កាសែតថ្មី: អន្តរជាតិ

Showing posts with label អន្តរជាតិ. Show all posts

គ្រួសារជនរងគ្រោះដោយអំពើភេរវកម្ម នៅទីក្រុងប៉ារីស និងព្រុចសែលចោទបណ្តាញសង្គម Twitter ថាបានជួយក្រុមភេរវករ ISIS

(វ៉ាស៊ីនតោន)៖ ក្រុមគ្រួសារជនជាតិអាមេរិកបីនាក់ ដែលបានបាត់បង់ជីវិតដោយសារការវាយប្រហារភេរវកម្មរបស់ក្រុម ISIS នៅក្នុងទីក្រុងប៉ារីស ប្រទេសបារាំង និងទីក្រុងព្រុចសែល ប្រទេសប៊ែលហ្សិកបានសម្រេចចិត្តដាក់ពាក្យបណ្ដឹងបន្តឹងក្រុមហ៊ុន Twitter ទៅកាន់តុលាការដោយពួកគេចោទប្រកាន់ថា ក្រុមហ៊ុននៃបណ្ដាញទំនាក់ទំនងសង្គមដ៏ល្បីមួយនេះបានជួយដល់ក្រុម ISIS ពោលគឺបណ្ដោយឱ្យក្រុមភេរវករប្រើប្រាស់ Twitter ក្នុងការផ្ញើសាររបស់ពួកគេតាមអំពើចិត្ត។ នេះបើតាមការចេញផ្សាយដោយសារព័ត៌មាន Russian Today នៅថ្ងៃព្រហស្បតិ៍ ទី១២ ខែមករា ឆ្នាំ២០១៧។

ពាក្យបណ្ដឹងដែលបានដាក់ជូនតុលាការក្នុងទីក្រុងញូយ៉កប្រឆាំងនឹងក្រុមហ៊ុន Twitter ត្រូវបានធ្វើឡើងដោយក្រុមគ្រួសារជនជាតិអាមេរិកបីនាក់ ដែលសមាជិកគ្រួសាររបស់ពួកគេបានស្លាប់ នៅក្នុងការវាយប្រហារភេរវកម្មរបស់ក្រុម ISIS នៅទីក្រុងប៉ារីស កាលពីថ្ងៃ១៣ ខែវិច្ឆិកា ឆ្នាំ២០១៥ និងនៅអាកាសយានដ្ឋានទីក្រុងព្រុចសែល កាលពីថ្ងៃទី២២ ខែមីនា ឆ្នាំ២០១៦។ ម្យ៉ាងវិញទៀត ក្រុមគ្រួសារទំាងនេះបានចោទប្រកាន់ Twitter ថាជាអ្នកទទួលខុស ត្រូវលើការស្លាប់នៃសាច់ញាតិរបស់ពួកគេដោយសំអាងថា Twitter បានបណ្ដាយឱ្យក្រុមភេរវករប្រើប្រាស់បណ្ដាញទំនាក់ទំនងសង្គមរបស់ខ្លួន ដើម្បីផ្សព្វផ្សាយមនោគមវិជ្ជា និងការជ្រើសរើសសមាជិកថ្មី។

គួរបញ្ជាក់ថាបើតាមក្រុមគ្រួសារខាងលើ ក្រុមហ៊ុន Twitter បានរំលោភលើច្បាប់ប្រឆាំងភេរវកម្មរបស់សហរដ្ឋអាមេរិក ចំណែកឯការទាម ទារសំណងជំងឺចិត្តជាក់លាក់នឹងត្រូវកំណត់នៅពេលដំណើរការរឿងក្ដីនៅចំពោះមុខតុលាការ។ កាលពីខែសីហា ឆ្នាំ២០១៦ ក្រុមហ៊ុន Twitter បានសម្រេចចិត្តបិទគណនីអ្នកប្រើប្រាស់ជាង ៣៦០,០០០នាក់ដែលមានជាប់ពាក់ព័ន្ធនឹងការលើកទឹកចិត្តចំពោះសកម្មភាពភេរវកម្ម៕

Fresh News

អត់ទាន់កាន់តំណែងផង! បេក្ខជនរដ្ឋមន្រ្តីការបរទេសអាមេរិក ចោទចិនថា «ចង់ធ្វើដូចរុស្ស៊ីប្លន់យកតំបន់គ្រីមាពីអ៊ុយក្រែន ដោយក្រសោបយកកោះនានានៅសមុទ្រចិនខាងត្បូង»

(វ៉ាស៊ីនតោន)៖ បេក្ខជនរដ្ឋមន្រ្តីការបរទេសអាមេរិករបស់ប្រធានាធិបតីជាប់ឆ្នោតលោក ដូណាល់ ត្រាំ នៅថ្ងៃព្រហស្បតិ៍នេះបានតំរង់ទៅរកទិសដៅ ដែលអាចនឹងនាំឲ្យមានការប្រឈមមុខដាក់គ្នាដ៏សម្បើមមួយជាមួយទីក្រុងប៉េកាំង បន្ទាប់ពីបានសង្កត់ធ្ងន់ថា «ប្រទេសចិនគួរតែត្រូវបានបដិសេសចំពោះសិទ្ធិក្នុងការបង្ហាញវត្តមាននៅបណ្តាកោះដែលខ្លួនបានសាងសង់ឡើងនៅតំបន់សមុទ្រចិនខាងត្បូង» ដែលមានជម្លោះយ៉ាងចម្រូងចម្រាស។ នេះបើតាមការចេញផ្សាយដោយសារព័ត៌មាន Channel News Asia នៅមុននេះបន្តិចនាព្រឹកថ្ងៃព្រហស្បតិ៍ ទី១២ ខែមករា ឆ្នាំ២០១៧។

នៅក្នុងការធ្វើអត្ថាធិប្បាយដែលនឹងបង្កឲ្យរដ្ឋាភិបាលទីក្រុងប៉េកាំងផ្ទុះកំហឹងនោះ លោក Rex Tillerson ដែលជាបេក្ខភាពសម្រាប់តំណែងរដ្ឋមន្រ្តីការបរទេសអាមេរិក នៃរដ្ឋាភិបាលអនាគតរបស់លោក ដូណាល់ ត្រាំ បានថ្លែងថា «ការសាងសង់កោះសិប្បនិម្មិតរបស់ប្រទេសចិន និងការដាក់ពង្រាយបរិក្ខាយោធានៅតាមកោះទាំងនោះគឺដូចគ្នាទៅនឹងការឆក់យកតំបន់គ្រីមៀពីអ៊ុយក្រែន ដែលធ្វើឡើងដោយប្រទេសរុស្ស៊ីអ៊ីចឹង។

ជាងនេះទៅទៀតនៅពេលដែលត្រូវបានចោទសួរថាតើរូបលោកគាំទ្រឥរិយាបថដែលមានភាពកំញើញជាងមុនសំដៅទៅរកប្រទេសចិនដែរឬយ៉ាងណានោះ លោក Tillerson បានឆ្លើយតបទៅវិញដូច្នេះថា «យើងនឹងត្រូវតែផ្ញើសារដែលអត្ថន័យដ៏ជាក់ច្បាស់មួយទៅកាន់ចិន ដែលជាដំបូងនោះគឺសកម្មភាពសាងសង់កោះសិប្បនិម្មិត្រូវតែបញ្ឈប់ជាបន្ទាន់ ហើយការចេញចូលរបស់អ្នក (ប្រទេសចិន) ទៅកាន់កោះទាំងនោះនឹងមិនត្រូវទទួលបានសិទ្ធិអនុញ្ញាតតទៀតឡើយ»។

គួរបញ្ជាក់ថាអតីតនាយកប្រតិបត្តិក្រុមហ៊ុនប្រេងដ៏ធំ Exxon Mobil Corp របស់អាមេរិករូបនេះមិនបានរៀបរាប់លម្អិតអំពីអ្វីដែលអាចនឹងត្រូវអនុវត្តន៍ដើម្បីបញ្ឈប់ការចេញចូលរបស់ប្រទេសចិននៅជុំវិញកោះទាំងនោះ ដែលទីក្រុងប៉េកាំងបានខិតខំកសាងឡើងដោយថ្មប៉ប្រះទឹកនៃសមុទ្រចិនខាងត្បូង និងបំពាក់ដោយព្រលានយន្តហោះនិងសព្វាវុធយោធា។ ម៉្យាងវិញទៀតក្រុមចាត់ចែងកិច្ចការផ្ទេរអំណាចរបស់លោក ត្រាំ ក៏ពុំបានធ្វើការឆ្លើយតបភ្លាមៗទៅនឹងសំណើសម្រាប់ព័ត៌មានលម្អិតអំពីវិធីសាស្រ្តដែលប្រទេសចិននឹងត្រូវរារាំងមិនឲ្យចេញចូលនៅកោះសិប្បនិម្មិតទាំងនោះផងដែរ។ នេះបើតាមការដកស្រង់ពី Channel News Asia៕

Fresh News

កប៉ាល់ផ្ទុកយន្តហោះចម្បាំង ឆ្លងកាត់ច្រកសមុទ្រតៃវ៉ាន់ ក្រោយពេលមានភាពតានតឹង

កប៉ាល់ផ្ទុកយន្តហោះចំបាំង និងកប៉ាល់ចំបាំងចិន ជាច្រើនគ្រឿង បានធ្វើដំណើរឆ្លងកាត់ ច្រកសមុទ្ររបស់កោះតៃវ៉ាន់។ នេះបើតាមការបញ្ជាក់របស់ ក្រសួងការពារជាតិតៃវ៉ាន់។

កប៉ាល់ផ្ទុកយន្តហោះ ឈ្មោះ ឡាំងនីង (Liaoning) បានវិលត្រឡប់មកវិញ បន្ទាប់ពីធ្វើសមយុទ្ធ នៅសមុទ្រចិនខាងត្បូង និងបានបើកឆ្លងកាត់ ច្រកសមុទ្រកោះតៃវ៉ាន់ ក្រោយពេលមាន ភាពតានតឹង។

ក្រសួងការពារជាតិតៃវ៉ាន់ បានអោយដឹងថា កប៉ា់ល់នេះ មិនបានបើកចូលដែនទឹក របស់កោះតៃវ៉ាន់នោះទេ ប៉ុន្តែបើកឆ្លងកាត់តំបន់ ដែនអាកាសរបស់តៃវ៉ាន់។

វាគឺជាការធ្វើអោយឡើងកំដៅ កាន់តែខ្លាំងឡើង បន្ទាប់ពីមានភាពតានតឹង រវាងប្រទេសជិតខាង ទាំងពីរនេះ ហើយអាជ្ញាធរតៃវ៉ាន់ បានស្នើអោយសាធារណជន បន្តភាពស្ងប់ស្ងៀម។

ចិន ចាត់ទុក កោះតៃវ៉ាន់ ដែលមានរដ្ឋាភិបាលគ្រប់គ្រងខ្លួនឯង គឺជាផ្នែកមួយនៃទឹកដីរបស់ចិន ហើយចិន បានអះអាងថា នឹងបញ្ជូលទឹកដីទាំងពីរ ជាមួយគ្នា ដោយប្រើកំលាំងកងទ័ព ក្នុងករណីចាំបាច់។

