវជាតិលេខ១៣ របស់ឡាវ ដែលជាច្រករបៀង ដឹកជញ្ជូនផ្លូវគោក ដ៏មានសក្តានុពល ក្នុងការតភ្ជាប់ ប្រទេសទាំងពីរ និងជាបណ្តាញគមនាគមន៍ តភ្ជាប់ រវាងកម្ពុជា ឡាវ វៀតណាម ព្រមទាំងបណ្តាប្រទេស នៅក្នុងតំបន់មេគង្គផងដែរ។

ការអភិវឌ្ឍន៍បណ្តាញ គមនាគមន៍តភ្ជាប់ រវាងប្រទេសទាំងពីរ ព្រមជាមួយនឹងការអភិវឌ្ឍន៍ ហេដ្ឋារចនាសម្ព័ន្ធ ត្រួតពិនិត្យការចេញ ចូល ឆ្លងកាត់ព្រំដែន ប្រកបដោយភាពងាយស្រួល គឺពិតជាបានចូលរួមបង្កើន ទំហំពាណិជ្ជកម្ម ការវិនិយោគ និងការដឹកជញ្ជូន ឆ្លងកាត់ព្រំដែន ការបង្កើនលំហូរ ភ្ញៀវទេសចរណ៍ រវាងប្រទេសទាំងពីរ ក៏ដូចជា ប្រទេសទី៣ ឆ្លងកាត់ព្រំដែន ព្រមទាំងជួយសម្រួល ដល់ការផ្លាស់ប្តូរ ទំនិញកសិផល ការបង្កើនទំនាក់ទំនង ផ្សាភ្ជាប់គ្នា រវាងប្រជាពលរដ្ឋ នៅតំបន់ព្រំដែន នៃប្រទេសទាំងពីរ ស្របតាមឆន្ទៈ និងការប្តេជ្ញាចិត្ត របស់ថ្នាក់ដឹកនាំ និងប្រជាជននៃ ប្រទេសទាំងពីរ កម្ពុជា ឡាវ៕

CEN
ដោយ: មុនីរាជ

មាតាធម្មជាតិត្រៀមប្តឹងនៅសឹង្ហបុរី និងបង្កើនយុទ្ធនាការប្រឆាំងការបូមខ្សាច់

វ៉ាស៊ីនតោន៖ ឃ្លីបវីដេអូរយៈពេលជាងពីរនាទីបង្ហាញពីសកម្មជនម្នាក់នៃអង្គការមាតាធម្មជាតិបានចោទជាសំណួរទៅរដ្ឋាភិបាលកម្ពុជាពីភាពមិនប្រក្រតីថ្មីក្នុងការនាំខ្សាច់ទៅប្រទេសឥណ្ឌា។

«ខ្ញុំសូមមានសំណួរថ្មីមួយទៀតទៅកាន់ក្រសួងសេដ្ឋកិច្ចនិងហិរញ្ញវត្ថុដូចតទៅ៖ ហេតុអ្វីបានជាតួលេខដែលមាតាធម្មជាតិទទួលបានមកពីគយ និងពន្ធដានៃប្រទេសឥណ្ឌាដែលបង្ហាញថាការនាំចេញខ្សាច់ពីប្រទេសកម្ពុជាមានចំនួន១០៨.៦៥៨តោន ដែលមានតម្លៃជាង ២លាន៨សែនដុល្លារសហរដ្ឋអាមេរិក ចាប់តាំងពីឆ្នាំ២០១៣ដល់២០១៥ តែឯកសារនៃនាយកដ្ឋានគយ និងពន្ធដានៃប្រទេសកម្ពុជាមិនបានបង្ហាញពីតួលេខ ដែលនាំខ្សាច់ទៅប្រទេសឥណ្ឌាទាល់តែស‍ោះ»។

Facebook API failed to initialize.
នេះគឺជាសំណួរដែលសួរដោយលោកថុន រដ្ឋា សកម្មជនបរិស្ថានវ័យក្មេងម្នាក់ ដែលបានលើកសំណួរនេះឡើងដោយកប់ខ្លួនក្នុងខ្សាច់រហូតត្រឹមកនៅក្បែរព្រែកជាប់មាត់សមុទ្រក្នុងខេត្តកោះកុង។

ការបង្ហាញថ្មីនេះកើតមានឡើង បន្ទាប់ពីក្រសួងរ៉ែ និងឋាមពលមិនបានផ្តល់ចម្លើយច្បាស់លាស់ទៅរដ្ឋសភាជាតិ ពាក់ព័ន្ធនឹងភាពខុសគ្នារវាងតួលេខនាំខ្សាច់ពីប្រទេសកម្ពុជាទៅសឹង្ហបុរីដែលអង្គការមាតាធម្មជាតិបានរកឃើញថា មានចំនួនជាង៧០លានតោន ក្នុងខណៈពេលដែលទិន្នន័យរបស់កម្ពុជាបង្ហាញថា មានតែជិត៣លានតោនតែប៉ុណ្ណោះ។

