ភ្នំពេញ: លោកយ៉ែម បុញ្ញឫទ្ធិ អនុប្រធានក្រុមមតិភាគតិចនៅក្នុងរដ្ឋសភា បានឲ្យដឹងនៅព្រឹកថ្ងៃទី១១ ខែធ្នូ នេះថា នៅសប្តាហ៍ទី៣ ខែធ្នូ ខាងមុខនេះ លោកកឹម សុខា ប្រធានក្រុមមតិភាគតិច នឹងជួបជាមួយសម្តេចក្រឡាហោម ស ខេង ប្រធានក្រុមមតិភាគច្រើននៅក្នុងសភា ដើម្បីជជែកពិភាក្សាលើបញ្ហាមួយចំនួន ដែលមិនទាន់ដោះស្រាយ និងបញ្ហាសេសសល់។
ការជួបនេះ គឺបន្ទាប់ពីលោកកឹម សុខា និងសម្តេចក្រឡាហោម ស ខេង កាលពីថ្ងៃទី០៧ ខែធ្នូ ឆ្នាំ២០១៦ នៅវិមានរដ្ឋសភា។ លោកកឹម សុខា ក៏បានជួបពិភាក្សាជាមួយសម្តេចនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា នៅក្នុងរដ្ឋសភា មុនកិច្ចប្រជុំពេញអង្គសភា កាលពីព្រឹកថ្ងៃទី០៧ ខែធ្នូ ឆ្នាំ២១៦។ ដោយការជួបគ្នានេះ បង្ហាញពីភាពស្និទ្ធស្នាលក្នុងនាមជាដៃគូរពិភាក្សាបញ្ហាប្រទេសជាតិ។
បន្ទាប់ពីរដ្ឋសភាដំណើរការកិច្ចប្រជុំ គឺសម្តេចតេជោ ហ៊ុន សែន និងលោកកឹម សុខា បានចេញមកជួបគ្នានៅខាងក្រៅ ដែលមានរយៈពេលប្រមាណជាង ១ម៉ោង ជជែកលើបញ្ហាសំខាន់ៗមួយចំនួន ជាពិសេសពាក់ព័ន្ធការស្នើសុំឲ្យមានការដោះលែងលោកស៊ាង ចែត មេឃុំស្រក ស្រុកកំពង់សៀម ខេត្តកំពង់ចាម មន្ត្រីសិទ្ធិមនុស្ស និងលោកនី ចរិយា អគ្គលេខាធិការរង គជប។
បន្ទាប់ពីជួបពិភាក្សាជាមួយសម្តេចនាយករដ្ឋមន្ត្រី ហ៊ុន សែន គឺលោកកឹម សុខា បានជួបពិភាក្សាគ្នាជាមួយសម្តេចក្រឡាហោម ស ខេង ប្រធានក្រុមមតិភាគច្រើននៅក្នុងសភា ដើម្បីពិភាក្សាលើបញ្ហាមួយចំនួន។
សម្តេចក្រឡាហោម ស ខេង ប្រធានក្រុមសម្លេងមតិភាគច្រើនក្នុងសភា បានថ្លែងថា នៅក្នុងជំនួបពិភាក្សាជាមួយលោកកឹម សុខា គឺបានឯកភាពគ្នាថា ទី១.មុនរាល់ការប្រជុំសភា ក្រុមថ្នាក់ដឹកនាំតំណាងរាស្ត្រ នៃគណបក្សទាំងពីរ នឹងជួបគ្នាពិភាក្សាលើបញ្ហានានា ដែលពាក់ព័ន្ធនិងការប្រជុំ។ ទី២.អាចនឹងពិនិត្យលទ្ធភាពមូយខែជួបគ្នាម្តង និងទី៣.ឯកភាពគ្នាថា នៅចុងខែធ្នូនេះ អាចនឹងមានការជួបគ្នារវាងថ្នាក់ដឹកនាំ នៃគណបក្សទាំងពីរ។
សម្តេចក្រឡាហោម ស ខេង បានបញ្ជាក់ ទាក់ទងករណីលោក ស៊ាង ចែត មេឃុំស្រក ស្រុកកំពង់សៀម ខេត្តកំពង់ចាម និងមន្ត្រីសិទ្ធិមនុស្ស រួមទាំងអគ្គលេខាធិការរង គជប គឺលោកកឹម សុខា បានជជែកពិភាក្សាជាមួយសម្តេចតេជោ ហ៊ុន សែន ហើយបើតាមសម្តេចដឹងមុនដំណាច់ខែធ្នូនេះ នឹងមានការដោះស្រាយករណីមន្ត្រីសិទ្ធិមនុស្ស ហើយនិងអគ្គលេខាធិការរង គ.ជ.ប។
លោកកឹម សុខា បានថ្លែងក្នុងសភាថា លោកបានពិភាក្សាជាមួយសម្តេចតេជោ ហ៊ុន សែន ពីបញ្ហាប្រទេសជាតិ ហើយបានរកឃើញលើចំណុចរួមខ្លះៗ គឺការបង្រួប បង្រួមជាតិ ឯកភាពជាតិ ដើម្បីឲ្យមានស្ថិរភាពជាតិ និងការរីកចំរើនរបស់ប្រទេសជាតិ និងប្រជាពលរដ្ឋ។ ដូច្នេះហើយបានជាលោកមកប្រជុំសភា ដើម្បីធ្វើដំណើរឆ្ពោះទៅគោលដៅ។អ្វីដែលជាការខ្វះខាត ឬការខ្វែងគំនិតគ្នា គឺជាការធម្មតានៅក្នុងសង្គមប្រជាធិបតេយ្យ។ ប៉ុន្តែអ្វីដែលត្រូវធ្វើទៅមុខទៀត គឺស្វែងរកឯកភាពជាតិ ដើម្បីឲ្យជាតិបានរីកចំរើន។
ការរិះគន់ដោយស្ថាបនាប្រកបទៅដោយសីលធម៌ សេចក្តីថ្លៃថ្នូរ គឺជៀសវាងការជេរប្រមាថ លាបពណ៌ ដែលនាំឲ្យមានការឈឺចាប់ និងនាំឲ្យមានការបែកបាក់សង្គម នេះគឺជាអ្វីដែលលោកបានជជែកជាមួយសម្តេចនាយករដ្ឋមន្ត្រី ហ៊ុន សែន ។ ហើយយើងនឹងព្យាយាមធ្វើការងារនេះឲ្យបានសម្រេចដល់គោលដៅដែលយើងចង់បានទាំងអស់គ្នា៕
CEN
ដោយ: មុនីរាជ
No comments:
Post a Comment