ភាពតានតឹង បានចាប់ផ្តើមកើនឡើង ចាប់តាំងពី ប្រធានាធិបតី ជាប់ឆ្នោតថ្មីអាមេរិក ដូណាល់ ត្រាំ បានបញ្ចប់អនុស្សរណៈ ផ្នែកការទូតជាមួយចិន ហើយលោត្រាំ ក៍បានទទួលទូរស័ព្ទ អបអរសាទរពី ប្រធានាធិបតីតៃវ៉ាន់ សៃ អ៊ីងវិន (Tsai Ing-wen) ៕

CEN

រុស្ស៊ីប្រាប់អាមេរិកថា ខ្លួនជួយអស់លទ្ធភាពហើយក្នុងការកម្ទេចក្រុមរដ្ឋឥស្លាមនៅស៊ីរី

ប្រមុខការពារជាតិរុស្ស៊ី Sergei Shoigu បានប្រតិកម្មខ្លាំងៗទៅនឹងការអធិប្បាយរបស់រដ្ឋមន្ត្រីការពារជាតិអាមេរិក Ashton Carter លើកឡើងថា យុទ្ធនាការប្រឆាំងក្រុមជ្រុលនិយមរដ្ឋឥស្លាមរបស់រុស្ស៊ីនៅស៊ីរី សឹងតែមិនទទួលបានលទ្ធផលអ្វីទាំងអស់ និងទុកឲ្យអាមេរិកជាអ្នកដោះស្រាយតែម្នាក់ឯង។ លើសពីនោះ ប្រមុខការពារជាតិរុស្ស៊ី ក៏ប្រាប់ឲ្យលោក Carter ត្រូវចេះប្រយ័ត្ន ពេលធ្វើការវាយតម្លៃស្ថានការណ៍ផងដែរ។

រដ្ឋមន្ត្រីការពារជាតិរុស្ស៊ី Sergei Shoigu បានរិះគន់សមភាគីអាមេរិក Ashton Carter ដែលចាត់ទុកយុទ្ធនាការប្រឆាំងភេវកម្មរបស់រុស្ស៊ីនៅស៊ីរី ថាមិនទទួលបានអ្វីសោះ។ ក្នុងកិច្ចប្រជុំជាមួយមន្ត្រីក្រសួងការពារជាតិរុស្ស៊ីនៅថ្ងៃទី១០ ខែមករា លោក Shoigu និយាយថា លោក Carter ច្រឡំប្រទេសហើយ ដែលចាត់ទុករុស្ស៊ីមិនជួយអ្វីសោះនោះ ហើយលោក Carter ផ្ទាល់ត្រូវប្រយ័ត្នប្រយែងពេលនិយាយលើកក្រោយៗ។

ក្នុងបទសម្ភាសន៍ជាមួយទូរទស្សន៍ NBC នៅថ្ងៃទី៨ ខែមករា រដ្ឋមន្ត្រីការពារជាតិអាមេរិកអះអាងថា រុស្ស៊ី មិនបានជួយអ្វីឡើយ។ ពោល គឺរុស្ស៊ី ចូលមកស៊ីរី និងនិយាយថា ពួកគេនឹងប្រយុទ្ធក្រុមជ្រុលនិយមរដ្ឋឥស្លាម និងជួយដោះស្រាយជម្លោះនៅស៊ីរី។ ប៉ុន្តែរុស្ស៊ី មិនបានធ្វើអ្វីទេ ហើយចុងក្រោយនោះ អាមេរិកត្រូវប្រយុទ្ធនឹងក្រុមរដ្ឋឥស្លាមតែម្នាក់ឯង។ ហើយរុស្ស៊ី វាយប្រហារតែគោលដៅក្រុមឧទ្ទាមប្រឆាំងមួយចំនួន ដែលរុស្ស៊ីចាត់ទុកជាក្រុមរដ្ឋឥស្លាម ឬជាប់ពាក់ព័ន្ធក្រុមនេះប៉ុណ្ណោះ។

ប្រមុខការពារជាតិរុស្ស៊ី Sergei Shoigu បានទាត់ចោលការលើកឡើងខាងលើនេះ និងបានគូសបញ្ជាក់ថា កងទ័ពអាកាសរុស្ស៊ី បានបំពេញតាមបទបញ្ជាដែលទទួលបាន ខណៈដែលសម្ព័ន្ធមិត្តអន្តរជាតិដឹកនាំមុខដោយអាមេរិក បានត្រឹមធ្វើឲ្យស្ថានការណ៍កាន់តែអាក្រក់ប៉ុណ្ណោះ។ ទន្ទឹមគ្នានេះ លោក ក៏បានលើកឡើងពីការប្រឹងប្រែងរបស់កងទ័ពរុស្ស៊ីទាំងអស់ ដែលព្យាយាមកម្ចាត់ក្រុមជ្រុលនិយមរដ្ឋឥស្លាម។

«យើងសម្រេចបានគោលដៅ ដែលអគ្គមេបញ្ជាការកំពូលកំណត់កាលពីឆ្នាំមុន។ បើទោះជានេះជារឿងលំបាកសម្រាប់យើង ហើយយើងត្រូវការជំនួយពីអន្តរជាតិក៏ដោយ យើងមិនដែលទទួលជំនួយឡើយ។ ម្យ៉ាងទៀត ប្រតិបត្តិការនេះ តម្រូវឲ្យយើងបញ្ចេញគ្រប់កម្លាំងទាំងអស់រួមទាំងការបញ្ជូននាវាមួយក្រុមធំទៅកាន់ស៊ីរី ពង្រាយកងកម្លាំងអាកាស និងមន្ត្រីប៉ូលិសយោធាទៀតផង»។ នេះជាការលើកឡើងរបស់លោក Shoigu ទាក់ទងនឹងការព្យាយាមរបស់រុស្ស៊ីដែលចេញផ្សាយក្នុងសារព័ត៌មាន RT ។

តាំងពីដើមទីមក ក្រុងមូស្គូ និងក្រុងវ៉ាស៊ីនតោន មានទស្សនៈ និងគោលដៅផ្ទុយគ្នាលើទាំងជម្លោះនៅស៊ីរី និងការប្រយុទ្ធប្រឆាំងក្រុមជ្រុលនិយមរដ្ឋឥស្លាម។ អាមេរិក ចោទរុស្ស៊ីថា គិតតែជួយការពាររបបប្រធានាធិបតីអាសាដ និងវាយប្រហារតែគោលដៅក្រុមឧទ្ទាមប្រឆាំង។ ឯរុស្ស៊ីឆ្លើយវិញថា អាមេរិកមិនជួយសហការដើម្បីកំណត់មុខសញ្ញាក្រុមឧទ្ទាម ឬក្រុមជ្រុលនិយមឲ្យច្បាស់ឡើយ គឺគិតតែរឿងទម្លាក់លោក អាសាដ ពីតំណែងប្រធានាធិបតីប៉ុណ្ណោះ៕

ថ្មីៗ
អត្ថបទ : តន ចាន់រិទ្ធារ៉ា

ក្រៅពីរម្លឹកមរតកនយោបាយ អូបាម៉ា អរគុណនិងលាប្រជាជនអាមេរិកក្នុងសុន្ទរកថាចុងក្រោយ

ប្រធានាធិបតីជិតផុតអាណត្តិ លោក បារ៉ាក់ អូបាម៉ា បានផ្តល់សុន្ទរកថាជាលើកចុងក្រោយទៅកាន់ប្រជាជនអាមេរិកមុនលោកផ្ទេរអំណាចនៅថ្ងៃ ២០ មករាខាងមុខ។ ថ្លែងសុន្ទរថាប្រកបដោយមនោសញ្ចេតនា និងអារម្មណ៍ជ្រាលជ្រៅបំផុតនោះ ប្រធានាធិបតីស្បែកខ្មៅដែលអ្នកផងទាំងពួងចូលចិត្តនេះផ្តោតអារម្មណ៍លើបញ្ហាជាច្រើនតាំងពីបញ្ហានយោបាយក្នុងស្រុង ដល់បញ្ហាសន្តិសុខ,បញ្ហាបរិស្ថាន និង សមិទ្ធផលនយោបាយដែលលោកម្រេចបានក្នុងរយៈពេល៨ឆ្នាំមកនេះ។

សូមស្តាប់ពត៌មានលម្អិត

សុន្ទរកថាចុងក្រោយរបស់ប្រធានាធិបតីលោក បារ៉ាក់ អូបាម៉ា បានក្លាយជាសារមួយដ៏សំខាន់សម្រាប់ប្រជាជនអាមេរិកនិងប្រជាជនទាំងអស់លើពិភពលោក។ ក្នុងពិធីថ្លែងសុន្ទរកថានេះ ស្ត្រីទីមួយលោកស្រី Michelle Obama, អនុប្រធានាធិបតី Joe Biden, បណ្តាមន្ត្រីដែលបំពេញការងារជាមួយលោក បារ៉ាក់ អូបាម៉ា សុទ្ធតែមានវត្តមាន។ ហើយសុន្ទរកថាចុងក្រោយបង្កប់ដោយមនោសញ្ចេតនា និងអារម្មណ៍ជ្រាលជ្រៅបំផុត ហើយវាបង្ហាញពីភាពអាឡោះអាល័យនៅពេលដែលប្រធានាធិបតីទី ៤៤ ត្រូវចាកចេញនៅប៉ុន្មានថ្ងៃខាងមុខ។

សុន្ទរកថាចុងក្រោយនេះ ក្រៅពីរំលឹកឡើងវិញសមិទ្ធផលទាំងអម្បាលម៉ានដែលលោកសម្រេចបានក្នុងពេល ៨ឆ្នាំ លោកបានទាញយកបញ្ហាប្រឈមដែលត្រូវដោះស្រាយ។ ប៉ុន្តែប្រធានាធិបតីរូបនេះនៅតែបង្ហាញសុទិដ្ឋិនិយមចំពោះសហរដ្ឋអាមេរិកដោយលោកបន្តជំរុញឲ្យប្រជាជនអាមេរិកបន្តចូលរួមឲ្យសកម្មក្នុងរឿងនយោបាយ និងបន្តជឿជាក់លើ«ប្រព័ន្ធប្រជាធិបតេយ្យ»។ លោកបញ្ចប់សុន្ទរកថាដោយប្រើពាក្យស្លោក «Yes we can. Yes we did. Yes we can»។