លោក ឌិត ទីណា អ្នកនាំពាក្យក្រសួងរ៉ែ និងថាមពល ថ្លែងក្នុងសន្និសីទស្តីពីការបំភ្លឺជូនគណៈកម្មការទី១០នៃរដ្ឋសភាជាតិកាលពីពាក់កណ្តាលខែធ្នូថា ក្រសួងរ៉ែ និងថាមពល មិនមែនជាស្ថាប័នផ្តាច់មុខតែមួយគត់ ដែលទទួលបន្ទុកការនាំចេញខ្សាច់នោះទេ។

លោកបន្ថែមថា ការនាំចេញខ្សាច់ត្រូវអនុវត្តតាមនីតិវិធីដោយឡែក និងផ្សេងពីគ្នាស្របតាមបទប្បញ្ញត្តិច្បាប់ពាក់ព័ន្ធ និងដោយស្ថាប័នមានសមត្ថកិច្ចផ្សេងគ្នា។ ចំណែកការកត់ត្រាពីការនាំចេញនាំចូល និងការកំណត់ប្រភេទទំនិញរបស់ប្រទេសនីមួយៗក៏មានវិធីសាស្ត្រខុសគ្នា ដែលលោកថាជាមូលហេតុធ្វើឲ្យចំនួននៃតួលេខដែលបានបង្ហាញពីប្រទេសនីមួយៗមានចំនួនខុសគ្នា។

«ពេលដែលប្រទេសនីមួយៗ គាត់មានវិធានប្រភពដើមខុសគ្នា ការកត់ត្រារបស់គាត់ក៏អាចខុសគ្នា មិនមែនខ្ញុំអ្នកនិយាយទេគឺ UN COMTRADE នៅក្នុង DATA Base (ទិន្នន័យ) គឺគាត់សរសេរខ្លួនឯង ហើយយើងក៏មិនដឹងថា ប្រព័ន្ធកត់ត្រារបស់សាំងហ្កាពួរយ៉ាងម៉េចដែរ ដូច្នេះហើយបើឲ្យក្រសួងមកវិភាគថា តើអ្នកណាខុសអ្នកណាត្រូវមានសាំងហ្កាពួរខុស កម្ពុជាខុស ឬមួយក៏ UN ខុស។ យើងមិនយកមកវិភាគបែបនេះទេ។ សូមឲ្យដឹងថា ម្នាក់ៗហើយប្រព័ន្ធនីមួយៗគេធ្វើឡើងសុទ្ធតែមានគោលដៅរបស់គេ ហើយសុទ្ធតែមានគោលការណ៍ក្នុងការប្រើប្រាស់របស់គេខុសៗគ្នា»។

រីឯករណីនាំខ្សាច់ទៅឥណ្ឌានេះត្រូវលោក ទីណា ប្រាប់សារព័ត៌មាន The Phnom Penh Post ថា វាអាចថាមានការនាំខ្សាច់កម្ពុជាបន្តពីសឹង្ហបុរីទៅប្រទេសដទៃ ហើយបើដូចនេះមែន វាមិនមែនជាកំហុសរបស់កម្ពុជាទេ។

ប៉ុន្តែស្ថាបនិកអង្គការមាតាធម្មជាតិគឺលោក អាឡិចសាន់ដ្រូ ហ្កុនហ្សាឡេសដាវីតសុន បានបញ្ជាក់ប្រាប់ វីអូអេ ថាឯកសារថ្មីដែលលោកទើបទទួលបានបង្ហាញថា ខ្សាច់ដែលឥណ្ឌានាំចូលគឺមានប្រភពនាំចេញផ្ទាល់ពីប្រទេសកម្ពុជា ដែលផ្ទុយពីការអះអាងរបស់មន្ត្រីរដ្ឋាភិបាល។

«ឯកសារដែលយើងមាននៅក្នុងដៃ គឺបញ្ជាក់ថាខ្សាច់នេះគឺប្រភពមកពីប្រទេសកម្ពុជា។ អីចឹងអ្វីដែលយើងកំពុងតែធ្វើហ្នឹងគឺក្រៅពីទិញឯកសារថ្មីមួយទៀតមកពីសឹង្ហបុរីដែលនិយាយអំពីករណីដែលអាចនឹងមាន គឺសឹង្ហបុរីនាំខ្សាច់ចូលពីកម្ពុជាយើងលក់តហ្នឹង យើងបានទិញ ហើយយើងឃើញថាសម្រាប់ឆ្នាំ២០១៤និង២០១៥ គឺមិនមានទ‍េ»។

