ភ្នំពេញ: សម្តេចនាយករដ្ឋមន្ត្រី ហ៊ុន សែន និងជាប្រធានគណបក្សប្រជាជនកម្ពុជា បានថ្លែងនៅសន្និបាតគណៈកម្មាធិការកណ្តាលលើកទី៤០ អាណត្តិទី៥ នៅព្រឹកថ្ងៃទី១៨ ខែធ្នូ នេះថា គណបក្សប្រជាជនកម្ពុជា នៅតែរក្សាឆន្ទៈនយោបាយក្នុងការអនុវត្តកិច្ចព្រមព្រៀងនយោបាយថ្ងៃទី២២ ខែកក្កដា ឆ្នាំ២០១៤ និងវប្បធម៌សន្ទនា ដោយឈរលើគោលការណ៍នៃលទ្ធិប្រជាធិបតេយ្យ។ ប៉ុន្តែគណបក្សប្រជាជនកម្ពុជា ប្រឆាំងការប្រើប្រាស់កិច្ចព្រមព្រៀងនយោបាយ និងវប្បធម៌សន្ទនា ដែលរំលោភបំពានរដ្ឋធម្មនុញ្ញ និងគោលការណ៍ច្បាប់។
ជាមួយគ្នានេះ លោកកឹម សុខា ប្រធានក្រុមមតិភាគិតិច និងសម្តេចក្រឡាហោម ស ខេង ប្រធានក្រុមមតិភាគច្រើននៅក្នុងរដ្ឋសភា គ្រោងនឹងជួបគ្នាពិភាក្សាគ្នា ដើម្បីដោះស្រាយបញ្ហាសំខាន់ៗ មួយចំនួនដែលនៅសេសសល់មិនទាន់ដោះស្រាយ នៅសប្តាហ៍ក្រោយនេះ។
លោកយ៉ែម បុញ្ញឫទ្ធិ អនុប្រធានក្រុមមតិភាគតិចនៅក្នុងរដ្ឋសភា បាន ឲ្យដឹងថា ការជួបគ្នារវាងលោកកឹម សុខា និងសម្តេចក្រឡាហោម ស ខេង គឺនៅមិនទាន់បានកំណត់ថ្ងៃនៅឡើយទេ។ ការមិនទាន់កំណត់ថ្ងៃ ដោយសារសម្តេចក្រឡាហោម ស ខេង ជាប់រវល់ និងលោកកឹម សុខា ចេញទៅពិនិត្យសុខភាពផ្ទាល់ខ្លួននៅប្រទេសថៃផង។
លោកបានបញ្ជាក់ថា ការជួបគ្នារវាងប្រធានក្រុមមតិភាគតិច និងមតិភាគច្រើននៅក្នុងសភា សង្ឃឹមថា នឹងជួបគ្នានៅសប្តាហ៍ក្រោយនេ។ ហើយនៅពេលដែលលោកកឹម សុខា ត្រឡប់មកពីពិនិត្យសុខភាពនៅប្រទេសថៃវិញ នឹងធ្វើការទំនាក់ទំនងគ្នា ដើម្បីកំណត់ថ្ងៃជួបពិភាក្សាគ្នា។
ការគ្រោងជួបគ្នានេះ គឺបន្ទាប់ពីលោកកឹម សុខា និងសម្តេចក្រឡាហោម ស ខេង បានជួបគ្នាលើកដំបូងនៅវិមានរដ្ឋសភាកាលពីថ្ងៃទី០៧ ខែធ្នូ ឆ្នាំ២០១៦៕
CEN
ដោយ: មុនីរាជ
No comments:
Post a Comment