១.«Chicago» កន្លែងមានអនុស្សាវរីយ៍ច្រើនសម្រាប់លោក អូបាម៉ា

លោក បារ៉ាក់ អូបាម៉ា បានជ្រើសរើសយកទីក្រុង Chicago ដើម្បីផ្តល់សុន្ទរកថាចុងក្រោយ មុនចេញលោកចាកពីតំណែង។ តាមពិតទៅប្រធានាធិបតីរូបនេះបានត្រឡប់ទៅកាន់ទីក្រុង Chicago ជាកន្លែងដែលលោកប្រកាសជ័យជម្នះក្នុងឆ្នាំ ២០០៨។ ហើយអ្វីដែលធ្វើឲ្យ Chicago ជាកន្លែងពិសេសសម្រាប់លោកគឺ វាក៏ជាស្រុកកំណើត, ជាកន្លែងដែលលោកបានជួបលោកស្រី Michelle Obama និងជាកន្លែងដែលចាប់ផ្តើមការងារសាធារណៈមុនឈានទៅក្លាយជាសមាជិកព្រឹទ្ធសភាដែរ។

២. អូបាម៉ា រំលឹកសមិទ្ធផលសំខាន់ៗ ៨ឆ្នាំ

ប្រធានាធិបតី អូបាម៉ា បានឆ្លៀតលើកឡើងពីសមិទ្ធផលសំខាន់ៗដែលរដ្ឋបាលលោកសម្រេចក្នុងពេល ៨ឆ្នាំ។ សមិទ្ធផលនេះមិនត្រឹមត្រូវជួយប្រជាជនអាមេរិកឲ្យរួចផុតពីបញ្ហាលំបាកសេដ្ឋកិច្ចនិងសង្គមប៉ុណ្ណោះទេ តែវាជួយរក្សាសន្តិសុខផងដល់ប្រជាជនអាមេរិកដែរ។

រឿងសមិទ្ធផលសេដ្ឋកិច្ច គេចាំបានច្បាស់ថា ប្រធានាធិបតីរូបនេះចូលកាន់តំណែងពេលដែលសេដ្ឋកិច្ចអាមេរិកស្ថិតក្នុងវិបត្តិ។ រដ្ឋបាលលោកបានប្រឹងប្រែងធ្វើគ្រប់បែបយ៉ាងដើម្បីស្ថារសេដ្ឋកិច្ចនេះឡើងវិញនិងកាត់បន្ថយអត្រាអ្នកគ្មានការងារធ្វើដ៏ច្រើនសន្ធឹកសន្ធាប់នោះ។

សមិទ្ធផលសំខាន់ផ្សេងទៀត ដែល បារ៉ាក់ អូបាម៉ា បានលើកឡើងដែរនោះមានការភ្ជាប់ទំនាក់ទំនងការទូតជាមួយគុយបាវិញ, ការសម្រេចបានកិច្ចព្រមព្រៀងនុយក្លេអ៊ែរអ៊ីរ៉ង់, គាំទ្រកិច្ចព្រមព្រៀងអាកាសធាតុក្រុងប៉ារីស និងការកម្ចាត់ក្រុមភេរវជនក្នុងនោះមានការសម្លាប់មេខ្លោងក្រុមអាល់កៃដា អូសាម៉ា ប៊ិនឡាដិន។

រឿងប្រឆាំងភេរវកម្ម លោកបានឆ្លៀតអួតអាងថា រដ្ឋបាលលោកបានកម្ចាត់ក្រុមភេរវជនរាប់ម៉ឺននាក់ហើយសម្ព័ន្ធអន្តរជាតិប្រឆាំងក្រុមរដ្ឋឥស្លាមបានកម្ចាត់មេខ្លោងក្រុមនេះជាបន្តបន្ទាប់និងបានដណ្តើមទឹកដីបានពាក់កណ្តាលពីនេះ។ លោកប្រកាសប្រាប់អ្នកចូលរួមដោយមានជំនឿចិត្តខ្ពស់ ថាក្រុមនេះនឹងត្រូវកម្ចាត់ចោលឆាប់ៗ ហើយ«រាល់អ្នកដែលគំរាមកំហែងអាមេរិកមិនដែលនៅបានសុខសាន្តឡើយ»។

៣.អូបាម៉ា នៅបារម្ភពីបញ្ហារើសអើងពូជសាសន៍ ពណ៌សម្បុរស្បែកក្នុងសង្គមអាមេរិក

ក្រៅពីការជាប់ឆ្នោតរបស់លោក ដូណាល់ ត្រាំ រឿងមួយទៀតដែលធ្វើឲ្យលោក អូបាម៉ា ខ្វាយខ្វល់គឺ «ការរើសអើងជាតិសាសន៍និងពណ៌សម្បុរស្បែក»នៅបន្តចាក់ស្រេះក្នុងសង្គមអាមេរិក។

គេធ្លាប់គិតថា សមាជិកព្រឹទ្ធស្បែកខ្មៅ បារ៉ាក់ អូបាម៉ា ជាប់ឆ្នោតជាប្រធានាធិបតីឆ្នាំ ២០០៨ ប្រហែលជាថ្ងៃអវសាន្តនៃការរើសអើងជាតិសាសន៍និងពណ៌សម្បុរស្បែកហើយ។ តែ ៨ឆ្នាំមកនេះ បញ្ហាដ៏ស្មុគស្មាញនេះនៃតែលងបន្លាចអាមេរិកទៀត។

ក្នុងពេលសុន្ទរកថា លោក អូបាម៉ា ទទួលស្គាល់ថា បែកខ្ញែកគ្នារឿងជាតិសាសន៍និងព៌ណសម្បុរស្បែកនេះនៅតែធ្ងន់ធ្ងរក្នុងសង្គមអាមេរិក ដែលចាំបាច់ត្រូវកែប្រែ។

«ក្រោយពេលខ្ញុំជាប់ឆ្នោត វាមានការជជែកគ្នាពីការប្រែប្រួលបញ្ហាជាតិសាសន៍ក្នុងសង្គមអាមេរិក (Post-racial America)។ ប៉ុន្តែការយល់ឃើញនេះមិនកើតឡើងពិតប្រាកដឡើយ។ បញ្ហាពូជសាសន៍នៅតែជាកម្លាំងដ៏ខ្លាំងបង្កឲ្យមានការបែកខ្ញែកគ្នាក្នុងសង្គមយើង។ ជារួមខ្ញុំមើលឃើញថា វាមានការប្រសើរឡើងជាង ១០ ឬ២០ឆ្នាំមុន។ ប៉ុន្តែ យើងមិនទាន់ទៅដល់កន្លែងដែលយើងត្រូវទៅឡើយ»។

៤ .អូបាម៉ា ទទូចឲ្យប្រជាជនបន្តជឿជាក់លើ «ប្រជាធិបតេយ្យ» និងប្រឡូកក្នុងនយោបាយ

ក្នុងពេលថ្លែងសុន្ទរកថានេះ ប្រធានាធិបតីជិតផុតអាណត្តិលោក បារ៉ាក់ អូបាម៉ា បានផ្តាំផ្ញើឲ្យប្រជាជនអាមេរិកបន្តការជឿជាក់លើរបបប្រជាធិបតេយ្យ ដោយបន្តចូលរួមឲ្យបានសកម្មក្នុងបញ្ហានយោបាយនិងឈរឈ្មោះប្រកួតយកតំណែងនយោបាយជាដើម។ ហើយលោកបានអះអាងថា «ឈ្នះឬចាញ់ក្នុងនយោបាយ» ជារឿងធម្មតាក្នុងបរិបទប្រជាធិបតេយ្យ។

លោកក៏ជំរុញឲ្យប្រជាជនអាមេរិកទាំងអស់ចូលរួមប្រកួតប្រជែងដោយឈរឈ្មោះដើម្បីកាន់កាប់មុខងារនយោបាយដើម្បីកែប្រែបញ្ហាប្រឈម បើសិនមិនពេញចិត្តចំពោះមន្ត្រីដែលជាតំណាងរបស់ខ្លួននោះ។

៥. អូបាម៉ា ប្រាប់មន្ត្រីរបស់លោក៖ «អ្នកបានផ្លាស់ប្តូរពិភពលោក»

នៅក្នុងពេលនោះដែរ លោក បារ៉ាក់ អូបាម៉ា បានយកពេលចុងក្រោយនៃសុន្ទរកថាដើម្បីបង្ហាញការដឹងគុណ និងអរគុណដល់មិត្តរួមការងារនិងជាមន្ត្រីក្នុងរដ្ឋបាលលោកជាពិសេសឆ្លៀតឱកាសថ្លែងអំណរគុណអនុប្រធានាធិបតីJoe Bidenផង។ លោកបានប្រាប់ពួកគេដែលមានវត្តមាននៅទីនោះថា ពួកគេបានជួយបានផ្លាស់ប្តូរពិភពលោក។

«អ្នកទាំងអស់គ្នាបានផ្លាស់ប្តូរពិភពលោក»។ លោក អូបាម៉ា ថ្លែងចប់ អ្នកចូលរួមនាំគ្នាជូតទឹកភ្នែក។

បន្តមកទៀតលោកបានអំពាវនាវឲ្យប្រជាជនអាមេរិកជឿជាក់លើប្រទេសជាតិ ហើយលោកបានប្រាប់អ្នកចូលរួមថាលោកមានសុទិដ្ឋិនិយមចំពោះការវិវត្តនៃសហរដ្ឋអាមេរិក។

«ខ្ញុំចាកចេញពីឆាកនៅយប់នេះដោយមានសុទិដ្ឋិនិយមចំពោះសហរដ្ឋអាមេរិកជាងពេលខ្ញុំចាប់ផ្តើមដំបូង។ ខ្ញុំសុំឲ្យអ្នកទាំងអស់គ្នាជឿជាក់។ មិនមែនលើសមត្ថភាពរបស់ខ្ញុំក្នុងការបង្កើតឲ្យមានការផ្លាស់ប្តូរឡើយ តែជឿជាក់លើសមត្ថភាពរបស់អ្នក»។

លោកបានបញ្ចប់សុន្ទរកថា ដោយលើកយកពាក្យស្លោកដែលលោកធ្លាប់ប្រើក្នុងពេលឃោសនាបោះឆ្នោត។ ដែលពាក្យស្លោកនោះគឹ«Yes we can. Yes we did. Yes we can»៕

ថ្មីៗ
អត្ថបទ : ថ្មីៗ

ក្រុមហ៊ុន Spotify ផ្តល់តំណែងមួយដល់លោកប្រធានាធិបតី អូបាម៉ា

បន្ទាប់ពីនិយាយលេងសើចអំពីការបម្រើការឲ្យក្រុមហ៊ុនផលិតកម្មវិធីចាក់ចម្រៀងក្រោយពេលចប់តំណែងជាប្រធានាធិបតី លោកប្រធានាធិបតីអាមេរិក បារ៉ាក់ អូបាម៉ា អាចជាមនុស្សតែម្នាក់គត់ដែលមានលក្ខខណ្ឌការងារគ្រប់គ្រាន់សម្រាប់តំណែងថ្មីបំផុតមួយនៅក្នុងក្រុមហ៊ុន Spotify។

លក្ខខណ្ឌការងារមួយចំនួនក្នុងចំណោមលក្ខខណ្ឌការងារដទៃទៀតសម្រាប់តំណែងជាប្រធានរៀបចំបញ្ជីបទចម្រៀង ឬហៅថា President of Playlists របស់ក្រុមហ៊ុន Spotify គឺថា «យ៉ាងហោចណាស់ត្រូវមានបទពិសោធន៍កាន់តំណែងខ្ពស់មួយនៅក្នុងប្រទេសណាមួយអស់រយៈពេល៨ឆ្នាំ» ហើយនិងជាជ័យលាភីពានរង្វាន់ណូបែលសន្តិភាព គឺជា។ តំណែងនេះត្រូវគ្រប់គ្រងបញ្ជីបទចម្រៀង និងក្រុមការងាររបស់ក្រុមហ៊ុននេះនៅទូទាំងពិភពលោក។

លក្ខខណ្ឌការងារដែលក្រុមហ៊ុន Spotify តម្រូវឲ្យមានសម្រាប់តំណែងនេះដែលត្រូវបានផ្សព្វផ្សាយកាលពីថ្ងៃអង្គារ មានដូចជា «ត្រូវយល់ដឹងអំពី Spotify និងមានបទពិសោធន៍រៀបចំបញ្ជីបទចម្រៀងនៅកម្រិតសហព័ន្ធជាដើម»។

លោក Daniel Ek ប្រធានក្រុមហ៊ុន Spotify បានសរសេរនៅលើ Twitter ទៅកាន់លោក អូបាម៉ា ថា៖ «ហេ អូបាម៉ា ខ្ញុំឮថាលោកចាប់អារម្មណ៍ការងារនៅ Spotify។ លោកបានឃើញ ទ្វីតមួយនេះហើយឬនៅ?»