លោកអាឡិច កំពុងប្រមូលឯកសារបន្ថែមទៀតដើម្បីឱ្យគេបង្ហាញឈ្មោះក្រុមហ៊ុនដែលនាំខ្សាច់ទាំងនោះមកប្រទេសឥណ្ឌា។

លោកអាឡិច ដែលត្រូវបានរដ្ឋាភិបាលហាមឃាត់មិនឱ្យចូលប្រទេសកម្ពុជាបញ្ជាក់ថា លោកកំពុងសិក្សាពីនីតិវិធីប្តឹងនៅតុលាការសឹង្ហបុរីប្រឆាំងនឹងក្រុមហ៊ុន ឬរដ្ឋាភិបាលសឹង្ហបុរីចំពោះការនាំខ្សាច់ចូលដោយខុសច្បាប់ក្នុងពេលកន្លងមក។

«ផ្លូវអាចមានពីរ។ ផ្លូវទីមួយគឺដាក់ពាក្យប្តឹងលើក្រុមហ៊ុនឯកជន ឬក៏ស្ថាប័នរបស់រដ្ឋាភិបាលពាក់ព័ន្ធនឹងការនាំចូលខ្សាច់ពីកម្ពុជា ដែលកម្ពុជានាំចេញដោយខុសច្បាប់ឬក៏គេហៅថារត់ពន្ធ ឬក៏ផ្លូវទីពីរដាក់ពាក្យប្តឹង ដោយសារខ្សាច់នេះបណ្តាលឱ្យមានផលប៉ះពាល់ធ្ងន់ធ្ងរលើបរិស្ថាននៅប្រទេសកម្ពុជា ជាពិសេសខេត្តកោះកុង ហើយក៏មានផលប៉ះពាល់យ៉ាងធ្ងន់ធ្ងរទៅលើជីវភាពរស់នៅប្រជាជនមូលដ្ឋានក្នុងខេត្តកោះកុង‍»។

ថ្មីៗ
អត្ថបទ : ម៉ែន គឹមសេង VOA

បុរសខ្លាំងហ្វីលីពីន៖ «មនោគមវិជ្ជារបស់ក្រុម ISIS បានចូលមកដល់ទឹកដីហ្វីលីពីនហើយ»

(ម៉ានីល)៖ ប្រធានាធិបតីហ្វីលីពីនលោក រ៉ូឌ្រីហ្គោ ឌូតឺតេ បានថ្លែងនៅថ្ងៃចន្ទនេះថា មនោគមវិជ្ជាដែលប្រកបដោយអំពើហិង្សាដ៏ឃោរឃៅរបស់ក្រុម ISIS បានចូលមកដល់ប្រទេសហ្វីលីពីនហើយ។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ិនហួរ នៅមុននេះបន្តិចនាល្ងាចថ្ងៃចន្ទ ទី០៩ ខែមករា ឆ្នាំ២០១៧។

ថ្លែងក្នុងពិធីមួយដែលប្រារព្ធឡើងនៅឯវិមានប្រធានាធិបតីលោក រ៉ូឌ្រីហ្គោ ឌូតឺតេ បាននិយាយថា «ពេលនេះពួកយើងទាំងអស់គ្នាបានទទួលស្គាល់ថាមនោគមវិជ្ជាបានមកដល់ទឹកដីប្រទេសហ្វីលីពីនហើយ»។ លោកប្រធានាធិបតីហ្វីលីពីនបានបន្ថែមថា បណ្តាក្រុមភេរវករកំពុងតែប្រើប្រាស់ការជួញដូរគ្រឿងញៀន ដើម្បីផ្គត់ផ្គង់បណ្តាញក្រុមរបស់ពួកគេនៅលើកោះ Mindanao ភាគខាងកើតហ្វីលីពីន។

ជាមួយគ្នានេះដែរមេបញ្ជាការប៉ូលិសជាតិហ្វីលីពីនលោក Ronald Dela Rosa បានថ្លែងក្នុងសន្និសីទសារព័ត៌មានមួយថា កងកម្លាំងការពារសន្តិសុខកំពុងតែឃ្លាំមើលយ៉ាងដិតដល់ចំពោះក្រុមភេរវកបរទេសចំនួនពី ០៥នាក់ ដល់១០នាក់ ដែលអាចមានវត្តមាននៅក្នុងប្រទេស ហើយលោកក៏បានបញ្ជាក់ដែរថា អាជ្ញាធរហ្វីលីពីនបានទទួលដំណឹងថា ក្រុមភេរវករបរទេសកំពុងតែហ្វឹកហ្វឺននៅហ្វីលីពីន មុននឹងត្រូវបញ្ជូនទៅកាន់ប្រទេស៊ីរី។

