ខណៈដែលស្ថានការណ៍នៅកូរ៉េខាងត្បូងកំពុងតានតឹងដោយសាររឿងអាស្រូវប្រធានាធិបតី នៅកូរ៉េខាងជើងឯណោះវិញ មេដឹកនាំវ័យក្មេង គីម ជុងអ៊ុន បានដឹកនាំសមយុទ្ធយោធាដែលចូលរួមដោយកងកម្លាំងពិសេស ដើម្បីធ្វើត្រាប់វាយប្រហារលើគោលដៅទាំងឡាយនៅកូរ៉េខាងត្បូង។ តាមរយៈរូបភាពដែលផ្សាយដោយសារព័ត៌មានកូរ៉េខាងជើង វិមានប្រធានាធិបតីកូរ៉េខាងត្បូង ជាគោលដៅចម្បងនៃការវាយប្រហារក្នុងសមយុទ្ធនេះ។
មេដឹកនាំកំពូលកូរ៉េខាងជើង គីម ជុងអ៊ុន បានចូលរួមពិនិត្យដោយផ្ទាល់ក្នុងសមយុទ្ធយោធាមួយ ដែលសំដៅវាយកម្ទេចគោលដៅលើទឹកដីកូរ៉េខាងត្បូង។ សមយុទ្ធយោធានេះចូលរួមដោយកងកម្លាំងនៃកងពលប្រតិបត្តិការពិសេសមកពីអង្គភាព៥២៥ របស់កងទ័ពប្រជាជនកូរ៉េ។ ហើយគោលដៅសំខាន់នៃការវាយប្រហារគឺ វិមានប្រធានាធិបតីកូរ៉េខាងត្បូង Cheong Wa Dae ។
ទូរទស្សន៍រដ្ឋកូរ៉េខាងជើង KCNA នៅថ្ងៃទី១១ ខែធ្នូ បានរាយការណ៍ថា មេដឹកនាំកូរ៉េខាងជើង ដែលមានទឹកមុខរីករាយ បានលើកសរសើរមេបញ្ជាការ និងកងកម្លាំងពិសេសដែលខិតខំពង្រឹងសមត្ថភាពរបស់អង្គភាពខ្លួន។ KCNA បានស្រង់សំដីលោក គីម ជុងអ៊ុន ថា៖ «ធ្វើបានល្អណាស់! កងទ័ពរបស់សត្រូវ នឹងគ្មានកន្លែងលាក់ខ្លួនឡើយ ហើយក៏គ្មានលទ្ធភាពវាយបកវិញដែរ»។ នេះបើយោងតាមផ្សាយរបស់សារព័ត៌មាន Yonhap ។
យ៉ាងណាក្ដី ទូរទស្សន៍រដ្ឋ KCNA មិនបានបញ្ជាក់ពេលវេលានៃសមយុទ្ធនេះឡើយ។ ប៉ុន្តែកាសែតកូរ៉េខាងជើង Rodong Sinmun បានបង្ហាញរូបភាពកងទ័ពកូរ៉េខាងជើង ដែលត្រូវបានគាំទ្រដោយកងកម្លាំងកាំភ្លើងធំ បើកការវាយប្រហារត្រាប់លើវិមាន Cheong Wa Dae របស់ប្រធានាធិបតីកូរ៉េខាងត្បូង។ វិមាន Cheong Wa Dae ជានិវេសនដ្ឋានរបស់លោកស្រី ប៉ាក ហ្គឺនហេ បើទោះជាលោកស្រីត្រូវបានសភាបោះឆ្នោតទម្លាក់ក៏ដោយ។
ដោយឡែកកូរ៉េខាងត្បូង ក៏បានបង្កើនការប្រុងប្រយ័ត្នខ្ពស់ដែរ ខ្លាចក្រែងកូរ៉េខាងជើងឆ្លៀតឱកាសវាយប្រហារ ខណៈដែលស្ថានការណ៍នយោបាយកូរ៉េខាងត្បូងកំពុងផុយស្រួយស្រាប់ផងនោះ។ នាយករដ្ឋមន្ត្រី Hwang Kyo-ahn ដែលកាន់អំណាចជំនួសលោកស្រី ប៉ាក ហ្គឺនហេ បានចេញបញ្ជាឲ្យកងទ័ពស្ថិតក្នុងស្ថានភាពប្រុងការកម្រិតខ្ពស់ ដើម្បីការពារការវាយប្រហារណាមួយ ដោយរួមទាំងការវាយប្រហារតាមប្រព័ន្ធអនឡាញដែ។
ជារឿយៗ ក្រុងព្យុងយ៉ាង តែងតែធ្វើសមយុទ្ធ ដើម្បីវាយប្រហារទីតាំងលើទឹកដីកូរ៉េខាងត្បូង ជាពិសេសវិមានប្រធានាធិបតី។ ក្រុងសេអ៊ូលវិញ បានចាត់ទុកសមយុទ្ធទាំងនេះជាសកម្មភាពបង្កហេតុ ហើយដោយឃើញស្ថានភាពមិនស្រួលនោះ ក្រុងសេអ៊ូលក៏បើកដៃឲ្យអាមេរិកពង្រាយប្រព័ន្ធការពារអាកាស THAAD លើទឹកដីខ្លួនដើម្បីការមីស៊ីលរបស់កូរ៉េខាងជើងទៀតផង៕
ថ្មីៗ
អត្ថបទ : តន ចាន់រិទ្ធារ៉ា
No comments:
Post a Comment