យោងតាមអ្នកស្រី Natalia Brzezinski អ្នកបង្កើតកម្មវិធីស្តាប់ចម្រៀង podcast និងជាភរិយារបស់អតីតឯកអគ្គរដ្ឋទូតស៊ុយអែតប្រចាំនៅសហរដ្ឋអាមេរិក លោក អូបាម៉ា បានប្រាប់ដល់ស្វាមីរបស់លោកស្រីនៅឯសេតវិមានកាលពីសប្តាហ៍មុនថា «ខ្ញុំនៅកំពុងរង់ចាំការងារពីក្រុមហ៊ុន Spotify ព្រោះខ្ញុំដឹងថា អ្នកទាំងអស់គ្នាស្រឡាញ់បញ្ជីបទចម្រៀងរបស់ខ្ញុំ»៕

ថ្មីៗ
អត្ថបទ : VOA

វិមានក្រឹមឡាំងចេញសេចក្តីថ្លែងការណ៍ទាត់ចោលរឿង «ការលួចតាមដានព័ត៌មានផ្ទាល់ខ្លួន និងហិរញ្ញវត្ថុរបស់ លោក ដូណាល់ ត្រាំ» ហើយអះអាងថា វាជាចេតនាបំផ្លាញទំនាក់ទំនង រុស្ស៊ី-អាមេរិក

(មូស្គូ)៖ ក្រោយពីការផ្ទុះរឿងរ៉ាវដ៏ធំពាក់ព័ន្ធនឹងឯកសារសម្ងាត់ រឿងអាស្រូវការលួចចូលកែលទ្ធផលឆ្នោត និងការលួចព័ត៌មានស្តីពីផ្នែកហិរញ្ញវត្ថុផ្ទាល់ខ្លួនរបស់ លោក ដូណាល់ ត្រាំ នោះវិមានក្រឹមឡាំងបានចេញមុខច្រានចោលព័ត៌មានទាំងអស់ ហើយថាវាជាព័ត៌មាន «មិនសមហេតុផលសោះតែម្តង»។ នេះបើតាមការចេញផ្សាយព័ត៌មានដោយ Sky News នៅមុននេះបន្តិចនាល្ងាចថ្ងៃពុធ ទី១១ ខែមករា ឆ្នាំ២០១៧។

វិមានក្រឹមឡាំងបានចេញសេចក្តីថ្លែងការណ៍យ៉ាងដូច្នេះថា «ការដែលអះអាងថារុស្ស៊ីមានផែនការតាមដានរឿងសម្ងាត់របស់លោក ដូណាល់ ត្រាំ ហើយនឹងផ្ញើសារសម្ងាត់ដើម្បីទាមទារអ្វីមួយជាថ្នូរដើម្បីលាក់បាំងព័ត៌មាននោះគឺជារឿងដែលមិនពិតទាល់តែសោះ ហើយវាជាចេតនាដែលចង់បង្កឲ្យទំនាក់ទំនងរវាង រុស្ស៊ី-អាមេរិកខ្ទេចខ្ទាំ»។ បន្ថែមពីនេះរុស្ស៊ីក៏បានច្រានចោលព័ត៌មានដែលថា រុស្ស៊ីបានលួចបំផ្លាញកេរ្តិ៍ឈ្មោះគូប្រជែងរបស់លោក ត្រាំ ដើម្បីឲ្យលោក ត្រាំ បានជាប់ឆ្នោតនោះផងដែរ។

ជុំវិញសំណុំរឿងដ៏ចម្រូងចម្រាសនេះ លោក ដូណាល់ ត្រាំ ក៏បានចេញមុខបដិសេធផងដែរ ដោយលោកបានអះអាងថាអ្វីៗទាំងអស់គឺត្រូវបានរៀបចំ និងចងក្រងឡើងដោយចារជនអង់គ្លេសដែលបានចូលនិវត្តន៍មួយរូប (មិនបញ្ចេញឈ្មោះ) ដែលលោក ត្រាំ ហៅថា «មេធ្មប់ប្រមាញ់នយោបាយ»៕

Fresh News

ប្រធានាធិបតីជាប់ឆ្នោត ដូណាល់ ត្រាំ៖ «ខ្ញុំគិតថារុស្ស៊ីជាអ្នកនៅពីក្រោយខ្នងនៃការ Hack លទ្ធផលនៃបោះឆ្នោត» (Video inside)

(អាមេរិក)៖ ប្រធានាធិបតីជាប់ឆ្នោតលោក Donald Trump បានឱ្យដឹងតាមរយៈការធ្វើសន្និសទីកាសែតជាលើកដំបូងរបស់លោក ចាប់តាំងពីលោកជាប់ឆ្នោតជា ប្រធានាធិបតីថា លោកគិតថាប្រទេសរុស្ស៊ីជាអ្នកនៅពីក្រោយខ្នងការ នៃការប្រហារព័ត៌មានវិទ្យា ឬ Hack លទ្ធផលនៃការបោះឆ្នោតនៅសហរដ្ឋអាមេរិក នេះបើយោងតាមសារព័ត៌មាន CNN ចេញផ្សាយនៅយប់ជ្រៅថ្ងៃទី១១ ខែមករា ឆ្នាំ២០១៧នេះ។

លោក ដូណាល់ ត្រាំ បាននិយាយនៅក្នុងសន្និសិទកាសែតយ៉ាងដូច្នេះថា៖ «ខ្ញុំគិតថាវាជាប្រទេសរុស្ស៊ី, ប៉ុន្តែខ្ញុំគិតថាពួកយើងមិនមែនទទួលរងការវាយប្រហារ (Hack) ពីប្រទេសរុស្ស៊ីតែមួយទេ មានប្រទេសដទៃ និងអ្នកផ្សេងទៀត»។ «I think it was Russia, But i think we also get hacked by other countries and other people»។

លោកបានបន្ថែមថា ប្រទេសរុស្ស៊ីគឺមិនមែនជាប្រទេសតែមួយគត់ដែល Hack ចំពោះការបោះឆ្នោតអាមេរិក និងចោទប្រកាន់ថា គណបក្សប្រជាធិបតេយ្យ មិនមានវិធានការទប់ស្កាត់គ្រប់គ្រាន់ចំពោះការវាយប្រហារតាមប្រព័ន្ធអ៉ិនធឺណិត។

ប្រធានាធិបតីអាមេរិកជាប់ឆ្នោត លោក ដូណាល់ ត្រាំ បានទាត់ចោលជាថ្មីម្ដងទៀត ការលើកឡើងដែលថា លោកបានរងឥទ្ធិពល និងសម្ពាធពីសំណាក់ រដ្ឋាភិបាលទីក្រុងមូស្គូ។ លោក ដូណាល់ ត្រាំ ដែលនឹងស្បថកាន់តំណែងជាប្រធានាធិបតីអាមេរិកទី៤៥ នៅថ្ងៃទី២០ ខែមករា បានសរសេរនៅលើ Twitter ដូច្នេះថា៖ «រុស្ស៊ីមិនដែលបានព្យាយាមដាក់សម្ពាធមកលើខ្ញុំនោះទេ។ ខ្ញុំគ្មានទំនាក់ទំនងអ្វីជាមួយទីក្រុងមូស្គូ គ្មានទំាងកិច្ចសន្យា គ្មានទំាងកម្ចី គឺទទេស្អាតតែម្ដង!»។

ក្រោយពីការផ្ទុះរឿងរ៉ាវដ៏ធំពាក់ព័ន្ធនឹងឯកសារសម្ងាត់ រឿងអាស្រូវការលួចចូលកែលទ្ធផលឆ្នោត និងការលួចព័ត៌មានស្តីពីផ្នែកហិរញ្ញវត្ថុផ្ទាល់ខ្លួនរបស់ លោក ដូណាល់ ត្រាំ នោះ, វិមានក្រឹមឡាំងបានចេញមុខច្រានចោលព័ត៌មានទាំងអស់ ហើយថាវាជាព័ត៌មាន «មិនសមហេតុផលសោះតែម្តង»។ នេះបើតាមការចេញផ្សាយព័ត៌មានដោយ Sky News នាល្ងាចថ្ងៃពុធ ទី១១ ខែមករា ឆ្នាំ២០១៧។

វិមានក្រឹមឡាំងបានចេញសេចក្តីថ្លែងការណ៍យ៉ាងដូច្នេះថា «ការដែលអះអាងថារុស្ស៊ីមានផែនការតាមដានរឿងសម្ងាត់របស់លោក ដូណាល់ ត្រាំ ហើយនឹងផ្ញើសារ សម្ងាត់ដើម្បីទាមទារអ្វីមួយជាថ្នូរដើម្បីលាក់បាំងព័ត៌មាននោះគឺជារឿងដែលមិនពិតទាល់តែសោះ ហើយវាជាចេតនាដែលចង់បង្កឲ្យទំនាក់ទំនងរវាង រុស្ស៊ី-អាមេរិកខ្ទេចខ្ទាំ»។ បន្ថែមពីនេះរុស្ស៊ីក៏បានច្រានចោលព័ត៌មានដែលថា រុស្ស៊ីបានលួចបំផ្លាញកេរ្តិ៍ឈ្មោះគូប្រជែងរបស់លោក ត្រាំ ដើម្បីឲ្យលោក ត្រាំ បានជាប់ឆ្នោតនោះផងដែរ។