គួរបញ្ជាក់ដែរថាលោក រ៉ូឌ្រីហ្គោ ឌូតឺតេ បានបញ្ជាក់កាលពីថ្ងៃទី២៨ ខែវិច្ឆិកា ឆ្នាំ២០១៦ថាក្រុម ISIS មានទំនាក់ទំនងដោយផ្ទាល់ជាមួយក្រុមឧទ្ទាមអ៊ីស្លាម Maute ដែលនៅភាគខាងកើតហ្វីលីពីន៕

Fresh News

លោក ដូណាល់ ត្រាំ បញ្ជាឲ្យអគ្គរដ្ឋទូតទាំងអស់ ដែលតែងតាំងដោយលោក បារ៉ាក់ អូបាម៉ា លាលែងពីតំណែង និងត្រឡប់មកអាមេរិកវិញមុនថ្ងៃទី២០ ខែមករា

(អាមេរិក)៖ វាពិតប្រាកដណាស់ថា លោក ដូណាល់ ត្រាំ ប្រធានាធិបតីជាប់ឆ្នោតរបស់អាមេរិក បានចាប់ផ្តើមកែប្រែមុខមាត់នៃវិស័យការទូត របស់សហរដ្ឋអាមេរិក ចំពោះមុខអន្តរជាតិ ខណៈដែលលោកបានចេញបញ្ជាឲ្យអគ្គរដ្ឋទូតអាមេរិកទាំងអស់ នៅតាមបណ្តាប្រទេសនានា ដែលត្រូវបានតែងតាំងដោយលោក បារ៉ាក់ អូបាម៉ា ប្រធានាធិបតីជិតផុតអាណត្តិលាលែងពីតំណែង និងចាកចេញពីបណ្តាប្រទេសទាំងនោះឲ្យបានមុនថ្ងៃលោកឡើងកាន់តំណែងថ្ងៃទី២០ ខែមករា ខាងមុខនេះ។ នេះបើតាមការចេញផ្សាយដោយសារព័ត៌មាន Independent របស់អង់គ្លេស នាល្ងាចថ្ងៃចន្ទ ទី០៩ ខែមករា ឆ្នាំ២០១៧។

សារព័ត៌មានអឺរ៉ុបបានចេញផ្សាយថា វាជាហានិភ័យមួយសម្រាប់អាមេរិកក្នុងការបោះជំហានបែបនេះ ខណៈមន្ត្រីទូតថ្មីក៏មិនទាន់ត្រូវបានតែងតាំង ហើយអគ្គរដ្ឋទូតនៅតាមបណ្តាប្រទេសសំខាន់ៗដូចជា ចក្រភពអង់គ្លេស, អាល្លឺម៉ង់, និង កាណាដា ក៏ត្រូវដកចេញថែមទៀត ដែលជាហេតុធ្វើឲ្យក្រុមគ្រួសាររបស់ពួកគេពិបាកក្នុងការរកកន្លែងស្នាក់នៅ ពេលមកដល់អាមេរិកវិញ និងកិច្ចការងារការទូតសំខាន់ៗ អាចនឹងត្រូវរាំងស្ទះផងដែរ។

តាមការអះអាងពីក្រុមការងារអន្តរកាលរបស់លោក ត្រាំ អគ្គរដ្ឋទូតតាមបណ្តាប្រទេសជាច្រើន ត្រូវបានសម្រេចឲ្យលាលែងពីតំណែង តាមរយៈលិខិតបញ្ជាដែលត្រូវបានបញ្ជូនទៅកាន់ពួកគេតាំងពីថ្ងៃទី២៣ ខែធ្នូ ឆ្នាំ២០១៦ មកម្ល៉េះ។ មន្ត្រីជាន់ខ្ពស់តំណាងលោក ត្រាំ បានគូសបញ្ជាក់ថា «វាគ្មានអ្វីគួរឲ្យឈឺចាប់» សម្រាប់រឿងនេះឡើយ ដោយវាជារឿងធម្មតាដើម្បីធានាឲ្យបានថា មន្ត្រីដែលត្រូវបានតែងតាំងដោយលោក បារ៉ាក់ អូបាម៉ា នឹងអាចលាលែងចេញពីតំណែងឲ្យទាន់ពេលវេលាកំណត់។

គួរបញ្ជាក់ថា កន្លងមកលោក ត្រាំ ធ្លាប់បានបង្ហើបថាលោកនឹងតែងតាំងលោកមេធាវី David Friedman ធ្វើជាអគ្គរដ្ឋទូតអាមេរិកប្រចាំប្រទេសអ៊ីស្រាអែល និងអភិបាលរដ្ឋ Iowa លោក Terry Branstad ធ្វើជាអគ្គរដ្ឋទូតប្រចាំប្រទេសចិន។ ទោះបីជាបែបនេះក្តី អ្នកវិភាគបានលើកឡើងថា លោក ត្រាំ ទំនងជាមិនអាចធ្វើការតែងតាំងអគ្គរដ្ឋទូត ទៅតាមបណ្តាប្រទេសនានាឲ្យបានគ្រប់ចំនួន ទាន់ពេលដែលលោក ឡើងស្បថចូលកាន់តំណែងជាផ្លូវការនោះឡើយ។

ពាក់ព័ន្ធនឹងរឿងនេះ ប្រពន្ធទីមួយរបស់លោក ត្រាំ គឺលោកស្រី Ivana Trump បានបង្ហើបរួចទៅហើយថាលោកស្រី ចង់ធ្វើជាអគ្គរដ្ឋទូតអាមេរិកសាធារណរដ្ឋឆេក ប៉ុន្តែគេពុំទាន់ទទួលបានការបញ្ជាក់ជាផ្លូវការថាលោកស្រី នឹងអាចត្រូវតែងតាំងឬក៏អត់នោះទេ៕

Fresh News

ហាមមិនស្ដាប់! នាវាពិឃាដអាមេរិក បាញ់ព្រមានបីគ្រាប់សំដៅទៅរកនាវាល្បាតអ៊ីរ៉ង់ នៅតំបន់ឈូងសមុទ្រពែរ៍

(វ៉ាស៊ីនតោន)៖ នាវាពិឃាដអាមេរិក USS Mahan បានបាញ់ព្រមានចំនួនបីគ្រាប់សំដៅទៅរកនាវាល្បាតអ៊ីរ៉ង់បួនគ្រឿង បន្ទាប់ពីនាវាល្បាតទាំងនេះ បានបង្កើនល្បឿនកាន់តែលឿន ដោយមិនស្ដាប់ការព្រមាន ឆ្ពោះមកក្បែរនាវាពិឃាដអាមេរិក នៅក្នុងតំបន់ច្រក សមុទ្រ Hormuz នៃឈូងសមុទ្រពែរ៍ នៅថ្ងៃអាទិត្យ ម្សិលមិញ។ នេះបើតាមមន្ត្រីក្រសួងការពារអាមេរិកពីរនាក់ ថ្លែងប្រាប់ទីភ្នាក់ងារសារព័ត៌មាន Reuters នៅព្រលប់ថ្ងៃទី០៩ ខែមករា ឆ្នាំ២០១៧។

មន្ត្រីទាំងពីររូបខាងលើដែលថ្លែងប្រាប់ Reuters ក្នុងលក្ខខណ្ឌមិនបញ្ចេញឈ្មោះឲ្យដឹងថា នាវាពិឃាដអាមេរិក USS Mahan បានទំនាក់ទំនងជាមួយនាវាល្បាតអ៊ីរ៉ង់ តាមរយៈវិទ្យុទាក់ទង ក៏ប៉ុន្តែនាវាល្បាតទំាងបួនគ្រឿងរបស់ឆ្មាំអ៊ីរ៉ង់ មិនបានឆ្លើយតប ទៅនឹងការស្នើសុំឱ្យបន្ថយល្បឿននោះទេ តែផ្ទុយទៅវិញកាន់តែបង្កើនល្បឿនមកជិតនាវា USS Mahan ក្នុងចំងាយប្រហែលជា៨០០ម៉ែត្រ ជាហេតុបង្ខំឱ្យនាវាពិឃាដនេះ សម្រេចចិត្តបាញ់ព្រមានចំនួនបីគ្រាប់ ហើយឧទ្ធម្ភាគចក្រ នៃកងម៉ារីនអាមេរិក ក៏បានគម្រាមថានឹងបាញ់ផងដែរ បើសិននៅតែចូលមកជិត។ ដោយឡែកខាងភាគីអ៊ីរ៉ង មិនទាន់ធ្វើការអត្ថាធិប្បាយណា មួយនៅឡើយទេ ជុំវិញការអះអាងនេះ។

គួររំលឹកថា ករណីស្រដៀងគ្នានេះក៏ធ្លាប់បានកើតឡើង កាលពីខែសីហា ឆ្នាំ២០១៦ ដោយនៅកាលណោះ កងម៉ារីនអាមេរិក ក៏បានបាញ់ព្រមាននាវាល្បាតអ៊ីរ៉ង់ ដែលធ្វើដំណើរមកក្បែរនាវាអាមេរិកចំនួនពីរគ្រឿង ផងដែរ៕

Fresh News

កំពូលតារាចម្រៀង លោក ព្រាប សុវត្ថិ នឹងចូលរួមសម្ពោធហាង RAQIA REPUBLIC នៅថ្ងៃទី១៤ មករាខាងមុខនេះ