ជុំវិញសំណុំរឿងដ៏ចម្រូងចម្រាសនេះ លោក ដូណាល់ ត្រាំ ក៏បានចេញមុខបដិសេធផងដែរ ដោយលោកបានអះអាងថាអ្វីៗទាំងអស់គឺត្រូវបានរៀបចំ និងចងក្រងឡើងដោយចារជនអង់គ្លេស ដែលបានចូលនិវត្តន៍មួយរូប (មិនបញ្ចេញឈ្មោះ) ដែលលោក ត្រាំ ហៅថា «មេធ្មប់ប្រមាញ់នយោបាយ»៕

Fresh News

Facebook បង្កើតគំរោងថ្មី ដើម្បីលើកស្ទួយទំនាក់ទំនង ជាមួយបណ្តាញសារព័ត៌មាននានា និងទប់ស្កាត់ព័ត៌មានឆបោក

(អាមេរិក)៖ ក្រុមហ៊ុន Facebook Inc បានបង្កើតគំរោងថ្មីមួយឈ្មោះថា «Journalism Project» នៅថ្ងៃព្រហស្បតិ៍នេះដោយសារតែក្រុមហ៊ុនបណ្តាញទំនងទំនងសង្គមដ៏ធំជាងគេលើពិភពលោកមួយនេះកំពុងព្យាយាមធ្វើឲ្យទំនាក់ទំនងរបស់ខ្លួនជាមួយនឹងបណ្តាស្ថាប័នព័ត៌មាននានាមានភាពស៊ីជម្រៅជាងមុនកាន់តែខ្លាំង។ នេះបើតាមការចេញផ្សាយដោយទីភ្នាក់ងារព័ត៌មាន Reuters នៅមុននេះបន្តិចនាព្រឹកថ្ងៃព្រហស្បតិ៍ ទី១២ ខែមករា ឆ្នាំ២០១៧។

Facebook បានឲ្យដឹងថាក្រុមហ៊ុននឹងចូលរួមសហការជាមួយបណ្តាស្ថាប័នជាភាគីទីបីដើម្បីលើកកម្ពស់ «អក្ខរកម្មព័ត៌មាន» និងជួយដល់អ្នកប្រើប្រាស់ចំនួនប្រហែលជាង ២ពាន់លាននាក់របស់ខ្លួនក្នុងការសម្រេចចិត្តជ្រើសរើសថាតើប្រភពពត៌មានណាមួយដែលអាចឲ្យជឿទុកចិត្តបាន ហើយបន្ថែមពីនេះក្រុមហ៊ុននឹងនៅតែបន្តធ្វើយ៉ាងណាដោះស្រាយ ជាមួយបញ្ហានៃការផ្សព្វផ្សាយដំណឹងឆបោកនៅលើបណ្តាញទំនាក់ទំនងសង្គមដ៏ធំនេះផងដែរ។

គួរបញ្ជាក់ថាសេចក្តីប្រកាសនេះត្រូវបានធ្វើឡើងមិនដល់មួយសប្តាហ៍នោះឡើយ បន្ទាប់ពីក្រុមហ៊ុន Facebook បានអះអាងថាកំពុងចរចាជាមួយអតីតអ្នកសារព័ត៌មាន ក៏ដូចជាអ្នកសម្របសម្រួលកម្មវិធីនៃស្ថានីយ៍ទូរទស្សន៍ CNN គឺលោកស្រី Campbell Brown ដើម្បីឲ្យមកធ្វើជាអ្នកដឹកនាំក្រុមនៃភាពជាដៃគូព័ត៌មានរបស់ក្រុមហ៊ុន៕

Fresh News

លោក បារ៉ាក់ អូបាម៉ា៖ «គូប្រជែងដូចជារុស្ស៊ីនិងចិន មិនអាចប្រៀបធៀបនឹងឥទ្ធិពល របស់សហរដ្ឋអាមេរិកបានឡើយ»

(វ៉ាស៊ីនតោន)៖ ប្រធានាធិបតីអាមេរិកផុតអាណត្តិ លោក បារ៉ាក់ អូបាម៉ា បានទទួលស្គាល់ពីបរាជ័យ នៃនយោបាយការបរទេសមួយចំនួនរបស់លោកជាពិសេសគឺសង្រ្គាមស៊ីរីតែម្ដង ប៉ុន្តែព្រមពេលជាមួយគ្នា លោក អូបាម៉ា នៅតែអះអាងថាសហរដ្ឋអាមេរិកគឺជាមហាអំណាចលេខ១ នៅលើពិភពលោកហើយគូប្រជែងដូចជាចិននិងរុស្ស៊ី គ្មានសមត្ថភាពអ្វីមកប្រកួតប្រជែងនឹងសហរដ្ឋអាមេរិកបាននោះឡើយ។ នេះបើតាម ការចេញផ្សាយដោយសារព័ត៌មាន Sputnik នៅព្រឹកថ្ងៃព្រហស្បតិ៍ ទី១២ ខែមករា ឆ្នាំ២០១៧។

ការលើកឡើងរបស់លោក អូបាម៉ា ដូចខាងលើនេះធ្វើឡើងនៅក្នុងឱកាសថ្លែងសុន្ទរកថាជាលើកចុងក្រោយ នៅថ្ងៃអង្គារម្សិលមិញនៅឯទីក្រុង Chicago។ លោក អូបាម៉ា កត់សម្គាល់ដូច្នេះថា «គូប្រជែងដូចជារុស្ស៊ី ឬមួយក៏ចិនមិនអាចប្រៀបធៀបនឹងឥទ្ធិពលរបស់សហរដ្ឋអាមេរិក នៅទូទាំងពិភពលោកបានឡើយ (...) ត្បិតយើងមិនដែលបោះបង់ចោលអ្វីដែលយើងត្រូវការពារនោះទេ ហើយយើងក៏មិនមែនត្រឹមតែជាប្រទេសមហាអំណាចចូលចិត្តដើរគំរាមប្រទេសតូចៗនោះដែរ»។ លោក អូបាម៉ា បន្ថែមថា «បើសិនជាការគោរពនីតិរដ្ឋនៅតែបន្តធ្លាក់ចុះ ខណៈលទ្ធភាពសង្រ្គាមរវាងប្រទេសនិងប្រទេសមានការកើនឡើងនោះប្រាកដណាស់ថា វាគឺជាការគំរាមកំហែងដល់សេរីភាពរបស់សហរដ្ឋអាមេរិក»។

គួរបញ្ជាក់ថា នៅក្រោមរដ្ឋបាលលោក អូបាម៉ា ទំនាក់ទំនងរវាងរុស្ស៊ី និងសហរដ្ឋអាមេរិក បានទទួលរងនូវភាពតានតឹងយ៉ាងខ្លំាងក្រោយពេលដែលទីក្រុងវ៉ាស៊ីនតោន បានធ្វើការចោទប្រកាន់ក៏ដូចជាដាក់ទណ្ឌកម្មសេដ្ឋកិច្ចប្រឆាំងទីក្រុងមូស្គូ សម្រាប់ការលូកដៃចូលក្នុងជម្លោះនៅភាគខាងកើតប្រទេសអ៊ុយក្រែនកាលពីឆ្នាំ២០១៤ ហើយជាងនេះទៅទៀតកាលពីពេលថ្មីៗនេះ លោក អូបាម៉ា ក៏បានសម្រេចចិត្ត បណ្ដេញមន្ត្រីទូតរុស្ស៊ី ៣៥នាក់ចេញពីសហរដ្ឋអាមេរិកផងដែរ ដោយសារតែរឿងជ្រៀតជ្រែតចូលក្នុងកិច្ចការបោះឆ្នោតប្រធានាធិបតីអាមេរិក បើទោះបីជារុស្ស៊ីបានបដិសេធជាច្រើនដងហើយក៏ដោយ៕

Fresh News

ចិន សប្បាយចិត្តខ្លាំង ពេលហ្វីលីពីន មិនដាក់សាលក្រមសមុទ្រចិនខាងត្បូងក្នុងរបៀបវារៈកិច្ចប្រជុំអាស៊ាន

រដ្ឋាភិបាលក្រុងប៉េកាំង បានសាទរ និងរីករាយចំពោះប្រធានវិលជុំអាស៊ានហ្វីលីពីន ដែលបាននិយាយថាសាលក្រមសមុទ្រចិនខាងត្បូង ដែលជាលិខិតូបករណ៍ដ៏ចម្រូងចម្រាសរវាងចិន និងហ្វីលីពីន នឹងមិនត្រូវដាក់ក្នុងរបៀបវារៈនៃកិច្ចប្រជុំអាស៊ានឆ្នាំនេះ។ ក្រុងប៉េកាំង ក៏បានបញ្ជាក់ជាថ្មីដែរថា បញ្ហាសមុទ្រចិនខាងត្បូង មិនដែលធ្លាប់ ហើយ ក៏នឹងមិនមែនជាបញ្ហារវាងចិន និងអាស៊ានឡើយ។

អនុរដ្ឋមន្ត្រីការបរទេសហ្វីលីពីន លោក Enrique Manalo នៅថ្ងៃទី៥ មករា កន្លងទៅ បានអះអាងថា បញ្ហាសមុទ្រចិនខាងត្បូង មាននៅក្នុងរបៀបវារៈរបស់អាស៊ាន ហើយ អាស៊ាន នឹងបន្តធ្វើការជាមួយនឹងគ្នានៅក្នុងឆ្នាំនេះដោយផ្តោតសំខាន់លើ ក្រមប្រតិបត្តិសមុទ្រចិនខាងត្បូង ដែលមិនទាន់បញ្ចប់នៅឡើយនោះ និងសេចក្តីថ្លែងការណ៍ស្តីពីភាគីក្រមប្រតិបត្តិសមុទ្រចិនខាងត្បូង និងគោលការណ៍នៃក្រមប្រតិបត្តិ។

លោកអនុរដ្ឋមន្ត្រី ក៏បានសង្កត់ធ្ងន់ថា សាលក្រមសមុទ្រចិនខាងត្បូងរបស់តុលាការមជ្ឈត្តកម្មក្រុងឡាអេ មិនមាននៅក្នុងរបៀបវារៈអាស៊ាននោះទេ ដោយលោក ពន្យល់ថា សាលក្រមសមុទ្រចិនខាងត្បូង បានក្លាយជាផ្នែកមួយនៃច្បាប់អន្តរជាតិរួចទៅហើយ។ ជាងនេះទៅទៀតនោះ លោក យល់ឃើញថា បើដាក់សាលក្រុមសមុទ្រចិនខាងត្បូងក្នុងរបៀបវារៈ នោះបរិយាកាសនៃកិច្ចប្រជុំ នឹងមិនល្អនោះទេ។

សេចក្តីថ្លែងការណ៍នេះ បានធ្វើឲ្យក្រុងប៉េកាំង សប្បាយចិត្តខ្លាំង។ តាមរយៈអ្នកនាំពាក្យក្រសួងការបរទេសនាសន្និសីទសារព័ត៌មាននៅថ្ងៃទី១០ មករា ក្រុងប៉េកាំង ពិតជាស្វាគមន៍សេចក្តីថ្លែងការណ៍របស់ហ្វីលីពីន។ អ្នកនាំពាក្យក្រសួងការបរទេសចិន លោក Lu Kang ក៏បានសង្កត់ធ្ងន់ថា បញ្ហាសមុទ្រចិនខាងត្បូង គឺជាបញ្ហារវាងចិន និងប្រទេសអាស៊ានមួយចំនួនប៉ុណ្ណោះ ពោលគឺ មិនមែនជាបញ្ហារវាងចិន និអាស៊ានទាំងមូលឡើយ។