(ភ្នំពេញ)៖ RAQIA REPUBLIC ជាហាងដែលសំបូរបែប ដោយមានលក្ខណៈពិសេស យ៉ាងទំនើបទាន់សម័យ មានវត្ដមាននៅកម្ពុជាហើយ ដោយពេលព្រឹកមានលក់អាហារបែបអឺរ៉ុប និងក្វាហ្វេ រសជាតិឈ្ងុយឆ្ងាញ់ ពីអ៉ិតាលីសុទ្ធ១០០% ហើយពេលយប់មានអាហារ ស្រាក្រហម និងភេ្ជសជៈគ្រប់មុខ ជាមួយនឹងក្លឹបកំសាន្ដ ដែលមានតារា និង DJល្បីៗទាំងជាតិ និងអន្ដរជាតិផងដែរ ។

សម្រាប់នៅថ្ងៃបើកសម្ពោធហាង RAQIA REPUBLIC នៅថ្ងៃទី១៤ មករាខាងមុខនេះ នឹងមានវត្ដមានកំពូលតារាចម្រៀងដ៏ល្បីប្រចាំកម្ពុជា គឺលោក ព្រាប សុវត្ថិ និងមានការបញ្ចុះតម្លៃពិសេស គឺទិញមួយថែមមួយ គ្រប់មុខទាំងអស់។

កាន់តែពិសេសនោះ សម្រាប់អតិថិជនគ្រប់ស្រទាប់វណ្ណៈទាំងអស់ រួមទាំងយុវវ័យផងដែរ សូមមកពិសា Caffe Crepe មួយកែវ នឹងថែមជូនមួយកែវ ដោយឥតគិតថ្លៃ អាចពិសាបណ្ដើរ ពិភាក្សាការងារ ឬការសិក្សាបណ្ដើរ ជាមួយនឹងទីតាំងដែលរចនាយ៉ាងទាក់ទាញ ទីធ្លាធំទូលាយ និងអាចវេចខ្ចប់ក៏បាន ជាមួយនិងកំប៉ុងដ៏ស្រស់ស្អាត ពីហាង RAQIA REPUBLIC ហើយនៅរៀងរាល់ល្ងាច ក៏មានតន្ដ្រីហ្វីលីពីន កំដរយ៉ាងពិរោះរណ្ដំផងដែរ។

សូមចូលរួមគាំទ្រ និងពិសារអាហារ យ៉ាងសប្បាយរីករាយ ជាមួយនឹងការប្រគំតន្ដ្រីពិសេសៗ នៅហាងRAQIA REPUBLIC ដែលមានទីតាំងស្ថិតនៅ សង្កាត់ផ្សារថ្មី ខណ្ឌដូនពេញ រាជធានីភ្នំពេញ។

ព័ត៌មានលម្អិតសូមទំនាក់ទំនង ទៅកាន់ប្រព័ន្ធទូរស័ព្ទលេខ៖ ០៧០ ៤០៨ ៧១៩ និងចូលទៅកាន់Facebook ៖ Raqia Loungebar និងសូមចូលចុចទៅលើលីង (https://www.facebook.com/raqia.loungebar?fref=ts) ដើម្បីទស្សនាកម្មវិធីរបស់RAQIA REPUBLIC នៅពេលយប់៕

Fresh News

ធ្លាយព័ត៌មានសម្ងាត់៖ «ប្រទេសកូរ៉េខាងជើង បង្កើនចំនួនទ័ពដល់ ១.២៨លាននាក់ ជាប់លេខ ១ លើពិភពលោក!»

(សេអ៊ូល)៖ សៀវភៅសស្ដីពីវិស័យការពារជាតិឆ្នាំ២០១៦ ចុះផ្សាយនៅថ្ងៃអង្គារនេះ ដោយក្រសួងការពារជាតិកូរ៉េខាងត្បូងបានឱ្យដឹងថា កងទ័ពកូរ៉េខាងជើងបច្ចុប្បន្នមានចំនួនសរុបប្រមាណជា ១.២៨លាននាក់ (ជាប់លេខ ១ លើពិភពលោកគិតពីចំនួនកងទ័ព និងលេខ ៤ លើឥទ្ធិពលយោធា) ដោយកើនឡើង ៨០,០០០នាក់បន្ថែមក្នុងរយៈពេលពីរឆ្នាំ។ នេះបើតាមការចេញផ្សាយដោយទីភ្នាក់ងារសារព័ត៌មានយ៉ុនហាប់ នៅថ្ងៃអង្គារ ទី១០ ខែមករា ឆ្នាំ២០១៧។