នាឱកាសដដែល ក្រុងប៉េកាំង ក៏បានអះអាងជាថ្មីម្តងទៀតថា ចិន នៅតែប្តេជ្ញាចិត្តក្នុងការដោះស្រាយជម្លោះដោយសន្តិវិធីលើបញ្ហាសមុទ្រចិនខាងត្បូងជាមួយនឹងភាគីពាក់ព័ន្ធដោយផ្ទាល់តាមរយៈការចរចា និងពិគ្រោះយោបល់ និងរក្សាសន្តិភាព និងស្ថិរភាពនៅក្នុងតំបន់ជាមួយនឹងប្រទេសអាស៊ានផងដែរ។

សូមជម្រាបផងដែរ បញ្ហាសមុទ្រចិនខាងត្បូង គឺជាជម្លោះផលប្រយោជន៍អធិបតេយ្យ ដែលមានរដ្ឋពាក់ព័ន្ធដូចជារដ្ឋអាស៊ាន ព្រុយណេ ម៉ាឡេស៊ី ហ្វីលីពីន និងវៀតណាម ជាមួយនឹងចិន។ រៀងរាល់កិច្ចប្រជុំប្រចាំឆ្នាំរបស់អាស៊ាន មិនដែលរំលងបញ្ហាសមុទ្រចិនខាងត្បូងឡើយ។ នោះ ក៏ព្រោះបញ្ហានេះ មានរឿងចម្រូងចម្រាសច្រើន ដែលមិនទាន់ដោះស្រាយឲ្យបានចប់សព្វគ្រប់។ ចិន ដែលកំពុងបង្កើនវត្តមានយោធានៅក្នុងតំបន់ជម្លោះនោះ បានទាមទារតំបន់ជម្លោះស្ទើរតែទាំងស្រុង ដោយយោងតាមកត្តាប្រវត្តិសាស្ត្រ ខណៈរដ្ឋអាស៊ានទាមទារដោយអាងច្បាប់។

នៅថ្ងៃទី១២ កក្កដា ឆ្នាំ២០១៦ កន្លងទៅ តុលាការមជ្ឈត្តកម្មអចិន្ត្រៃយ៍ក្រុងឡាអេ បានចេញសាលក្រមតាមបណ្តឹងរបស់ហ្វីលីពីន ដោយសម្រេចឲ្យហ្វីលីពីន ឈ្នះក្តីលើចិន។ តុលាការ បានបកស្រាយថា សំអាងរបស់ចិននៅក្នុងសមុទ្រចិនខាងត្បូង មិនមានមូលដ្ឋានផ្នែកច្បាប់នោះទេ។ ជាងនេះទៅទៀតនោះ តុលាការ ក៏បានចាត់ទុកសកម្មភាពរបស់ចិននៅក្នុងសមុទ្រចិនខាងត្បូង ដែលមានទាំងការបង្កើតកោះសិប្បនិម្មិតសុទ្ធសឹងតែខុសច្បាប់ទៀត។ យ៉ាងណាក៏ដោយ ចិន ប្រកាសយ៉ាងដាច់ខាតថា មិនទទូលស្គាល់ សាលក្រមនោះទេ។ សម្រាប់ចិន សាលក្រមនោះ ប្រៀបប្រដូចនឹងក្រដាសសម្រាមយ៉ាងដូច្នេះឯង៕

ថ្មីៗ
អត្ថបទ : ថ្មីៗ

អគ្គរដ្ឋទូតអាមេរិកក្នុងតំណែងនយោបាយប្រចាំប្រទេសនានាលើពិភពលោក ប្រមាណជិត៣០% ត្រូវលាលែងពីតំណែង

(អាមេរិក)៖ ប្រធានាធិបតីជាប់ឆ្នោតអាមេរិកលោក Donald Trump បានប្រកាសទាមទារឱ្យអគ្គរដ្ឋទូតគ្រប់រូបដែលត្រូវបានតែងតាំងដោយប្រធានាធិបតីកំពុងកាន់ តំណែងលោក Barak Obama ត្រូវលាលែងពីដំណែង និងធ្វើមាតុភូមិនិវត្តន៍ឱ្យបានមុនថ្ងៃទី២០ ខែមករា ឆ្នាំ២០១៧ខាងមុខដែលជាថ្ងៃលោកត្រូវឡើងកាន់តំណែង។

ទូតសហរដ្ឋអាមេរិក មានពីរប្រភេទគឺ៖

ទី១៖ មន្ត្រីទូតដែលបានចូលបំពេញការងារក្រោមដំបូលរបស់ក្រសួងការបរទេស ដែលក្នុងនោះបច្ចុប្បន្នមានចំនួន៦៩.៧% មានឈ្មោះថា «Career Diplomat»។
ទី២៖ មន្រ្តីទូតចំនួនប្រមាណ២៩.៥%ផ្សេងទៀត ត្រូវបានជ្រើសរើសមកពីស្ថាប័នផ្សេងៗតែងតាំងដោយប្រធានាធិបតីដែលគេហៅជា «ទូតតែងតាំងក្នុងកូតានយោបាយ» ឈ្មោះជាភាសាអង់គ្លេសថា «Political Appointee» នឹងត្រូវលាលែងពីតំណែង នៅមុនថ្ងៃឡើងកាន់អំណាចរបស់លោក Donald Trump។

ឈ្មោះទូតអាមេរិកប្រចំាប្រទេសនិមួយៗដែលត្រូវលាលែង នឹងចេញផ្សាយនៅពេលល្ងាចនេះ៕

Fresh News

ប្រធានាធិបតីលោក បារ៉ាក់ អូបាម៉ា «ថ្លែងសុន្ទរកថាជាលើកចុងក្រោយ» លាហើយប្រជាជនអាមេរិក!

(វ៉ាស៊ីនតោន)៖ មុនពេលរៀបចំខ្លួនចាកចេញពីសេតវិមានប្រធានាធិបតីអាមេរិកលោក បារ៉ាក់ អូបាម៉ា បានធ្វើការថ្លែងសុន្ទរកថាដ៏រំជួលចិត្តជាលើកចុងក្រោយ នៅក្នុងឱកាសដើម្បីលាប្រជាជនអាមេរិកក្នុងនាមជាមេដឹកនាំកំពូលរបស់ប្រទេស។ នេះបើតាមការចេញផ្សាយដោយសារព័ត៌មាន Business Insider នៅមុននេះបន្តិចនាព្រឹកថ្ងៃពុធ ទី១១ ខែមករា ឆ្នាំ២០១៧។

លោកប្រធានាធិបតីអាមេរិកបានថ្លែងទៅកាន់អ្នកចូលរួមម្នាក់នៅឯទីក្រុង Chicago ដូច្នេះថា «អ្នកទាំងអស់គឺជាការផ្លាស់ប្តូរ... អ្នកបានឆ្លើយតបទៅនឹងសេចក្តីសង្ឃឹមរបស់មនុស្សរាល់គ្នា ហើយដោយសារតែអ្នក សហរដ្ឋអាមេរិកបានក្លាយជាកន្លែងដែលប្រសើរ និងរឹងមាំជាងមុននៅពេលដែលពួកយើងបានចាប់ផ្តើម»។

លោក បារ៉ាក់ អូបាម៉ា បានបញ្ចប់ការថ្លែងសុន្ទរកថា ជាមួយនឹងឃ្លាដ៏ល្បីល្បាញប្រចាំយុទ្ធនាការឃោសនាបោះឆ្នោតទាំងពីរលើករបស់រូបលោកថា «ពិតណាស់! យើងទាំងអស់គ្នាអាចធ្វើបាន។ ពិតណាស់! យើងបានធ្វើវា។ ពិតណាស់! យើងអាចធ្វើបាន»។ ទន្ទឹមគ្នានេះដែរប្រជាជនអាមេរិកទាំងអស់ដែលមានវត្តមាននៅទីនោះបានឆ្លើយតបទៅនឹងការថ្លែងសារដោយរួមគ្នាស្រែកដដែលៗថា «បួនឆ្នាំទៀតៗ» ប៉ុន្តែលោក អូបាម៉ា និយាយទាំងអស់សំណើចថា «ខ្ញុំមិនអាចធ្វើបែបនឹងបានទេ»។

នៅក្នុងឱកាសនោះដែរលោក បារ៉ាក់ អូបាម៉ា ក៏បានគូសបញ្ជាក់បន្ថែមថា «ខ្ញុំបានប្តេជ្ញាចំពោះប្រធានាធិបតីជាប់ឆ្នោតអាមេរិកលោក ដូណាល់ ត្រាំ ថាក្រុមរដ្ឋបាលរបស់ខ្ញុំ នឹងធានាឲ្យបាននូវការផ្ទេរអំណាចដ៏រលូនបំផុតមួយតាមតែអាចធ្វើទៅបាន ដូចកាលដែលអតីតប្រធានាធិបតី George W. Bush បានរៀបចំសម្រាប់ខ្ញុំ ក៏ប៉ុន្តែអ្វីៗគឺវាអាស្រ័យលើរូបយើងទាំងអស់ដើម្បីធានឲ្យបានថារដ្ឋាភិបាលរបស់ពួកយើងអាចជួយយើងដោះស្រាយបញ្ហាដែលយើងនៅតែកំពុងប្រឈម»។

គួរបញ្ជាក់ដែរនៅសល់តែ ១០ថ្ងៃទៀតប៉ុណ្ណោះលោក ដូណាល់ ត្រាំ នឹងស្បថចូលកាន់តំណែងជាប្រធានាធិបតីអាមេរិកទី ៤៥ ជាផ្លូវការហើយ៕

Fresh News

ដូណាល់ ត្រាំ តែងតាំកូនប្រសា ជាទីប្រឹក្សាជាន់ខ្ពស់នៅសេតវិមាន

លោកប្រធានាធិបតី ជាប់ឆ្នោតថ្មីអាមេរិក ដូណាល់ ត្រាំ បានតែងតែកូនប្រសារបស់ខ្លួន ឈ្មោះ Jared Kushner អោយធ្វើជាទីប្រឹក្សាជាន់ខ្ពស់ម្នាក់នៅសេតវិមាន។

Jared Kushner អាយុ ៣៥ឆ្នាំ នឹងទទួលរ៉ាប់រងធ្វើកិច្ចការសំខាន់ៗ នៅសេតវិមាន រួមមានទាំងធ្វើកិច្ចការគោលនយោបាយការបរទេស និងផ្ទៃក្នុងរបស់អាមេរិក។