សៀវភៅសនេះដដែលបានបញ្ជាក់ទៀតថា កូរ៉េខាងជើងបានបង្កើនចំនួនកងទ័ពថ្មើរជើងពី ១.០២នាក់ដល់ ១.១០លាននាក់ ខណៈកងទ័ពអាកាសហាក់ដូចជាត្រូវបានកាត់បន្ថយពី ១២០,០០០នាក់មកនៅត្រឹម ១១០,០០០នាក់រីឯកងទ័ពជើងទឹកមិនមានការប្រែប្រួលនោះទេគឺនៅចំនួនដដែល ៦០,០០០នាក់ ហើយនៅរយៈពេលប៉ុន្មានឆ្នាំចុងក្រោយនេះរបបដឹកនាំលោក គីម ជុងអ៊ុន បានបង្កើតអង្គភាពយោធាថ្មីពីរដែលទទួលបន្ទុកដឹកនាំវិស្វកម្មយោធា និងការសាងសង់ផ្លូវថ្នល់។

ដោយឡែកពាក់ព័ន្ធនឹងសមត្ថភាពនុយក្លេអ៊ែរ សៀវភៅសនេះបានគូសបញ្ជាក់ថាកូរ៉េខាងជើងមានសារធាតុភ្លុយតូនីញ៉ូមប្រមាណជា ៥០គីឡូក្រាម ដោយកើនឡើង ១០គីឡូក្រាមបើធៀបទៅនឹងឆ្នាំ២០០៨ ក៏ប៉ុន្តែការប៉ាន់ប្រមាណពីបរិមាណជាក់លាក់ មិនទាន់អាចត្រូវបានគេបញ្ជាក់ឱ្យច្បាស់លាស់ឡើយ ដោយ សារតែការចម្រាញ់សារធាតុភ្លុយតូនីញ៉ូម និងអ៊ុយរ៉ាញ៉ូមធ្វើឡើងជាសម្ងាត់៕

Fresh News

ជប៉ុនអះអាងថានឹងតាមដានជានិច្ច នូវរាល់ព័ត៌មានទាក់ទិននឹង «ការអភិវិឌ្ឍន៍គ្រាប់មីស៊ីលកូរ៉េខាងជើង»

(តូក្យូ)៖ ជប៉ុននឹងធ្វើការ តាមដាន ប្រមូល ក៏ដូចជាវិភាគរាល់ព័ត៌មានទាំងឡាយពាក់ព័ន្ធនឹងការបាញ់សាកល្បងគ្រាប់មីស៊ីល និងអាវុធនុយក្លេអ៊ែររបស់កូរ៉េខាងជើង ដោយយកចិត្តទុកដាក់ជាទីបំផុតចំពោះស្ថានភាពនៅក្នុងតំបន់នាពេលបច្ចុប្បន្ន។ នេះបើតាមអ្នកនាំពាក្យរដ្ឋាភិបាលជប៉ុន ដែលចុះផ្សាយដោយទីភ្នាក់ងារសារព័ត៌មាន Reuters នៅរសៀលថ្ងៃអង្គារ ទី១០ ខែមករា ឆ្នាំ២០១៧។

អ្នកនាំពាក្យរដ្ឋាភិបាលជប៉ុន លោក យូស៊ីហ៊ីដេ ស៊ូហ្គា (Yoshihide Suga) នៅក្នុងសន្និសីទសារព័ត៌មាន បានថ្លែងថា រដ្ឋាភិបាលទីក្រុងតូក្យូនឹងប្រើប្រាស់គ្រប់លទ្ធភាពតាមដែលអាចធ្វើទៅបាន ដើម្បីប្រកាសសញ្ញាអាសន្ន និងឃ្លំាមើលរាល់សកម្មភាពយោធារបស់កូរ៉េខាងជើង។

គួរបញ្ជាក់ថាកាលពីថ្ងៃអាទិត្យកន្លងទៅ កូរ៉េខាងជើងបានអះអាងថាអាចនឹងបាញ់សាកល្បងមីស៊ីលផ្លោងអន្តរទ្វីប ICBM នៅគ្រប់ពេលវេលា តាមបញ្ជាលោក គីម ជុងអ៊ុន ហើយថែមទាំងបញ្ជាក់ឡើងវិញដែរថា នយោបាយឈ្លានពានរបស់សហរដ្ឋអាមេរិក គឺជាមូលហេតុជំរុញឱ្យកូរ៉េខាងជើងត្រូវតែអភិវឌ្ឍន៍អាវុធនុយក្លេអ៊ែរ និងមីស៊ីលផ្លោងឱ្យខានតែបាន៕

Fresh News

ក្រោយ MoU រវាងកម្ពុជា-សិង្ហបុរី៖ កម្ពុជានឹងបញ្ជូន គ្រូបង្គោល៨០នាក់ ទៅសិក្សាជំនាញសំខាន់៣មុខ នៅប្រទេសសិង្ហបុរី