ការតែងតាំងកូនប្រសារបស់ខ្លួន អោយកាន់តំណែងដ៍ធំនេះ ធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីលោក បារ៉ាក់ អូបាម៉ា ដែលនឹងផុតអាណត្តិនៅថ្ងៃទី ២០ មករា ខាងមុខ បានណែនាំអោយលោក ដូណាល់ ត្រាំ កុំអោយប៉ុនប៉ងយកសេតវិមាន ធ្វើជាកន្លែងដែល គ្រប់គ្រងជំនួញគ្រួសារ។

Jared Kushner ដែលជាស្វាមីរបស់ Ivanka Trump បានដើរតួយ៉ាងសំខាន់ ក្នុងយុទ្ធនាការបោះឆ្នោតកន្លងទៅ ដែលធ្វើអោយឪពុកក្មេករបស់ខ្លួនឈ្នះការបោះឆ្នោត ប្រធានាធិបតី។

ក្រោយពីមានការតែងតាំងនេះ គណបក្សប្រជាធិបតេយ្យ បានស្នើអោយលោក ដូណាល់ ត្រាំ ពិចារណាឡើងវិញអំពីការដាក់កូនប្រសារបស់ខ្លួន អោយកាន់តំណែងសំខាន់ នៅក្នុងសេតវិមាន ព្រោះវាជាអំពើបក្សពួកនិយម ហើយប្រឆាំងនឹងច្បាប់។

ប៉ុន្តែក្រុមសមាជិករបស់ លោក ដូណាល់ ត្រាំ បានបដិសេធចំពោះការលើកឡើងរបស់ បក្សប្រជាធិបតេយ្យ ហើយនិយាយថា ច្បាប់ដែលហាមឃាត់មិនអោយមន្ត្រី ផ្តល់ការងារដល់សាច់ញាតិ មិនត្រូវគេអនុវត្តន៍នៅសេតវិមាននោះទេ៕

CEN

ឥណ្ឌា បង្កើត Apps ២ដើម្បីបញ្ជូនព័ត៌មានទាក់ទងនឹងចរាចរណ៍ដល់ពលរដ្ឋ និងអាជ្ញាធរ

ក្រសួងដឹកជញ្ជូនរបស់ឥណ្ឌា គ្រោងបង្កើត Apps ពីរតាមទូរសព្ទ ក្នុងគោលបំណងពង្រឹងការយល់ដឹងពីច្បាប់ចរាចរណ៍របស់ប្រជាពលរដ្ឋ និងជួយសម្រួលការងាររបស់ក្រុមប៉ូលិសចរាចរណ៍ផងដែរ។ បើតាមការផ្សាយរបស់គេហទំព័រ Tech2.com កម្មវិធី Apps ទាំងពីរនោះ m-Parivahan និង e-challan។

ចរាចរណ៍នៅក្នុងប្រទេសឥណ្ឌា គឺជារឿងស្មុគ្រស្មាញបំផុតមួយ។ ដើម្បីលើកកម្ពស់ការយល់ដឹងរបស់ប្រជាពលរដ្ឋ និងពង្រឹងសមត្ថភាពការងាររបស់មន្ត្រីមានសមត្ថកិច្ច ក្រសួងដឹកជញ្ជូនឥណ្ឌា នឹងដាក់ដំណើរការ apps ថ្មីចំនួន២នៅលើទូរសព្ទដៃ។

គេហទំព័រជំនាញបច្ចេកវិទ្យាឥណ្ឌា Tech2.com បានផ្សាយឲ្យដឹងថា app «m-Parivahan» ជួយដល់អ្នកបញ្ជាយានយន្តដឹងពីស្ថានភាពចរាចរណ៍ ជាពិសេសផ្លូវដែលពួកគេអាចជៀសផុតការកកស្ទះ រីឯ app «e-challan» គឺដើម្បីសម្រួលការងារគ្រប់គ្រងរបស់ប៉ូលិសចរាចរណ៍ និងអាជ្ញាធរទទួលបន្ទុកផ្នែកផ្លូវថ្នល់ និងដឹកជញ្ជូន។

មន្ត្រីទទូលបន្ទុកផ្នែកសុវត្ថិភាពចរាចរណ៍ បានបញ្ជាក់ថា កម្មវិធីទូរសព្ទដៃទាំងពីរ នឹងបញ្ជូនសារភ្លាមៗទៅអ្នកពាក់ព័ន្ធ ជាពិសេសទាក់ទងនឹងការកកស្ទះ ក៏ដូចជាគ្រោះថ្នាក់ និងបញ្ហានានាដែលកើតឡើងនៅតាមផ្លូវ៕

ថ្មីៗ
អត្ថបទ : ធីតា

បុរសខ្លាំងហ្វីលីពីន៖ «មនោគមវិជ្ជារបស់ក្រុម ISIS បានចូលមកដល់ទឹកដីហ្វីលីពីនហើយ»

(ម៉ានីល)៖ ប្រធានាធិបតីហ្វីលីពីនលោក រ៉ូឌ្រីហ្គោ ឌូតឺតេ បានថ្លែងនៅថ្ងៃចន្ទនេះថា មនោគមវិជ្ជាដែលប្រកបដោយអំពើហិង្សាដ៏ឃោរឃៅរបស់ក្រុម ISIS បានចូលមកដល់ប្រទេសហ្វីលីពីនហើយ។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ិនហួរ នៅមុននេះបន្តិចនាល្ងាចថ្ងៃចន្ទ ទី០៩ ខែមករា ឆ្នាំ២០១៧។

ថ្លែងក្នុងពិធីមួយដែលប្រារព្ធឡើងនៅឯវិមានប្រធានាធិបតីលោក រ៉ូឌ្រីហ្គោ ឌូតឺតេ បាននិយាយថា «ពេលនេះពួកយើងទាំងអស់គ្នាបានទទួលស្គាល់ថាមនោគមវិជ្ជាបានមកដល់ទឹកដីប្រទេសហ្វីលីពីនហើយ»។ លោកប្រធានាធិបតីហ្វីលីពីនបានបន្ថែមថា បណ្តាក្រុមភេរវករកំពុងតែប្រើប្រាស់ការជួញដូរគ្រឿងញៀន ដើម្បីផ្គត់ផ្គង់បណ្តាញក្រុមរបស់ពួកគេនៅលើកោះ Mindanao ភាគខាងកើតហ្វីលីពីន។

ជាមួយគ្នានេះដែរមេបញ្ជាការប៉ូលិសជាតិហ្វីលីពីនលោក Ronald Dela Rosa បានថ្លែងក្នុងសន្និសីទសារព័ត៌មានមួយថា កងកម្លាំងការពារសន្តិសុខកំពុងតែឃ្លាំមើលយ៉ាងដិតដល់ចំពោះក្រុមភេរវកបរទេសចំនួនពី ០៥នាក់ ដល់១០នាក់ ដែលអាចមានវត្តមាននៅក្នុងប្រទេស ហើយលោកក៏បានបញ្ជាក់ដែរថា អាជ្ញាធរហ្វីលីពីនបានទទួលដំណឹងថា ក្រុមភេរវករបរទេសកំពុងតែហ្វឹកហ្វឺននៅហ្វីលីពីន មុននឹងត្រូវបញ្ជូនទៅកាន់ប្រទេស៊ីរី។

គួរបញ្ជាក់ដែរថាលោក រ៉ូឌ្រីហ្គោ ឌូតឺតេ បានបញ្ជាក់កាលពីថ្ងៃទី២៨ ខែវិច្ឆិកា ឆ្នាំ២០១៦ថាក្រុម ISIS មានទំនាក់ទំនងដោយផ្ទាល់ជាមួយក្រុមឧទ្ទាមអ៊ីស្លាម Maute ដែលនៅភាគខាងកើតហ្វីលីពីន៕

Fresh News

លោក ដូណាល់ ត្រាំ បញ្ជាឲ្យអគ្គរដ្ឋទូតទាំងអស់ ដែលតែងតាំងដោយលោក បារ៉ាក់ អូបាម៉ា លាលែងពីតំណែង និងត្រឡប់មកអាមេរិកវិញមុនថ្ងៃទី២០ ខែមករា

(អាមេរិក)៖ វាពិតប្រាកដណាស់ថា លោក ដូណាល់ ត្រាំ ប្រធានាធិបតីជាប់ឆ្នោតរបស់អាមេរិក បានចាប់ផ្តើមកែប្រែមុខមាត់នៃវិស័យការទូត របស់សហរដ្ឋអាមេរិក ចំពោះមុខអន្តរជាតិ ខណៈដែលលោកបានចេញបញ្ជាឲ្យអគ្គរដ្ឋទូតអាមេរិកទាំងអស់ នៅតាមបណ្តាប្រទេសនានា ដែលត្រូវបានតែងតាំងដោយលោក បារ៉ាក់ អូបាម៉ា ប្រធានាធិបតីជិតផុតអាណត្តិលាលែងពីតំណែង និងចាកចេញពីបណ្តាប្រទេសទាំងនោះឲ្យបានមុនថ្ងៃលោកឡើងកាន់តំណែងថ្ងៃទី២០ ខែមករា ខាងមុខនេះ។ នេះបើតាមការចេញផ្សាយដោយសារព័ត៌មាន Independent របស់អង់គ្លេស នាល្ងាចថ្ងៃចន្ទ ទី០៩ ខែមករា ឆ្នាំ២០១៧។

សារព័ត៌មានអឺរ៉ុបបានចេញផ្សាយថា វាជាហានិភ័យមួយសម្រាប់អាមេរិកក្នុងការបោះជំហានបែបនេះ ខណៈមន្ត្រីទូតថ្មីក៏មិនទាន់ត្រូវបានតែងតាំង ហើយអគ្គរដ្ឋទូតនៅតាមបណ្តាប្រទេសសំខាន់ៗដូចជា ចក្រភពអង់គ្លេស, អាល្លឺម៉ង់, និង កាណាដា ក៏ត្រូវដកចេញថែមទៀត ដែលជាហេតុធ្វើឲ្យក្រុមគ្រួសាររបស់ពួកគេពិបាកក្នុងការរកកន្លែងស្នាក់នៅ ពេលមកដល់អាមេរិកវិញ និងកិច្ចការងារការទូតសំខាន់ៗ អាចនឹងត្រូវរាំងស្ទះផងដែរ។

តាមការអះអាងពីក្រុមការងារអន្តរកាលរបស់លោក ត្រាំ អគ្គរដ្ឋទូតតាមបណ្តាប្រទេសជាច្រើន ត្រូវបានសម្រេចឲ្យលាលែងពីតំណែង តាមរយៈលិខិតបញ្ជាដែលត្រូវបានបញ្ជូនទៅកាន់ពួកគេតាំងពីថ្ងៃទី២៣ ខែធ្នូ ឆ្នាំ២០១៦ មកម្ល៉េះ។ មន្ត្រីជាន់ខ្ពស់តំណាងលោក ត្រាំ បានគូសបញ្ជាក់ថា «វាគ្មានអ្វីគួរឲ្យឈឺចាប់» សម្រាប់រឿងនេះឡើយ ដោយវាជារឿងធម្មតាដើម្បីធានាឲ្យបានថា មន្ត្រីដែលត្រូវបានតែងតាំងដោយលោក បារ៉ាក់ អូបាម៉ា នឹងអាចលាលែងចេញពីតំណែងឲ្យទាន់ពេលវេលាកំណត់។