(ភ្នំពេញ)៖ បន្ទាប់ពីបញ្ចប់ការចុះអនុស្សណៈនៃការយោគយល់គ្នា រវាងក្រសួងការងារ និងបណ្ដុះបណ្ដាលវិជ្ជាជីវៈកម្ពុជា ជាមួយវិទ្យាស្ថានអប់រំបច្ចេកទេសសិង្ហបុរី នៅរសៀលថ្ងៃទី០៩ ខែមករា ឆ្នាំ២០១៧ នេះរួចនោះ រាជរដ្ឋាភិបាលកម្ពុជានឹងបញ្ជូនគ្រូបង្គោលចំនួន ៨០នាក់ ទៅសិក្សាជំនាញសំខាន់ៗចំនួន៣មុខ នៅប្រទេសសិង្ហបុរី, នេះបើតាមលោក ហេង សួរ អ្នកនាំពាក្យក្រសួងការងារ។

លោក ហេង សួរ បានបញ្ជាក់ថា «តាមរយៈអនុស្សណៈនេះ ប្រទេសសិង្ហបុរី នឹងបណ្តុះបណ្តាលគ្រូបង្គោល ផ្នែកបច្ចេកវិទ្យាចំនួន ៨០នាក់ ចំនួន៣សប្តាហ៍ នៅវិទ្យាស្ថានអប់រំបច្ចេកទេសសិង្ហបុរី លើ៣មុខជំនាញ រួមមាន៖ ១.ជំនាញទំនាកទំនងព័ត៌មានវិទ្យាចំនួន ៣២នាក់, ២.ជំនាញបច្ចេកវិទ្យាគ្រឿងយន្តចំនួន ៣២នាក់, ៣.ជំនាញអេឡិចត្រូនិកចំនួន ១៦នាក់»។

លោកអ្នកនាំពាក្យបានបន្តថា គ្រូបច្ចេកទេសដែលត្រូវបញ្ជូនទៅបណ្តុះបណ្តាល នៅប្រទេសិង្ហបុរីនោះ គឺជាគ្រូបច្ចេកទេសដែលកំពុងបង្រៀន នៅតាមគ្រឹះស្ថានអប់រំបណ្តុះបណ្តាលបច្ចេកទេសវិជ្ជាជីវៈ ក្រោមឱវាទក្រសួងការងារ និងបណ្តុះបណ្តាលវិជ្ជាជីវៈ។ លោកបានបន្ថែមថា ក្រោយការបណ្តុះបណ្តាល គ្រូបច្ចេកទេសបង្គោលទាំង ៨០នាក់នោះ ត្រូវមានកាតព្វកិច្ចបង្រៀនបន្ត ដល់គ្រូបច្ចេកទេសផ្សេងៗទៀត «ក្នុងអត្រាគ្រូបង្គោល ១នាក់ ត្រូវបង្រៀនបន្តដល់គ្រូបច្ចេកទេស ៣នាក់ផ្សេងទៀត»។

វិទ្យាស្ថានអប់រំបច្ចេកទេស (ITE) របស់សិង្ហបុរី គឺជាវិទ្យាស្ថានដ៏ល្បីល្បាញមួយទាំងក្នុងតំបន់ និងសកលលោក ពាក់ព័ន្ធនឹងផ្នែកអប់រំបច្ចេកទេសវិជ្ជាជីវៈ ហើយតាមរយៈអនុស្សណៈនេះ គុណភាពគ្រូបច្ចេកទេសវិជ្ជាជីវៈ លើ៣មុខជំនាញខាងលើ នឹងត្រូវបានពង្រឹង និងពង្រីកបន្ថែម ដើម្បីបំពេញ តាមតម្រូវការទីផ្សារការងារ ក៏ដូចជាជួយគាំទ្រដល់គោលនយោបាយអភិវឌ្ឍន៍វិស័យឧស្សាហកម្ម នៅកម្ពុជាផងដែរ។

សូមជម្រាបថា ក្នុងដំណើរទស្សនកិច្ចផ្លូវរដ្ឋរបស់លោកប្រធានាធិបតីសិង្ហបុរី តូនី តាន់ កេងយាំ នៅប្រទេសកម្ពុជា រយៈពេល៤ថ្ងៃ មានអនុស្សារណៈចំនួន២ ដែលត្រូវចុះហត្ថលេខាក្នុងនោះរួមមាន៖

ទី១.អនុស្សារណៈ ស្តីពីកិច្ចសហប្រតិបត្តិការលើវិស័យអប់រំ បណ្ដុះបណ្ដាលបច្ចេកទេស និងវិជ្ជាជីវៈ រវាងក្រសួងការងារកម្ពុជា ជាមួយវិទ្យាស្ថានអប់រំបច្ចេកទេសសិង្ហបុរី។
ទី២.ពិធីចុះហត្ថលេខាលើអនុស្សារណៈ រវាងមន្ទីរពេទ្យកាល់ម៉ែត្រ ជាមួយនឹងមន្ទីរពេទ្យ Tan Tock Seng ប្រទេសសិង្ហបុរី៕

Fresh News

កាសែតថ្មី

Menu