គួរបញ្ជាក់ថា កន្លងមកលោក ត្រាំ ធ្លាប់បានបង្ហើបថាលោកនឹងតែងតាំងលោកមេធាវី David Friedman ធ្វើជាអគ្គរដ្ឋទូតអាមេរិកប្រចាំប្រទេសអ៊ីស្រាអែល និងអភិបាលរដ្ឋ Iowa លោក Terry Branstad ធ្វើជាអគ្គរដ្ឋទូតប្រចាំប្រទេសចិន។ ទោះបីជាបែបនេះក្តី អ្នកវិភាគបានលើកឡើងថា លោក ត្រាំ ទំនងជាមិនអាចធ្វើការតែងតាំងអគ្គរដ្ឋទូត ទៅតាមបណ្តាប្រទេសនានាឲ្យបានគ្រប់ចំនួន ទាន់ពេលដែលលោក ឡើងស្បថចូលកាន់តំណែងជាផ្លូវការនោះឡើយ។

ពាក់ព័ន្ធនឹងរឿងនេះ ប្រពន្ធទីមួយរបស់លោក ត្រាំ គឺលោកស្រី Ivana Trump បានបង្ហើបរួចទៅហើយថាលោកស្រី ចង់ធ្វើជាអគ្គរដ្ឋទូតអាមេរិកសាធារណរដ្ឋឆេក ប៉ុន្តែគេពុំទាន់ទទួលបានការបញ្ជាក់ជាផ្លូវការថាលោកស្រី នឹងអាចត្រូវតែងតាំងឬក៏អត់នោះទេ៕

Fresh News

ហាមមិនស្ដាប់! នាវាពិឃាដអាមេរិក បាញ់ព្រមានបីគ្រាប់សំដៅទៅរកនាវាល្បាតអ៊ីរ៉ង់ នៅតំបន់ឈូងសមុទ្រពែរ៍

(វ៉ាស៊ីនតោន)៖ នាវាពិឃាដអាមេរិក USS Mahan បានបាញ់ព្រមានចំនួនបីគ្រាប់សំដៅទៅរកនាវាល្បាតអ៊ីរ៉ង់បួនគ្រឿង បន្ទាប់ពីនាវាល្បាតទាំងនេះ បានបង្កើនល្បឿនកាន់តែលឿន ដោយមិនស្ដាប់ការព្រមាន ឆ្ពោះមកក្បែរនាវាពិឃាដអាមេរិក នៅក្នុងតំបន់ច្រក សមុទ្រ Hormuz នៃឈូងសមុទ្រពែរ៍ នៅថ្ងៃអាទិត្យ ម្សិលមិញ។ នេះបើតាមមន្ត្រីក្រសួងការពារអាមេរិកពីរនាក់ ថ្លែងប្រាប់ទីភ្នាក់ងារសារព័ត៌មាន Reuters នៅព្រលប់ថ្ងៃទី០៩ ខែមករា ឆ្នាំ២០១៧។

មន្ត្រីទាំងពីររូបខាងលើដែលថ្លែងប្រាប់ Reuters ក្នុងលក្ខខណ្ឌមិនបញ្ចេញឈ្មោះឲ្យដឹងថា នាវាពិឃាដអាមេរិក USS Mahan បានទំនាក់ទំនងជាមួយនាវាល្បាតអ៊ីរ៉ង់ តាមរយៈវិទ្យុទាក់ទង ក៏ប៉ុន្តែនាវាល្បាតទំាងបួនគ្រឿងរបស់ឆ្មាំអ៊ីរ៉ង់ មិនបានឆ្លើយតប ទៅនឹងការស្នើសុំឱ្យបន្ថយល្បឿននោះទេ តែផ្ទុយទៅវិញកាន់តែបង្កើនល្បឿនមកជិតនាវា USS Mahan ក្នុងចំងាយប្រហែលជា៨០០ម៉ែត្រ ជាហេតុបង្ខំឱ្យនាវាពិឃាដនេះ សម្រេចចិត្តបាញ់ព្រមានចំនួនបីគ្រាប់ ហើយឧទ្ធម្ភាគចក្រ នៃកងម៉ារីនអាមេរិក ក៏បានគម្រាមថានឹងបាញ់ផងដែរ បើសិននៅតែចូលមកជិត។ ដោយឡែកខាងភាគីអ៊ីរ៉ង មិនទាន់ធ្វើការអត្ថាធិប្បាយណា មួយនៅឡើយទេ ជុំវិញការអះអាងនេះ។

គួររំលឹកថា ករណីស្រដៀងគ្នានេះក៏ធ្លាប់បានកើតឡើង កាលពីខែសីហា ឆ្នាំ២០១៦ ដោយនៅកាលណោះ កងម៉ារីនអាមេរិក ក៏បានបាញ់ព្រមាននាវាល្បាតអ៊ីរ៉ង់ ដែលធ្វើដំណើរមកក្បែរនាវាអាមេរិកចំនួនពីរគ្រឿង ផងដែរ៕

Fresh News

ធ្លាយព័ត៌មានសម្ងាត់៖ «ប្រទេសកូរ៉េខាងជើង បង្កើនចំនួនទ័ពដល់ ១.២៨លាននាក់ ជាប់លេខ ១ លើពិភពលោក!»

(សេអ៊ូល)៖ សៀវភៅសស្ដីពីវិស័យការពារជាតិឆ្នាំ២០១៦ ចុះផ្សាយនៅថ្ងៃអង្គារនេះ ដោយក្រសួងការពារជាតិកូរ៉េខាងត្បូងបានឱ្យដឹងថា កងទ័ពកូរ៉េខាងជើងបច្ចុប្បន្នមានចំនួនសរុបប្រមាណជា ១.២៨លាននាក់ (ជាប់លេខ ១ លើពិភពលោកគិតពីចំនួនកងទ័ព និងលេខ ៤ លើឥទ្ធិពលយោធា) ដោយកើនឡើង ៨០,០០០នាក់បន្ថែមក្នុងរយៈពេលពីរឆ្នាំ។ នេះបើតាមការចេញផ្សាយដោយទីភ្នាក់ងារសារព័ត៌មានយ៉ុនហាប់ នៅថ្ងៃអង្គារ ទី១០ ខែមករា ឆ្នាំ២០១៧។

សៀវភៅសនេះដដែលបានបញ្ជាក់ទៀតថា កូរ៉េខាងជើងបានបង្កើនចំនួនកងទ័ពថ្មើរជើងពី ១.០២នាក់ដល់ ១.១០លាននាក់ ខណៈកងទ័ពអាកាសហាក់ដូចជាត្រូវបានកាត់បន្ថយពី ១២០,០០០នាក់មកនៅត្រឹម ១១០,០០០នាក់រីឯកងទ័ពជើងទឹកមិនមានការប្រែប្រួលនោះទេគឺនៅចំនួនដដែល ៦០,០០០នាក់ ហើយនៅរយៈពេលប៉ុន្មានឆ្នាំចុងក្រោយនេះរបបដឹកនាំលោក គីម ជុងអ៊ុន បានបង្កើតអង្គភាពយោធាថ្មីពីរដែលទទួលបន្ទុកដឹកនាំវិស្វកម្មយោធា និងការសាងសង់ផ្លូវថ្នល់។

ដោយឡែកពាក់ព័ន្ធនឹងសមត្ថភាពនុយក្លេអ៊ែរ សៀវភៅសនេះបានគូសបញ្ជាក់ថាកូរ៉េខាងជើងមានសារធាតុភ្លុយតូនីញ៉ូមប្រមាណជា ៥០គីឡូក្រាម ដោយកើនឡើង ១០គីឡូក្រាមបើធៀបទៅនឹងឆ្នាំ២០០៨ ក៏ប៉ុន្តែការប៉ាន់ប្រមាណពីបរិមាណជាក់លាក់ មិនទាន់អាចត្រូវបានគេបញ្ជាក់ឱ្យច្បាស់លាស់ឡើយ ដោយ សារតែការចម្រាញ់សារធាតុភ្លុយតូនីញ៉ូម និងអ៊ុយរ៉ាញ៉ូមធ្វើឡើងជាសម្ងាត់៕

Fresh News

ជប៉ុនអះអាងថានឹងតាមដានជានិច្ច នូវរាល់ព័ត៌មានទាក់ទិននឹង «ការអភិវិឌ្ឍន៍គ្រាប់មីស៊ីលកូរ៉េខាងជើង»

(តូក្យូ)៖ ជប៉ុននឹងធ្វើការ តាមដាន ប្រមូល ក៏ដូចជាវិភាគរាល់ព័ត៌មានទាំងឡាយពាក់ព័ន្ធនឹងការបាញ់សាកល្បងគ្រាប់មីស៊ីល និងអាវុធនុយក្លេអ៊ែររបស់កូរ៉េខាងជើង ដោយយកចិត្តទុកដាក់ជាទីបំផុតចំពោះស្ថានភាពនៅក្នុងតំបន់នាពេលបច្ចុប្បន្ន។ នេះបើតាមអ្នកនាំពាក្យរដ្ឋាភិបាលជប៉ុន ដែលចុះផ្សាយដោយទីភ្នាក់ងារសារព័ត៌មាន Reuters នៅរសៀលថ្ងៃអង្គារ ទី១០ ខែមករា ឆ្នាំ២០១៧។

អ្នកនាំពាក្យរដ្ឋាភិបាលជប៉ុន លោក យូស៊ីហ៊ីដេ ស៊ូហ្គា (Yoshihide Suga) នៅក្នុងសន្និសីទសារព័ត៌មាន បានថ្លែងថា រដ្ឋាភិបាលទីក្រុងតូក្យូនឹងប្រើប្រាស់គ្រប់លទ្ធភាពតាមដែលអាចធ្វើទៅបាន ដើម្បីប្រកាសសញ្ញាអាសន្ន និងឃ្លំាមើលរាល់សកម្មភាពយោធារបស់កូរ៉េខាងជើង។

គួរបញ្ជាក់ថាកាលពីថ្ងៃអាទិត្យកន្លងទៅ កូរ៉េខាងជើងបានអះអាងថាអាចនឹងបាញ់សាកល្បងមីស៊ីលផ្លោងអន្តរទ្វីប ICBM នៅគ្រប់ពេលវេលា តាមបញ្ជាលោក គីម ជុងអ៊ុន ហើយថែមទាំងបញ្ជាក់ឡើងវិញដែរថា នយោបាយឈ្លានពានរបស់សហរដ្ឋអាមេរិក គឺជាមូលហេតុជំរុញឱ្យកូរ៉េខាងជើងត្រូវតែអភិវឌ្ឍន៍អាវុធនុយក្លេអ៊ែរ និងមីស៊ីលផ្លោងឱ្យខានតែបាន៕

Fresh News

កាសែតថ្មី

Menu